އަލްފާޟިލާ ސަލްމާ ޢަބްދުލްކަރީމް
ސަލްމާ ޢަބްދުލްކަރީމް، ދިވެހި ދައުލަތަށް ޚިދުމަތް ކުރައްވަން ފެށްޓެވީ، ދިވެހިރާއްޖޭގެ އަޑުގެ ޓައިޕިސްޓް ކަމުގެ ވަޒީފާގައި 13 އެޕްރީލް 1988 ގައެވެ. ޚިދުމަތުގައި ހޭދަކުރެއްވި 35 އަހަރަށްވުރެ ދިގު މުއްދަތުގެ ތެރޭގައި، ދިވެހިރާއްޖޭގެ އަޑުގެ ޓައިޕިސްޓް ކަމާއި، އެސިސްޓެންޓް ސެކްރެޓެރީ ކަމާއި، އެސިސްޓެންޓް އެޑްމިނިސްޓްރޭޓިވް އޮފިސަރު ކަމާއި، އެމް.އެން.ބީ.ސީ.ގެ ފްރަންޓް އޮފިސަރ ގްރޭޑް 1 ކަމާއި، ޕަބްލިކް ސަރވިސް މީޑިއާގެ އެސިސްޓެންޓް ފްރަންޓް އޮފިސަރު ކަމާއި، ކަސްޓަމަރ ސަރވިސް އޮފިސަރުކަން ކުރައްވައިފައި ވެއެވެ. ސަލްމާ ޢަބްދުލްކަރީމް މިހާރު ހުންނެވީ، ޓެކްނިކަލް އިކުއިޕްމަންޓް ޑިސްޕެޗް އޮފިސަރ ކަމުގެ މަގާމުގައެވެ.
ވޭތުވެދިޔަ ދިގު މުއްދަތުގެ ތެރޭގައި، ސަލްމާ ޢަބްދުލްކަރީމް، މައިގަނޑު ގޮތެއްގައި ކުރައްވައިފައި ވަނީ، އިދާރީ ކަންކަމެވެ. އޭގެތެރޭގައި، ޚަބަރާއި، ސިޓީއާއި، އިޢުލާނާއި، އެހެނިހެން ލިޔުންތައް ޓައިޕް ކުރެއްވުމާއި، ސިޓީއާއި، އެހެނިހެން ތަކެތި ފޮނުއްވުމާއި، ކުންފުންޏަށް ލިބޭ ސިޓީއާއި ތަކެތި ބަލައިގަނެ، ކަމާބެހޭ ޑިޕާޓްމަންޓުތަކާ ހަވާލުކުރުމާއި، އެކިއެކި ބޭނުންތަކަށް ވަޑައިގަންނަވާ ބޭފުޅުން ރިސީވް ކުރެއްވުން ހިމެނެއެވެ.
ޕަބްލިކް ސަރވިސް މީޑިއާގެ އިކުއިޕްމަންޓް ޑިސްޕެޗް ޔުނިޓުގައި ހުންނަ އެކިއެކި އިކުއިޕްމަންޓުތައް، ލައިވް އިވެންޓްތަކަށާއި، ޕުރޮގުރާމުތަކަށް ދޫކުރުމާއި، އަދި އަނބުރާ ގެނައުމުން، އެ ތަކެތި ބަލައިގަތުމާއި، އެއްވެސް އިކުއިޕްމަންޓެއް ގެއްލިއްޖެނަމަ، އެކަމާ ގުޅިގެން ކުރަންޖެހޭ އެންމެހައި މަސައްކަތްތައް ކުރައްވަމުން ގެންދަވަނީ، ސަލްމާ ޢަބްދުލްކަރީމެވެ. އަދި، އެކިއެކި ބައްދަލުވުންތަކުގެ ޔައުމިއްޔާ ލިޔުއްވުމާއި، ވަޒީފާ އަދާކުރައްވާ ޔުނިޓުގެ ރިޕޯޓު ތައްޔާރުކުރެއްވުމާއި، އެހެން ސެކްޝަންތަކާ ގުޅިގެން ކުރައްވަންޖެހޭ ކަންކަން، ވަރަށް ފަރުވާތެރިކަމާއެކުގައި، ސަލްމާ ކުރައްވަމުން ގެންދަވައެވެ.
ކުންފުނީގެ ވަޒީފާއާ އަލަށް ގުޅިވަޑައިގަންނަވާ މުވައްޒަފުންނަށް، މަސައްކަތުގެ ތެރެއިން ސަލްމާއަށް ލިބިވަޑައިގެންފައިވާ ތަޖުރިބާގެ އަލީގައި، ކަންކަން އޮޅުންފިލުއްވައި ދެއްވައި، އާންމުކޮށް ޢަމަލުކުރަމުން ގެންދާ ގަވާއިދުތަކާއި އުސޫލުތަކަށް، އާ މުވައްޒަފުން ހޭލުންތެރިކުރުވުމުގެ މަސައްކަތްވެސް ސަލްމާ ޢަބްދުލްކަރީމް ކުރައްވަމުން ގެންދަވައެވެ.