އަލްފާޟިލް އިބްރާހީމް ޚާލިދު
އިބްރާހީމް ޚާލިދު، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 6 އޮކްޓޫބަރު 1979 ގައި، އެއަރޕޯޓް އޮފީހުގެ އެއަރ ޓްރެފިކް ކޮންޓްރޯލަރުގެ ވަޒީފާއިންނެވެ. އޭގެފަހުން، މޯލްޑިވްސް އެއަރޕޯޓްސް އޮތޯރިޓީގެ އެއަރ ޓްރެފިކް ކޮންޓްރޯލް އޮފިސަރުގެ މަގާމާއި، މޯލްޑިވްސް އެއަރޕޯޓްސް އޮތޯރިޓީއާއި، ސިވިލްއޭވިއޭޝަން އޮތޯރިޓީގެ އެއަރ ޓްރެފިކް ކޮންޓްރޯލް ސުޕަވައިޒަރުގެ މަގާމާއި، ސީނިއަރ އެއަރ ޓްރެފިކް ކޮންޓްރޯލް އޮފިސަރުގެ މަގާމާއި، ޗީފް އާރު.އޭ.ސީ./އެސް.އޭ.އާރު. އޮފިސަރުގެ މަގާމާއި، ޗީފް އެއަރ ޓްރެފިކް ކޮންޓްރޯލް އޮފިސަރުގެ މަގާމު އަދާކުރައްވައިފައި ވެއެވެ. 25 ޖަނަވަރީ 2001 ގައި ވަޒީފާއިން ވަކިވެވަޑައިގަތުމަށްފަހު، އަލުން އެއަރޕޯޓުގެ ޚިދުމަތާ ގުޅިވަޑައިގަތީ، 3 ފެބުރުވަރީ 2008 ގައެވެ. އޭރު ހަމަޖެއްސެވީ، ޗީފް އެއަރ ޓްރެފިކް މެނޭޖްމަންޓް އޮފިސަރު ކަމުގެ މަގާމަށެވެ. އޭގެފަހުން، ފްލައިޓް ޕްރޮސީޖަރ ޑިޒައިނަރުގެ މަގާމާއި، ހެޑް އޮފް ސޭފްޓީ އެންޑް ސްޓޭންޑަޑްސްގެ މަގާމާއި، ހެޑް އޮފް އޭ.ޓީ.އެސް.ގެ މަގާމު އަދާކުރައްވައިފައި ވެއެވެ. އިބްރާހީމް ޚާލިދު މިހާރު ހުންނެވީ، އެސޯސިއޭޓް ޖެނެރަލް މެނޭޖަރުގެ މަގާމުގައެވެ.
އިބްރާހީމް ޚާލިދަކީ، ދިވެހިރާއްޖޭގެ އެންމެ ފުރަތަމަ އެއިރޯނޯޓިކަލް އިންފޮމޭޝަން ޕަބްލިކޭޝަން ފަރުމާކުރައްވައި އެކުލަވައިލެއްވުމުގައި މުހިންމު ދައުރެއް އަދާކުރެއްވި ބޭފުޅެކެވެ. އިންޓަރނޭޝަނަލް ސިވިލްއޭވިއޭޝަން އޯގަނައިޒޭޝަންގެ ޕުރޮޖެކްޓެއްގެ ދަށުން (އޭޝިއާ ސަރަޙައްދުގެ) ޖީ.އެން.އެސް.އެސް. އެޕްރޯޗް ޕްރޮސީޖަރ ޑިޒައިން ކޮންސަލްޓަންޓެއްގެ ގޮތުންވެސް އިބްރާހީމް ޚާލިދު މަސައްކަތް ކުރައްވައިފައި ވެއެވެ. އަދި، ސްރީލަންކާގެ މައްޓަލަ ރާޖަޕަކްސަ އިންޓަރނޭޝަނަލް އެއަރޕޯޓުގައި، އިންސްޓްރުމަންޓް ފްލައިޓް ޕްރޮސީޖަރ އެކުލަވައިލުމުގައިވެސް އެހީތެރިކަން ފޯރުކޮށްދެއްވައި، އެކަމުގައިވެސް އިސް ދައުރެއް އަދާކުރައްވައިފައި ވެއެވެ.
ދިވެހިރާއްޖޭގެ އެންމެ ފުރަތަމަ އެއަރޓްރެފިކް ސޭފްޓީ މެނޭޖްމަންޓްގެ މެނުއަލެއް ތައްޔާރުކޮށް އެކުލަވައިލައްވައި، ދިވެހިރާއްޖޭގެ އެންމެ ފުރަތަމަ އެއިރޯނޯޓިކަލް ޗާޓް ކުރައްސަވައިފައި ވަނީ، އިބްރާހީމް ޚާލިދުކަން ޚާއްޞަގޮތެއްގައި ފާހަގަކޮށްލަންޖެހެއެވެ. މަދަނީ ވައިގެ ދަތުރުފަތުރުގައި، އެއިރޯނޯޓިކަލް ޗާޓް މިހާރުވެސް ބޭނުންކުރަމުން ގެންދެއެވެ.
އިބްރާހީމް ޚާލިދަކީ، އެއަރ ޓްރެފިކް ކޮންޓްރޯލް އޮފިސަރުން ތަމްރީނު ކުރެއްވުމަށާއި، ރާއްޖޭގެ މަދަނީ ވައިގެ ދަތުރުފަތުރުގެ ދާއިރާގެ ކުރިއެރުމަށާއި، މަދަނީ ވައިގެ ދަތުރުފަތުރުގެ ރައްކާތެރިކަން ކަށަވަރުކޮށްދީ، ހަރުދަނާ ކުރުމަށްޓަކައިވެސް ގިނަގުނަ މަސައްކަތްތަކެއް ކޮށްދެއްވައިފައިވާ ބޭފުޅެއްވެސް މެއެވެ.
އިބްރާހީމް ޚާލިދަކީ، މޯލްޑިވްސް އެއަރޕޯޓްސް ކޮމްޕެނީ ލިމިޓެޑުން ހިންގާ ހުރިހާ ކަންކަމެއްގައިވެސް އެއްބާރުލުން ދެއްވަމުން ގެންދަވާ ބޭފުޅެކެވެ. މިގޮތުން، ދިވެހިރާއްޖޭގައި، އެމް.އެން.ޑީ.އެފް.އާއި، ޔޫ.އެސް. ނޭވީން އެންމެ ފުރަތަމަ ހިންގި ޖޮއިންޓް ސަރޗް އެންޑް ރެސްކިއު ހަރަކާތް ހިންގެވުމުގައި، އެކްސަރސައިޒް ކޮންޓްރޯލަރެއްގެ ގޮތުން، އިބްރާހީމް ޚާލިދު ބައިވެރިވެވަޑައިގެންފައި ވެއެވެ.
އިބްރާހީމް ޚާލިދު، ދައުލަތަށް ޚިދުމަތް ކުރައްވަމުން ގެންދަވާތާ މިހާރު 37 އަހަރަށްވުރެ ދިގު މުއްދަތެއް ވެއްޖެއެވެ.
