އަލްފާޟިލާ އާމިނަތު ސަޢާދާ
އާމިނަތު ސަޢާދާ، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 8 ޑިސެންބަރު 1987 ގައި، އަރިއަތޮޅު އަތޮޅުއޮފީހުގެ ކާތިބާއެއްގެ ވަޒީފާއިންނެވެ. އޭގެފަހުން، އަރިއަތޮޅު އަތޮޅުއޮފީހުގެ ސީނިއަރ ކުލާކް ކަމާއި، އަރިއަތޮޅު ދެކުނުބުރީ އަތޮޅުއޮފީހުގެ ސީނިއަރ ކުލާކް ކަމާއި، އެސިސްޓެންޓް ސެކްރެޓެރީ ކަމާއި، ސެކްރެޓެރީ ކަމުގެ ވަޒީފާ އަދާކުރެއްވިއެވެ. މީގެއިތުރުން، އަރިއަތޮޅު ދެކުނުބުރީ އަތޮޅު ކައުންސިލްގެ އިދާރާގެ އެސިސްޓެންޓް އިކޮނޮމިކް ޑިވެލޮޕްމަންޓް އޮފިސަރުކަންވެސް ކުރެއްވިއެވެ. މިހާރު ހުންނެވީ، އެސިސްޓެންޓް ކައުންސިލް އޮފިސަރުގެ މަގާމުގައެވެ.
މި ވޭތުވެދިޔަ 36 އަހަރަށްވުރެ ދިގު މުއްދަތުގައި، އާމިނަތު ސަޢާދާ، ޚިދުމަތް ކުރެއްވިއިރު، އަތޮޅުއޮފީހުގައި ތަފާތު އެކި މަސައްކަތްތައް ކުރައްވައިފައި ވެއެވެ. މިގޮތުން، ވޯކީޓޯކީންނާއި، ރޭޑިއޯ ޓެލެފޯނު ސެޓުން މެސެޖު ފޮނުއްވުމާއި، އަތުން ލިޔުއްވައިގެން، ސިޓީތަކާއި މެސެޖުތައް ފޮނުއްވުމާއި، ސަރުކާރުގެ އެކި އިދާރާތަކަށް ފޮނުވަންޖެހޭ ރިޕޯޓުތައް، އަތުން ލިޔުއްވައިގެން ފޮނުއްވުން ހިމެނެއެވެ. ޓައިޕްރައިޓަރު ތަޢާރުފުވުމާއެކުގައި، އެފަދަ ލިޔުންތައް ލިޔުއްވަމުން ގެންދެވީ، ޓައިޕްރައިޓަރުންނެވެ. އެއިރެއްގައި މަސައްކަތް ކުރަން ލިބޭ ވަސީލަތްތައް ބޭނުންކުރައްވައިގެން، އެ އަންނަ ބަދަލުތަކާ އެއްގޮތަށް އަދި ގަވާއިދުތަކާއި އުސޫލުތަކާ އެއްގޮތަށް، އާމިނަތު ސަޢާދާ މަސައްކަތް ކުރައްވަމުން ގެންދެވިއެވެ. އޭރު، އަތޮޅުއޮފީހުގެ ހުރިހާ ސެކްޝަނެއްގައި، ސަޢާދާ މަސައްކަތް ކުރެއްވިއެވެ.
އާމިނަތު ސަޢާދާ، އިދާރީގޮތުން ކުރެއްވި އަދި މިހާރުވެސް ކުރައްވަމުން ގެންދަވާ އެހެން މަސައްކަތްތަކުގެ ތެރޭގައި، ދިރިއުޅުމަށް ގޯތި ދޫކުރުމާއި، އެހެނިހެން ބޭނުންތަކަށް ބިން ދޫކުރުމާއި، ބިން ކުއްޔަށް ދިނުމާ ގުޅޭގޮތުން ކުރަންޖެހޭ އިދާރީ ކަންކަން ކުރެއްވުމާއި، އެފަދަ ކަންކަމާ ގުޅިގެން ހުށަހެޅޭ މައްސަލަތަކަށް ޖަވާބު ދެއްވުމާއި، އެކަންކަމުގެ ރެކޯޑުތައް ބެލެހެއްޓެވުން ހިމެނެއެވެ. އަދި، ކައުންސިލުން ފާސްކުރާ ނިންމުންތައް ތަންފީޒު ކުރުމުގައި ފުރިހަމައަށް އެއްބާރުލުން ދެއްވައި، އެ ނިންމުންތައް ތަންފީޒު ކުރުމުގައި، އިދާރީގޮތުން ކުރައްވަންޖެހޭ އެންމެހައި ކަންކަން، ވެރިންނާއި، ސެކްރެޓެރީ ޖެނެރަލް ނުވަތަ ސުޕަވައިޒަރުންގެ ލަފަޔާއި އިރުޝާދުގެ ދަށުން ކުރައްވަމުން ގެންދަވައެވެ. މީގެއިތުރުން، ގެސްޓްހައުސް ފަދަ ތަންތަން ޗެކް ކުރެއްވުމާއި، އިޤުތިޞާދީ އަދި އިޖުތިމާއީ ބޭނުންތަކަށް ކައުންސިލުގެ ނަމުގައި ފަޅުރަށްރަށާއި، ފަޅާއި، ފަރުފަދަ ތަންތަނާއި، ބިންބިމާއި، އެފަދަ ތަންތަން ކައުންސިލްގެ ނަމުގައި މިލްކު ކުރުމާ ބެހޭގޮތުން އިދާރީގޮތުން ކުރައްވަންޖެހޭ ކަންކަންވެސް އާމިނަތު ސަޢާދާ ކުރައްވަމުން ގެންދަވައެވެ. މީގެއިތުރަށް، ކައުންސިލްގެ އެކްޓިވިޓީ ކަލަންޑަރުގައި ހިމެނޭ ކަންތައްތަކުގެ ތެރެއިން ސަޢާދާއާ ހަވާލުކުރައްވާ ކަންކަމާއި، އެކިއެކި މުނާސަބަތުތަކާ ގުޅިގެން، ކައުންސިލުން ބާއްވަވާ ޙަފުލާތަކުގައްޔާއި، މިނޫންވެސް މުހިންމު ކަންކަމުގައި ޢަމަލީގޮތުން ބައިވެރިވެވަޑައިގެން، އެ ހަވާލުކުރައްވާ މަސައްކަތެއް ފަރުވާތެރިކަމާއެކުގައި ވަގުތަށް ނިންމަވައެވެ.
އާމިނަތު ސަޢާދާ ކުރައްވާ މަސައްކަތްތަކުގެ ތެރެއިން އެންމެ ބޮޑަށް ފާހަގަކޮށްލެވެނީ، އަތޮޅުއޮފީހުގައި ހުރި ލިޔުންތަކުގެ ތެރެއިން، ގޯތިގެދޮރާއި، ބިންބިމާ ގުޅުންހުރި ގިނަ ދުވަސްވީ ލިޔުންތައް ރައްކާތެރިކަމާ އެކުގައި ބަލަހައްޓަވައި، ބޭނުންވާ ލިޔުންތައް ހޯއްދަވައި ދެއްވުމުގައި ކުރައްވަމުން ގެންދަވާ މަސައްކަތްތަކެވެ.
ސަރުކާރުގެ ވަޒީފާއަށް ބަދަލުވެވަޑައިގަތުމުގެ ކުރިން، އާމިނަތު ސަޢާދާއަކީ، އަތޮޅު ރައްޔިތުންގެ ވަޒީފާގައި 3 އަހަރަށްވުރެ ގިނަ ދުވަހު ޚިދުމަތް ކުރައްވައިފައިވާ ބޭފުޅެކެވެ. އަދި މެދުނުކެނޑި އެއް މުއައްސަސާއެއްގައި ތެދުވެރިކަމާއި އަމާނާތްތެރިކަމާއެކު، އެ މުއައްސަސާގެ ކުރިއެރުމަށް މަސައްކަތް ކުރައްވައިފައިވާ ބޭފުޅެކެވެ.
މީގެއިތުރަށް، އާމިނަތު ސަޢާދާއަކީ، އިޖުތިމާއީ ގޮތުން އަންހެނުން ބާރުވެރިކުރުވުމަށާއި، އަންހެނުންގެ ކުރިއެރުމަށް މަސައްކަތް ކުރައްވާ ބޭފުޅެކެވެ. މިގޮތުން، މަހިބަދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އެއް ދައުރުގެ ނައިބު ރައީސް ކަމާއި، ނިމުނު ދައުރުގެ ރައީސްކަން ސަޢާދާ ކުރައްވައިފައި ވެއެވެ. އާމިނަތު ސަޢާދާއަކީ، މިހާރު އަރިއަތޮޅު ދެކުނުބުރީ އަތޮޅު ކައުންސިލްގެ ވެށި ޖަމުޢިއްޔާގެ ނައިބު ރައީސްވެސް މެއެވެ.