އަލްފާޟިލް ޢަބްދުއްސަލާމް ޔޫސުފް
ޢަބްދުއްސަލާމް ޔޫސުފް، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 22 އޮކްޓޫބަރު 1987 ގައި، ސިވިލްއޭވިއޭޝަން އޮތޯރިޓީގެ އިލެކްޓްރިކަލް އިންޖިނިއަރިންގ (ޓްރޭނީ)ގެ މަގާމުންނެވެ. އޭގެފަހުން، މޯލްޑިވްސް އެއަރޕޯޓްސް އޮތޯރިޓީގެ އިންޖިނިއަރ (ޓްރޭނީ)ގެ މަގާމާއި، އެސިސްޓެންޓް އިންޖިނިއަރގެ މަގާމާއި، ސީނިއަރ މެކޭނިކް ގްރޭޑް 2ގެ މަގާމާއި، އެސިސްޓެންޓް މެކޭނިކަލް އިންޖިނިއަރގެ މަގާމާއި، މޯލްޑިވްސް އެއަރޕޯޓްސް ކޮމްޕެނީގެ އެސިސްޓެންޓް މެކޭނިކަލް އިންޖިނިއަރ ގްރޭޑް 2ގެ މަގާމާއި، މެކޭނިކަލް އިންޖިނިއަރ ގްރޭޑް 2ގެ މަގާމާއި، މެނޭޖަރުގެ މަގާމު އަދާކުރެއްވިއެވެ. ޢަބްދުއްސަލާމް މިހާރު ހުންނެވީ، އެސޯސިއޭޓް ޖެނެރަލް މެނޭޖަރު ކަމުގެ މަގާމުގައެވެ.
ޢަބްދުއްސަލާމް ޔޫސުފަކީ، ހަވާލުކުރެވޭ މަސައްކަތްތައް ވަރަށް ފަރުވާތެރިކަމާއެކުގައި ކުރައްވާ ބޭފުޅެކެވެ. އަދި، އެއަރޕޯޓުގައި ދިމާވާ ކަރަންޓާ ބެހޭ މައްސަލަތައް، ވީ އެންމެ އަވަހަކަށް ހައްލުކުރެއްވުމަށް ވަރަށް ބޮޑު އިސްކަމެއް ދެއްވަމުން ގެންދެވި ބޭފުޅެކެވެ. އެ ކުންފުނީގެ ވޯޓަރ ސަޕްލައި އެންޑް ސުވަރޭޖް ސެކްޝަންގެ އިސް ބޭފުޅެއްގެ ގޮތުގައި، ފަސް އަހަރެއްހައި ދުވަހު ޚިދުމަތް ކުރައްވައިފައި ވެއެވެ. އަދި، ވޯޓަރ ސަޕްލައިގެ އާ ފެސިލިޓީއެއް އުފެއްދުމުގައްޔާއި، އެ ތަނުގެ ޚިދުމަތް މުޅި ހުޅުލެއަށް ފޯރުކޮށްދެއްވުމުގައިވެސް މުހިންމު ދައުރެއް އަދާކުރެއްވިއެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގެ އިންޖީނުތަކުގެ މެކޭނިކަލް ޕްރިވެންޓިވް އަދި ރޫޓިންގ މެއިންޓެނަންސާ ބެހޭ ކަންތައްތައް ބެލެހެއްޓެވުމުގެ އިތުރަށް، މި ރޮނގުން ލިބިވަޑައިގެންފައިވާ ތަޢުލީމާއި ތަޖުރިބާގެ އަލީގައި، އެހެން މުވައްޒަފުންނަށް މަސައްކަތް ދަސްކޮށްދެއްވައި، ތަމްރީނު ކޮށްދެއްވުމަކީވެސް ޢަބްދުއްސަލާމް ޔޫސުފް ކުރެއްވި ވަރަށް މުހިންމު މަސައްކަތެކެވެ. ވޭތުވެދިޔަ ދިގު މުއްދަތުގެ ތެރޭގައި، އެއަރޕޯޓުގެ ޕަވަރހައުސްގައި ގިނަ ދުވަސްތަކެއް ވަންދެން ޚިދުމަތް ކުރެއްވުމަށްފަހު، ޔޫޓިލިޓީ ސެކްޝަނަށް ޢަބްދުއްސަލާމް ޔޫސުފް ބަދަލުވެވަޑައިގެން، ވޯޓަރ ސަޕްލައި އެންޑް ސުވަރޭޖްގެ ކަންކަން ހިންގަވައި ބަލަހައްޓަވައިފައިވެސް ވެއެވެ.
ޢަބްދުއްސަލާމް ޔޫސުފް، މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގައި ޚިދުމަތް ކުރައްވަމުން ގެންދަވާތާ މިހާރު 36 އަހަރަށްވުރެ ދިގު މުއްދަތެއް ވެއްޖެއެވެ.