އަލްފާޟިލާ ލަޠީފާ މުޙައްމަދު
ލަޠީފާ މުޙައްމަދު، ދިވެހި ދައުލަތަށް ޚިދުމަތް ކުރައްވަން ފެށްޓެވީ، ދިވެހިބަހާއި ތާރީޚަށް ޚިދުމަތްކުރާ ޤައުމީ މަރުކަޒުގެ ކާތިބާ ކަމުގެ ވަޒީފާއިން 27 ޑިސެންބަރު 1987 ގައެވެ. އޭގެ ކުރިން، އުތީމު އޮފީހުން ހިންގެވި މަކުތަބުގެ މުދައްރިސްކަން ވަގުތީގޮތުން އަދާކުރެއްވިއެވެ. މިހާރު އަދާކުރައްވަމުން ގެންދަވަނީ، ސަގާފީ ތަރިކަ ރައްކާތެރިކުރާ ޤައުމީ މަރުކަޒުގެ އެސިސްޓެންޓް އެޑްމިނިސްޓްރޭޓިވް އޮފިސަރު ކަމުގެ ވަޒީފާއެވެ.
މި ވޭތުވެދިޔަ 36 އަހަރަށްވުރެ ދިގު މުއްދަތުގެ ތެރޭގައި، ބޮޑުތަކުރުފާނުގެ ހަނދާނީ މަރުކަޒުގެ ސީނިއަރ ކުލާކް ކަމާއި، އެސިސްޓެންޓް ސެކްރެޓެރީ ކަމާއި، އެސިސްޓެންޓް އެޑްމިނިސްޓްރޭޓިވް އޮފިސަރުކަން ލަޠީފާ މުޙައްމަދު ކުރައްވައިފައި ވެއެވެ.
ލަޠީފާ މުޙައްމަދު ކުރެއްވި މައިގަނޑު މަސައްކަތްތަކުގެ ތެރޭގައި، އޮފީސް ހުޅުވައި ލެއްޕުމާއި، މުވައްޒަފުންގެ ހާޒިރީ ބެލެހެއްޓެވުމާއި، މުސާރައާ ގުޅޭ ކަންކަން ނިންމަވައި، މުވައްޒަފުންނަށް މުސާރަ ހަވާލުކުރެއްވުމާއި، ބޮޑުތަކުރުފާނުގެ ހަނދާނީ މަރުކަޒާއި، އުތީމު ގަނޑުވަރަށް ވަނުމުގެ ޓިކެޓް ވިއްކުމާއި، އާމްދަނީގެ ގޮތުގައި ލިބޭ ފައިސާގެ ދުވަހު ރިޕޯޓު ތައްޔާރުކުރެއްވުމާއި، އާމްދަނީގެ ގޮތުގައި ލިބޭ ފައިސާ، ތިޖޫރީއަށް ޖަމާކުރެއްވުން ހިމެނެއެވެ. އަދި، ޔައުމިއްޔާއާއި، އެހެނިހެން ލިޔުންތައް އަތުން ލިޔުއްވައި ބެލެހެއްޓެވުމާއި، ސްޓޮކް ބެލެހެއްޓެވުމާއި، މަރުކަޒަށް ލިބޭ ސިޓީއާއި މެސެޖު ރަޖިސްޓަރީ ކުރައްވައި، ކަމާގުޅޭ މުވައްޒަފުންނާ އެ ތަކެތި ހަވާލުކުރެއްވުމާއި، ސިޓީއާއި، މެސެޖުގެ ޖަވާބު ތައްޔާރުކުރެއްވުމާއި، އޮފީސްތަކަށް ފޮނުއްވުން ފަދަ މަސައްކަތްތައްވެސް ކުރައްވައިފައި ވެއެވެ.
ޤައުމީ ދުވަސް ފާހަގަކުރުން ފަދަ ޚާއްޞަ މުނާސަބަތުތަކަށާއި، ރަސްމީ ޖަލްސާއާއި ޙަފުލާ ފަދަ ކަންކަމަށް، ހަނދާނީ މަރުކަޒާއި، ޖަލްސާކުރާ މާލަމާއި، އުތީމު ގަނޑުވަރު ޒީނަތްތެރި ކުރެއްވުމުގެ މަސައްކަތުގައި ލަޠީފާ މުޙައްމަދު، ޢަމަލީގޮތުން ބައިވެރިވެވަޑައިގަންނަވަމުން ގެންދަވައެވެ. އަދި އުތީމު ގަނޑުވަރުގެ ބޮޑުދިދައާއި، ކުދި ދިދަތަކާއި، ކަންނެޔޮ އުރަތަކާއި، މަސާރީއާއި، ސަނދުވާ އަދި އެނދުއަށީގެ ފޮތިތައް ފަހައި، ތަން ޒީނަތްތެރިކޮށް ފުރިހަމަކުރުމުގެ މަސައްކަތްވެސް، ލަޠީފާ މުޙައްމަދު އިސްނަންގަވައިގެން ކުރައްވައިފައި ވެއެވެ.
ލަޠީފާ މުޙައްމަދަކީ، އޮފީހުގައި ދިމާވާ މައްސަލަތަކާއި އަދި ޚާއްޞަކޮށް، އަންހެން މުވައްޒަފުންނަށް ދިމާވާ އެކިއެކި މައްސަލަތައް ހައްލުކުރެއްވުމަށް އިސްނަންގަވައިގެން، ޢަމަލީގޮތުން މަސައްކަތް ކުރައްވާ ނަމޫނާ މުވައްޒަފެކެވެ. އަދި، އޮފީހުގެ ފައިސާގެ ކަންކަން، އުސޫލުތަކާ އެއްގޮތަށް ބަލަހައްޓަވަމުން ގެންދަވާ މުވައްޒަފެއްކަންވެސް ފާހަގަކޮށްލަން ޖެހެއެވެ.
