ސާރޖަންޓް މޭޖަރ މުޙައްމަދު ޒިޔާދު
ސާރޖަންޓް މޭޖަރ މުޙައްމަދު ޒިޔާދު، ދިވެހި ދައުލަތަށް ޚިދުމަތް ކުރައްވަން ފުރަތަމަ ފެށްޓެވީ، 28 އެޕްރީލް 1987 ގައެވެ. ފުރަތަމަ އަދާކުރެއްވީ، ޑިޕާޓްމަންޓް އޮފް ޕޯސްޓް އެންޑް ޓެލެކޮމިއުނިކޭޝަންސާ ބެހޭ ބައިގެ ޕިޔޯނެއްގެ ވަޒީފާއެވެ. އޭގެފަހުން، އޯޑިޓް އޮފީހުގެ ކާތިބުކަންވެސް ކުރެއްވިއެވެ. 6 ޖުލައި 1988 ގައި އެ ވަޒީފާއިން ވަކިވެވަޑައިގަތުމަށްފަހު، އަލުން ޚިދުމަތް ފެށްޓެވީ، 17 ޖަނަވަރީ
1989 ގައި، ނޭޝަނަލް ސެކިއުރިޓީ ސަރވިސް ގައެވެ. ފުރަތަމަ ވަޒީފާ އަދާކުރައްވަން ފެށްޓެވީ، ޕްރައިވެޓެއްގެ ރޭންކުގައެވެ. އޭގެފަހުން، ލާންސް ކޯޕްރަލްގެ ރޭންކުގައްޔާއި، ކޯޕްރަލްގެ ރޭންކުގައްޔާއި، ސާރޖަންޓުގެ ރޭންކުގައްޔާއި، ސްޓާފް ސާރޖަންޓުގެ ރޭންކުގައްޔާއި، ސާރޖަންޓް ފަސްޓް ކްލާސްގެ ރޭންކުގައްޔާއި، ފަސްޓް ސާރޖަންޓުގެ ރޭންކުގައި ޚިދުމަތް ކުރައްވައިފައި ވެއެވެ. މުޙައްމަދު ޒިޔާދު މިހާރު ހުންނެވީ، ސާރޖަންޓް މޭޖަރގެ ރޭންކުގައެވެ.
ސާރޖަންޓް މޭޖަރ މުޙައްމަދު ޒިޔާދު، ސިފައިންގެ ޚިދުމަތުގައި ހޭދަކުރެއްވި ދިގު މުއްދަތުގައި، ތަފާތު ތަމްރީނުތައް ވަނީ ފުރިހަމަކުރައްވައިފައެވެ. އޭގެތެރޭގައި، ބޭސިކް ޓްރޭނިންގ ކޯހާއި، ސްޕެޝަލް ޓާސްކްފޯސް ކޯހާއި، އެން.ސީ.އޯ. ކޭޑަރ ކޯހާއި، ފިޒިކަލް ޓްރޭނިންގ އިންސްޓްރަކްޓަރ ކޯހާއި، ޑްރިލް އިންސްޓްރަކްޓަރ ކޯސް ހިމެނެއެވެ. މީގެއިތުރުން، އެމް.އެން.ޑީ.އެފް.ގެ އެން.ސީ.އޯ. އެކެޑަމީގައި ހިންގާ އެކިއެކި ތަމްރީނުތައްވެސް ފުރިހަމަކުރައްވައިފައި ވެއެވެ.
ސާރޖަންޓް މޭޖަރ މުޙައްމަދު ޒިޔާދަކީ، ސިފައިން ތަމްރީނު ކުރެއްވުމުގައި ފާހަގަކޮށްލެވޭ ކުޅަދާނަ ބޭފުޅެކެވެ. ސިފައިން ތަމްރީނު ކުރެއްވުމުގެ މަސައްކަތުގެ ތެރޭގައި، ސިފައިންގެ ޚިދުމަތާ އަލަށް ގުޅޭ ސިފައިން ތަމްރީނު ކުރުމުގެ ގިނަ ޕުރޮގުރާމުތަކެއްގައި ބައިވެރިވެވަޑައިގެންފައި ވެއެވެ. މީގެއިތުރުން، އެމް.އެން.ޑީ.އެފް. އެން.ސީ.އޯ. އެކެޑަމީގައި ހިންގާ ހުރިހާ ކޯސްތަކެއްގައި ކިޔަވައި ދެއްވައިފައި ވެއެވެ.
2010ވަނަ އަހަރު ޢަސްކަރީ ފުލުހުން އުފެދިގެން ދިޔުމާއެކުގައި، ޢަސްކަރީ ފުލުހުން ތަމްރީނުކުރުމަށް އެމް.އެން.ޑީ.އެފް. ގައި ހިންގުނު ގިނަ ކޯސްތަކެއްގައި މުޙައްމަދު ޒިޔާދު ކިޔަވައި ދެއްވައި، އެ ކޯސްތައް ހިންގުމުގައި، މުދައްރިބެއްގެ ދައުރު ވަރަށް ފުރިހަމައަށް އަދާކުރައްވައިފައި ވެއެވެ.
ސާރޖަންޓް މޭޖަރ މުޙައްމަދު ޒިޔާދަށް ޝަރަފުގެ ނިޝާނުގެ ގޮތުގައި، 11 ކުލައާއި، 8 މެޑެލް ލިބިވަޑައިގެންފައި ވެއެވެ. ލިބިވަޑައިގެންފައިވާ ކުލަތަކުގެ ތެރޭގައި، ރައީސުލްޖުމްހޫރިއްޔާގެ ކުލަ، ޚާއްޞަ ޚިދުމަތުގެ ކުލަ، އަމާޒަށް ބަޑިޖެހުމުގެ ކުލަ ދެފަހަރު، ހުނަރުވެރިކަމުގެ ކުލަ، ދިގު މުއްދަތެއްގައި ޚިދުމަތް ކުރުމުގެ ކުލަ، އިޚުލާޞްތެރި ޚިދުމަތުގެ ކުލަ، ސިފައިންގެ ޚިދުމަތުގެ ކުލަ ހިމެނެއެވެ. އަދި، އަޚުލާޤީ ކުލަ ތިންފަހަރު ލިބިވަޑައިގެންފައި ވެއެވެ. ލިބިވަޑައިގެންފައިވާ މެޑެލްތަކުގެ ތެރޭގައި، ދިގު މުއްދަތެއްގައި ޚިދުމަތް ކުރުމުގެ މެޑެލް، އިޚުލާޞްތެރި ޚިދުމަތުގެ މެޑެލް، ސިފައިންގެ ޚިދުމަތުގެ މެޑެލް، އަޚުލާޤީ މެޑެލް، ސައްތައިގެ މެޑެލް، 17ވަނަ ސާރކް ސަމިޓްގެ މެޑެލް، ޖުމްހޫރީ 50ގެ މެޑެލް އަދި މިނިވަން 50ގެ މެޑެލް ހިމެނެއެވެ.
ސާރޖަންޓް މޭޖަރ މުޙައްމަދު ޒިޔާދު، ދައުލަތަށް ޚިދުމަތް ކުރައްވަމުން ގެންދަވާތާ 36 އަހަރަށްވުރެ ގިނަ ދުވަސް ވެއްޖެއެވެ. މީގެތެރެއިން 35 އަހަރަށްވުރެ ގިނަދުވަހު ޚިދުމަތް ކުރެއްވީ، އެން.އެސް.އެސް.ގައެވެ.
