އަލްފާޟިލާ އިތުމީނާ މުޙައްމަދު
އިތުމީނާ މުޙައްމަދު، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 5 މާރިޗު 1987 ގައެވެ. އެއީ، އިސްކަންދަރު ސްކޫލުގެ ޕްރައިމަރީ ޓީޗަރެއްގެ ގޮތުގައެވެ. ކިޔަވައި ވިދާޅުވުމަށް ރާއްޖެއިން ބޭރަށް ވަޑައިގަތުމަށްޓަކައި ދުވަސްކޮޅަކަށް ވަޒީފާއިން ވަކިވެވަޑައިގަތުމަށްފަހު، އެނބުރި ވަޑައިގެން، އަލުން އިސްކަންދަރު ސްކޫލުގައި ޚިދުމަތް ކުރައްވަން ފެށްޓެވީ، 18 ޖޫން 1990 ގައެވެ.
މި ވޭތުވެދިޔަ 36 އަހަރަށްވުރެ ދިގުމުއްދަތުގެ ތެރޭގައި، އިސްކަންދަރު ސްކޫލުގެ ޕްރައިމަރީ ހުރިހާ ގްރޭޑަކަށް، (ގްރޭޑް 1 ން 7 އަށް) އިތުމީނާ މުޙައްމަދު ވަނީ ކިޔަވައި ދެއްވައިފައެވެ. އެންމެ ގިނައިން ކިޔަވައިދެއްވީ، ގްރޭޑް 5 އަށެވެ.
2006ވަނަ އަހަރު، ސްކޫލުގެ މެނޭޖްމަންޓާ ގުޅިވަޑައިގެން، އެކި އަހަރު އެކި ގްރޭޑާ ހަވާލުވެވަޑައިގެން، އެ ގްރޭޑުތަކަށް ކިޔަވައި ދެއްވަމުން ގެންދެވި ޓީޗަރުންނަށް، އެކި ގޮތްގޮތުން އިތުމީނާ އެހީތެރިކަން ދެއްވަމުން ގެންދަވައިފައި ވެއެވެ. އަދި ލިބިވަޑައިގެންފައިވާ ތަޖުރިބާގެ އަލީގައި، ކަންކަން ކުރައްވަންވީ ގޮތް ޓީޗަރުންނަށް އޮޅުންފިލުއްވައި ދެއްވައި، މައުލޫމާތު ހިއްސާ ކުރައްވަމުން ގެންދަވައެވެ.
އިތުމީނާ މުޙައްމަދަކީ، ވަރަށްގިނަ ދަރިވަރުންގެ ލޯތްބާއި، ގިނަ ބެލެނިވެރިންގެ މަގުބޫލުކަން ލިބިވަޑައިގެންފައިވާ ބޭފުޅެކެވެ. އިތުމީނާ، މުދައްރިސުންގެ ތަޢުލީމީ މަރުކަޒުން ޓީޗިންގ ކޯސް ފުރިހަމަކުރެއްވިއިރު، ގަރލްގައިޑް ލީޑަރުކަމުގެ ސެޓުފިކެޓުވެސް ހާސިލުކުރެއްވިއެވެ. އެހެންކަމުން، ގަރލްގައިޑް އެސޯސިއޭޝަނާ އިތުމީނާ ގުޅިވަޑައިގަތީއްސުރެ މިއަދާ ހަމަޔަށްވެސް ލިޓްލްމެއިޑް ޕެކްތައް ހިންގެވުމުގައްޔާއި، ގައިޑް ހަރަކާތުގެ ކަންކަން ހިންގެވުމުގައި، ޝައުޤުވެރިކަމާ އެކުގައި އިސްނަންގަވައިގެން މަސައްކަތް ކުރައްވަމުން ގެންދަވާކަން ފާހަގަކޮށްލަން ޖެހެއެވެ.
އިތުމީނާ މުޙައްމަދަކީ، އެކި އުމުރުފުރައިގެ ލިޓްލްމެއިޑުންނާއި، ގަރލްގައިޑުންނާ އެކީގައި، އެކިފަހަރު މަތިން، އެކި ޤައުމުތަކަށް ވަޑައިގެން، ބައިނަލްއަގުވާމީ ކޭމްޕްތަކުގައްޔާއި، ޖަމްބޮރީތަކުގައިވެސް ބައިވެރިވެވަޑައިގެންފައިވާ ބޭފުޅެކެވެ.
އިތުމީނާ މުޙައްމަދަށް 2010ވަނަ އަހަރު ވަނީ، ޓީޗިންގ އެކްސެލެންސް އެވޯޑް ލިބިވަޑައިގެންފައެވެ. އިތުމީނާއަކީ، ޓީޗިންގ ޕްރައިމަރީ އެންޑް މިޑްލް ސްކޫލްގެ ރޮނގުން ބެޗްލަރސް ޑިގްރީއާއި، މާސްޓަރޒް އިން އެޑިޔުކޭޝަން ހާސިލުކުރައްވައިފައިވާ ބޭފުޅެއްވެސް މެއެވެ.
