އަލްފާޟިލް އިބްރާހީމް ސިރާޖް
އިބްރާހީމް ސިރާޖް، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 25 އޮގަސްޓު 1986 ގައެވެ. ފުރަތަމަ އަދާކުރެއްވީ، ސިވިލްއޭވިއޭޝަން އޮތޯރިޓީގެ އެސިސްޓެންޓް މެކޭނިކުގެ ވަޒީފާއެވެ. އޭގެފަހުން، މޯލްޑިވްސް އެއަރޕޯޓްސް އޮތޯރިޓީގެ މެކޭނިކް ގްރޭޑް 1ގެ މަގާމާއި، މެކޭނިކް ގްރޭޑް 2ގެ މަގާމާއި، މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގެ މެކޭނިކް ގްރޭޑް 2ގެ މަގާމާއި، މެކޭނިކް ގްރޭޑް 3ގެ މަގާމާއި، އެސޯސިއޭޓް އެގްޒެކެޓިވްގެ މަގާމާއި، ޓެކްނިކަލް އޮފިސަރުގެ މަގާމު އަދާކުރައްވައިފައި ވެއެވެ. އިބްރާހީމް ސިރާޖް މިހާރު ހުންނެވީ، ސީނިއަރ އޮފިސަރު ކަމުގެ މަގާމުގައެވެ.
އިބްރާހީމް ސިރާޖް ފާހަގަވެފައި ވަނީ، އެއަރޕޯޓް ޓަރމިނަލް ސަރވިސަސްގެ ޑިއުޓީގައި ހަވާލުކުރެވޭ ކޮންމެ މަސައްކަތެއްވެސް، އިރުޝާދާ އެއްގޮތަށް ފުރިހަމައަށް ނިންމެވުމަށް ޚާއްޞަ ސަމާލުކަމެއް ދެއްވާ ބޭފުޅެއްގެ ގޮތުގައެވެ. މިގޮތުން، ޓަރމިނަލް ފެސިލިޓީ މެނޭޖްމަންޓުގެ ތިން ޓަރމިނަލްގެ މަސައްކަތްތައް ބައްލަވައި، ފެސިލިޓީގައި ފުރިހަމަކުރަން ހުންނަ ކަންތައްތަކާއި، މައްސަލަތައް ހައްލުކުރުމުގައި، އިބްރާހީމް ސިރާޖް ވަރަށްބޮޑު އެއްބާރުލެއްވުމެއް ދެއްވަމުން ގެންދަވައެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގެ ކުރިއެރުމަށް އިބްރާހީމް ސިރާޖް ކޮށްދެއްވައިފައިވާ އެންމެ މުހިންމު އެއްކަމަކީ، އެއަރޕޯޓް ޓަރމިނަލް ސަރވިސަސްއާ އަލަށް ގުޅޭ މުވައްޒަފުން ތަމްރީނު ކުރެއްވުމުގެ މަސައްކަތެވެ. އަދި އެއަރޕޯޓް ޓަރމިނަލުގައި މަސައްކަތް ކުރާއިރު، ސަމާލުކަން ދޭންޖެހޭ ކަންތައްތަކާއި، އެއަރޕޯޓަށް އަންނަ ފަސިންޖަރުންނާ ގުޅޭގޮތުން ކަންކަން ކުރަންވީގޮތް، މުވައްޒަފުންނަށް އޮޅުންފިލުއްވައި ދެއްވަމުން ގެންދަވައެވެ. މީގެއިތުރުން، ކޯވިޑު19-ގެ ނުރައްކާތެރި ދުވަސްވަރު، ޓަރމިނަލްގެ ކަންތައްތައް ބެލެހެއްޓެވުމުގައި، އިބްރާހީމް ސިރާޖް އިސް ދައުރެއް އަދާކުރައްވައިފައި ވެއެވެ. އިބްރާހީމް ސިރާޖަކީ، ކުންފުނިން ހިންގާ ހުރިހާ މަސައްކަތެއްގައިވެސް ޢަމަލީގޮތުން ބައިވެރިވެވަޑައިގެން، އެއްބާރުލުން ދެއްވަމުން ގެންދަވާ ބޭފުޅެއްވެސް މެއެވެ. މިގޮތުން، އެއަރޕޯޓުގެ ކަނޑުތޮށިލުމުގެ މަސައްކަތް، ޚާއްޞަ ގޮތެއްގައި ފާހަގަކޮށްލަން ޖެހެއެވެ.
އިބްރާހީމް ސިރާޖް، ދިވެހި ދައުލަތަށް ޚިދުމަތް ކުރައްވަމުން ގެންދަވާތާ މިހާރު 37 އަހަރަށްވުރެ ދިގު މުއްދަތެއް ވެއްޖެއެވެ.