އަލްފާޟިލް އަޙްމަދުމަނިކު
އަޙްމަދުމަނިކު، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 26 ޑިސެންބަރު 1979 ގައެވެ. ފުރަތަމަ އަދާކުރެއްވީ، ގަވަރންމަންޓް ހޮސްޕިޓަލުގެ 2 ނަންބަރު ކާތިބު ކަމެވެ. އޭގެފަހުން، އެ ހޮސްޕިޓަލުގެ ކޭޝިއަރުކަންވެސް ކުރެއްވިއެވެ. 23 ފެބުރުވަރީ 1981 ގައި
އެން.އެސް.އެސް.ގެ ވަޒީފާއާ އަޙްމަދުމަނިކު ގުޅިވަޑައިގަތެވެ. ޕްރައިވެޓެއްގެ ރޭންކުގައި 8 އަހަރެއްހާ ދުވަހު އެން.އެސް.އެސް.ގައި ޚިދުމަތް ކުރެއްވުމަށްފަހު، އެ މަގާމުން ވަކިވެވަޑައިގަތެވެ. އޭގެފަހުން، ގަލޮޅު އަވަށު އޮފީހުގެ ސުޕަވައިޒަރެއްގެ މަގާމާއި، ނާކޮޓިކްސް ކޮންޓްރޯލް ބޯޑުގެ ސުޕަވައިޒަރެއްގެ މަގާމާއި، އެކިފަހަރު މަތިން ދިވެހިރާއްޖޭގެ އަޑުގެ ޑިއުޓީ އޮފިސަރެއްގެ މަގާމު އަދާކުރައްވައިފައި ވެއެވެ.
އަޙްމަދުމަނިކު މިހާރު ޚިދުމަތް ކުރައްވަމުން ގެންދަވަނީ، ޕަބްލިކް ސަރވިސް މީޑިއާގައެވެ. އެ ކުންފުނީގައި އަދާކުރެއްވި މަގާމުތަކުގެ ތެރޭގައި، ލޮޖިސްޓިކް އެސިސްޓެންޓް ކަމާއި، ލޮޖިސްޓިކް އޮފިސަރު ކަމާއި، ޓެކްނިކަލް އިކުއިޕްމަންޓް ޑިސްޕެޗް އޮފިސަރުކަން ހިމެނެއެވެ.
އަޙްމަދުމަނިކު، ގަވަރންމަންޓް ހޮސްޕިޓަލުގައި ވަޒީފާ އަދާކުރެއްވިއިރު، ބަލިމީހުންގެ ފޯމު ހެއްދެވުމާއި، ބިލުތައް ހެއްދެވުމާއި، ފައިސާ ބަލައިގަތުމުގެ މަސައްކަތް ކުރައްވައިފައި ވެއެވެ. އެން.އެސް.އެސް.ގެ ޕްރައިވެޓެއްގެ ރޭންކުގައި ވަޒީފާ އަދާކުރެއްވިއިރު، ޑިއުޓީ ފޯރިމެރުމާއި، ގިރިފުށީގައި ތަފާތު މަސައްކަތްތައް ކުރެއްވިއެވެ. އަޙްމަދުމަނިކު ވަނީ، 3 ނޮވެންބަރު 1988 ގައި ރާއްޖެއާ ކުރިމަތިވި ނުރައްކާތެރި ހާދިސާގައި، ސިފައިންގޭގެ ޑިއުޓީގައި ހުންނަވައިގެން، އެ ހާދިސާ ނިމެންދެން، ހިތްވަރާއި ޢަޒުމާ އެކުގައި ޚިދުމަތް ކުރައްވައިފައެވެ. އަދި، ގަލޮޅު އަވަށު އޮފީހުގެ ސުޕަވައިޒަރެއްގެ ގޮތުގައި ހުންނަވައިގެން، އެ އޮފީހުގެ އެކިއެކި ކަންކަން ހިންގަވައި ބެލެހެއްޓެވިއެވެ. އަދި ނާކޮޓިކްސް ކޮންޓްރޯލް ބޯޑުގައި ޚިދުމަތް ކުރެއްވިއިރު، މަސްތުވާތަކެތީގެ މައްސަލަތަކުގައި ފަރުވާދީ، ދޫކޮށްލައިފައި ތިބޭ މީހުންގެ ކަންކަން ބެލެހެއްޓެވުމާއި، އެ މީހުންގެ ބަޔާން ނެންގެވުން ފަދަ މަސައްކަތްތައްވެސް ފަރުވާތެރިކަމާ އެކުގައި ކުރައްވައިފައި ވެއެވެ.
ދިވެހިރާއްޖޭގެ އަޑާއި، އެމް.އެން.ބީ.ސީ. އާއި، އެމް.ބީ.ސީ. އާއި، އަދި ޕަބްލިކް ސަރވިސް މީޑިއާގައި އަޙްމަދުމަނިކު ކުރައްވައިފައިވާ މަސައްކަތްތަކުގެ ތެރޭގައި، ޑިއުޓީތަކަށް އަންނަ މުވައްޒަފުންގެ ހާޒިރީ ބެލެހެއްޓެވުމާއި، އެކިއެކި ބޭނުންތަކަށް ކުރަންޖެހޭ ދަތުރުތައް ކުރުވުމާއި، ދަންވަރު ޑިއުޓީތަކުގައި، އެކި ޑިޕާޓްމަންޓުތައް މޮނިޓަރ ކުރުވުމާއި، ޑިއުޓީ ގަޑީގައި ދިމާވާ ހާދިސާތައް ލިޔުއްވުމާއި، ދިދަ ނަގައި ތިރިކުރުން ފަދަ މަސައްކަތްތައް ހިމެނެއެވެ.
އަޙްމަދުމަނިކު، ދިވެހި ދައުލަތަށް ޚިދުމަތް ކުރައްވަމުން ގެންދަވާތާ މިހާރު 37 އަހަރަށްވުރެ ދިގު މުއްދަތެއް ވެއްޖެއެވެ.