އަލްފާޟިލް އަޙްމަދު ޖަލީލު
އަޙްމަދު ޖަލީލު، ދިވެހި ދައުލަތަށް ޚިދުމަތް ކުރައްވަން ފެށްޓެވީ، މޯލްޑިވްސް އެއަރޕޯޓްސް އޮތޯރިޓީގެ އޮޕަރޭޝަންސް އޮފިސަރ (ޓްރޭނީ)ގެ ވަޒީފާއިން 29 ޖަނަވަރީ 1985 ގައެވެ. އޭގެފަހުން، ސިވިލް އޭވިއޭޝަން އޮތޯރިޓީގެ އޮޕަރޭޝަންސް އޮފިސަރ (ޓްރޭނީ)ގެ މަގާމާއި، އޮޕަރޭޝަންސް އޮފިސަރ ގްރޭޑް 2ގެ މަގާމާއި، މޯލްޑިވްސް އެއަރޕޯޓްސް އޮތޯރިޓީގެ އޮޕަރޭޝަންސް އޮފިސަރ ގްރޭޑް 2ގެ މަގާމާއި، ގްރޭޑް 3ގެ މަގާމާއި، ގްރޭޑް 4ގެ މަގާމާއި، މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގެ އޮޕަރޭޝަންސް އޮފިސަރ ގްރޭޑް 4ގެ މަގާމާއި، ސީނިއަރ ވެލްފެއަރ އޮފިސަރުގެ މަގާމާއި، އެސިސްޓެންޓް މެނޭޖަރުގެ މަގާމާއި، އެޑްމިނިސްޓްރޭޓިވް ސަރވިސަސް ކޯޑިނޭޓަރު ކަމުގެ މަގާމު އަދާކުރައްވައިފައި ވެއެވެ. އަޙްމަދު ޖަލީލު މިހާރު ހުންނެވީ، މެނޭޖަރު ކަމުގެ މަގާމުގައެވެ.
އަޙްމަދު ޖަލީލަކީ، ކުންފުނީގެ އެކިއެކި ސެކްޝަންތަކުގައި މަސައްކަތް ކުރައްވައިފައިވާ ބޭފުޅެކެވެ. އަޙްމަދު ޖަލީލު ފުރަތަމަ މަސައްކަތް ކުރެއްވީ، ގްރައުންޑް ހޭންޑްލިންގގައެވެ. އެ މަސައްކަތްތަކުގެ ތެރޭގައި، މަތިންދާބޯޓަށް އަރައި ފައިބާ ސިޑި ގެންގޮސް ގެނައުމާއި، ބޯޓަށް މުދާ އަރުވައި ބޭލުމާއި، މަތިންދާބޯޓުގެ އެތެރެ ސާފުކޮށް ބެލެހެއްޓެވުމުގެ މަސައްކަތް ހިމެނެއެވެ. މި މަސައްކަތްތަކަކީ، ބޯޓު އައުމާ ފުރުމާ ދެމެދުގައި ލިބޭ ވަރަށް ކުޑަ ވަގުތުކޮޅެއްގެ ތެރޭގައި، ވަރަށް ފަރުވާތެރިކަމާ އެކުގައި ކުރަންޖެހޭ މަސައްކަތްތަކެވެ. ފުލައިޓުތައް ގިނަވާ ދުވަސް ދުވަހު، މީހުން މަދުވުމުގެ ސަބަބުން، އަމިއްލަފުޅަށްވެސް އެ މަސައްކަތްތައް ކުރައްވައި، ގިނަ ވަގުތު އުޅުއްވަން ޖެހިވަޑައިގަތެވެ.
އަޙްމަދު ޖަލީލު، މިހާރު ލޯންޑްރީ ސަރވިސްގައި މަސައްކަތް ކުރައްވަމުން ގެންދަވާއިރު، ލޯންޑްރީއަށް ބޭނުންވާ ހުރިހާ ތަކެއްޗެއް ހޯއްދެވުމާއި، ކުންފުނީގެ މުވައްޒަފުންނަށް ލޯންޑްރީން ދޭ ޚިދުމަތްތައް، ވީހާވެސް ފުރިހަމައަކަށް ދެއްވަމުން ގެންދަވާކަން ފާހަގަކޮށްލަން ޖެހެއެވެ. އަދި، އަޙްމަދު ޖަލީލަކީ، ލޯންޑްރީގެ ކަންކަން ރަނގަޅު ކުރެއްވުމަށްވެސް ހީވާގިކަމާއެކުގައި މަސައްކަތް ކުރައްވާ ބޭފުޅެއްވެސް މެއެވެ. މިގޮތުން، ލޯންޑްރީ ސަރވިސްއަށް ބޭނުންވާ ޒަމާނީ އާލާތްތައް ހޯއްދަވައި، ފެންވަރު ރަނގަޅު ކުރެއްވުމަށް ޢަމަލީގޮތުން އިސް ދައުރެއް އަދާކުރައްވައިފައި ވެއެވެ. އަޙްމަދު ޖަލީލަކީ، ކުންފުނިން ހިންގާ ހުރިހާ މަސައްކަތްތަކެއްގައްޔާއި، ކުޅިވަރު ހަރަކާތްތަކުގައި ޢަމަލީގޮތުން ބައިވެރިވެވަޑައިގެން، އެއްބާރުލުން ދެއްވަމުން ގެންދަވާ ބޭފުޅެކެވެ.
އަޙްމަދު ޖަލީލް، ކުންފުންޏަށް ޚިދުމަތް ކުރައްވަމުން ގެންދަވާތާ މިހާރު 37 އަހަރަށްވުރެ ދިގު މުއްދަތެއް ވެއްޖެއެވެ.