އަލްފާޟިލް ޢަބްދުއްސައްތާރު ޢަބްދުﷲ
ޢަބްދުއްސައްތާރު ޢަބްދުﷲ، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 23 މާރިޗު 1987 ގައި، ސިވިލްއޭވިއޭޝަން އޮތޯރިޓީގެ ލޭބަރެއްގެ ވަޒީފާއިންނެވެ. އޭގެފަހުން، މޯލްޑިވްސް އެއަރޕޯޓްސް އޮތޯރިޓީގެ ފޯމަން ގްރޭޑް 1ގެ މަގާމާއި، ސީނިއަރ ފޯމަންގެ މަގާމާއި، މޯލްޑިވްސް އެއަރޕޯޓްސް ކޮމްޕެނީގެ ސުޕަވައިޒަރ ގްރޭޑް 2ގެ މަގާމާއި، ސުޕަވައިޒަރ ގްރޭޑް 3ގެ މަގާމު އަދާކުރައްވައިފައި ވެއެވެ.ޢަބްދުއްސައްތާރު މިހާރު ހުންނެވީ، ސީނިއަރ ސުޕަވައިޒަރުގެ މަގާމުގައެވެ.
ޢަބްދުއްސައްތާރު ޢަބްދުﷲ ފާހަގަވެފައި ވަނީ، ހަވާލުކުރެވޭ ކޮންމެ މަސައްކަތެއްވެސް ގަޑިއަށް ނިންމުމަށްޓަކައި ފަރުވާތެރިކަމާ އެކުގައި މަސައްކަތް ކުރައްވާ، ނަމޫނާ މުވައްޒަފެއްގެ ގޮތުގައެވެ. ޢަބްދުއްސައްތާރު، އާންމު ގޮތެއްގައި ކުރައްވަމުން ގެންދަވަނީ، އެއަރޕޯޓަށް ބޭނުންވާ މުދާ، ބާޒާރުން ގަނެގެން، އެ ތަކެތި އެއަރޕޯޓަށް ގެންދަވައި ރައްކާކޮށް ބެލެހެއްޓެވުމުގެ މަސައްކަތެވެ. ބައެއް ދުވަސްވަރު އަމިއްލަފުޅަށްވެސް އެ މަސައްކަތް ކުރެއްވިއެވެ. އަދި މާލޭގެ ބާޒާރުން މުދާ ގަންނަ ޓީމުގެ ސުޕަވައިޒަރެއްގެ މަސްއޫލިއްޔަތު، ގިނަ ދުވަސްތަކެއް ވަންދެން ޢަބްދުއްސައްތާރު އަދާކުރައްވައިފައި ވެއެވެ. ސުޕަވައިޒަރެއްގެ ހައިސިއްޔަތުން، މުވައްޒަފުން ދުވަހުން ދުވަހަށް ކުރުވަންޖެހޭ މަސައްކަތް ކުރުވުމުގެ މަސްއޫލިއްޔަތުވެސް ޢަބްދުއްސައްތާރު ވަނީ އަދާކުރައްވައިފައެވެ. ހަމައެހެންމެ، މަސައްކަތުގައި ހާސިލުކުރަންޖެހޭ ލަނޑުދަނޑި ހާސިލުކުރުމަށް ޢަބްދުއްސައްތާރު ޢަބްދުﷲ، ޚާއްޞަ ސަމާލުކަމެއް ދެއްވަމުން ގެންދަވައެވެ. އަދި މަގާމުގެ މަސްއޫލިއްޔަތު، ޤާބިލުކަމާއި، ފަރުވާތެރިކަމާއި، އިޚުލާޞްތެރިކަމާ އެކުގައި އަދާކުރައްވަމުން ގެންދަވައެވެ.
ޢަބްދުއްސައްތާރު ޢަބްދުﷲއަކީ، އެކަށީގެންވާ ވަސީލަތްތައް ނެތް ދުވަސްވަރުގައިވެސް، މޯލްޑިވްސް އެއަރޕޯޓްސް ކޮމްޕެނީގެ އިންވެންޓްރީ މެނޭޖްމަންޓް ސުޕަވައިޒަރުގެ ހައިސިއްޔަތުން ވަރަށް ފުރިހަމައަށް މަސްއޫލިއްޔަތު އަދާކުރައްވައިފައިވާ އަދި ކުންފުނީގެ ކުރިއެރުމުގައި މުހިންމު ދައުރެއް އަދާކުރައްވައިފައިވާ ބޭފުޅެކެވެ.
ޢަބްދުއްސައްތާރު ޢަބްދުﷲއަކީ، ކުންފުނިން ހިންގާ ހުރިހާ މަސައްކަތްތަކެއްގައިވެސް ޢަމަލީގޮތުން ބައިވެރިވެވަޑައިގެން، އެއްބާރުލުން ދެއްވަމުން ގެންދަވާ ބޭފުޅެއްވެސް މެއެވެ. ޚާއްޞަކޮށް، މިނިވަންދުވަހުގެ މުނާސަބަތާ ގުޅިގެން، ކުންފުނިން ތައްޔާރުކުރާ ފުލޯޓުތަކުގެ މަސައްކަތްތަކުގައި ޢަމަލީގޮތުން ބައިވެރިވެވަޑައިގެން، ވަރަށް ހީވާގިކަމާއެކުގައި މަސައްކަތް ކުރައްވައިފައިވާކަން ފާހަގަކޮށްލަން ޖެހެއެވެ.
ޢަބްދުއްސައްތާރު ޢަބްދުﷲ ވަނީ، 37 އަހަރަށްވުރެ ގިނަ ދުވަހު ދައުލަތަށް ޚިދުމަތް ކުރައްވައިފައެވެ.