އަލްފާޟިލް މޫސާ ނަޞީރު
މޫސާ ނަޞީރު، ދިވެހި ދައުލަތަށް ޚިދުމަތް ފެށްޓެވީ، 5 އޮގަސްޓު 1986 ގައި، ސިވިލްއޭވިއޭޝަން އޮތޯރިޓީގެ މެކޭނިކެއްގެ ވަޒީފާއިންނެވެ. އޭގެފަހުން، މޯލްޑިވްސް އެއަރޕޯޓްސް އޮތޯރިޓީގެ ރެފްރިޖަރޭޝަން މެކޭނިކް ކަމާއި، ސީނިއަރ މެކޭނިކް ކަމާއި، ސީނިއަރ ރެފްރިޖަރޭޝަން ޓެކްނީޝަން ކަމާއި، އެސިސްޓެންޓް ރެފްރިޖަރޭޝަން އިންޖިނިއަރު ކަމާއި، މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގެ އެސިސްޓެންޓް ރެފްރިޖަރޭޝަން އިންޖިނިއަރު ކަމާއި، ރެފްރިޖަރޭޝަން އިންޖިނިއަރު ކަމާއި، އިންޖިނިއަރު ކަމާއި، އެސޯސިއޭޓް މެނޭޖަރު ކަމާއި، އެސޯސިއޭޓް އިންޖިނިއަރުކަން ކުރައްވައިފައި ވެއެވެ. މޫސާ ނަޞީރު މިހާރު ހުންނެވީ، ސީނިއަރ އެސޯސިއޭޓް އިންޖިނިއަރުގެ މަގާމުގައެވެ.
މި ވޭތުވެދިޔަ 37 އަހަރު ދުވަހުގެ ތެރޭގައި، މޫސާ ނަޞީރު ކުރެއްވި މަސައްކަތްތަކުގެ ތެރޭގައި، އެއަރޕޯޓުގެ އެއަރކޮންޑިޝަންތަކާއި، ރެފްރިޖަރޭޝަން އިކުއިޕްމަންޓުތައް އިންސްޓޯލް ކުރައްވައި، އެ ތަކެއްޗަށް ދިމާވާ މައްސަލަތައް ހައްލުކުރައްވައި، އިކުއިޕްމަންޓުތައް މަރާމާތު ކުރުމުގެ މަސައްކަތް ކުރެއްވުން ހިމެނެއެވެ. 24 ގަޑިއިރު ޑިއުޓީ އުސޫލުން ޚިދުމަތް ދިނުމުގެ މަސައްކަތް ރާއްވަވައި ހިންގެވުމުގެ އިސް ބޭފުޅެއްގެ ހައިސިއްޔަތުން ޤާބިލުކަމާއެކުގައި، އެ މަސައްކަތް ތަރައްޤީ ކުރުމަށް މޫސާ ނަޞީރު ކުރައްވައިފައިވާ މަސައްކަތްތައް ފާހަގަކޮށްލަން ޖެހެއެވެ.
ކުންފުނީގެ އެއަރކޮންޑިޝަންތަކާއި، ރެފްރިޖަރޭޝަން އިކުއިޕްމަންޓުތައް ހަރުކުރުމަށާއި، އެ ތަކެއްޗަށް ދިމާވާ މައްސަލަތައް ހައްލުކޮށް، މަރާމާތު ކުރުމަށް ކުންފުނިން ފުރަތަމަ ވަޒީފާ ދެއްވި ތިން ބޭފުޅުންގެ ތެރޭގައި ހިމެނިވަޑައިގެންނެވިކަން އެއީ، މޫސާ ނަޞީރަށް ލިބިވަޑައިގެންނެވި ވަރަށްބޮޑު އުފާފުޅެކެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގައި ބޭނުންކުރާ ފިނިކުރުމުގެ ނިޒާމަށް ބޭނުންކުރާ ގޭހަކީ، ތިމާވެށްޓާ ރައްޓެހި ގޭހަކަށް ބަދަލުކުރުމުގެ މަސައްކަތުގައްޔާއި، އެ އިކުއިޕްމަންޓުތަކަށް ބޭނުންކުރާ ގޭސް، ޖައްވަށް ދޫކޮށްލުމުގެ ބަދަލުގައި، ރީސައިކަލް ކޮށްގެން، އެ ގޭސް އަލުން އެހެން ސިސްޓަމްތަކަށް ބޭނުންކުރެވޭނެ ގޮތް މޫސާ ނަޞީރު ހައްދަވައި ދެއްވައިފައިވާކަން ޚާއްޞަ ގޮތެއްގައި ފާހަގަކޮށްލަންޖެހެއެވެ.
މޫސާ ނަޞީރު، ވަޒީފާގައި ހާސިލު ކުރައްވައިފައިވާ ކާމިޔާބީތަކުގެ ތެރޭގައި، އެއަރޕޯޓްސް ކޮމްޕެނީގެ ފަރާތުން ޑޮމެސްޓިކް އެއަރޕޯޓުތައް ބެލެހެއްޓެވި ދުވަސްވަރު، އެ އެއަރޕޯޓުތަކުގައި ހުންނަ ފިނިކުރުމާ ބެހޭ އިކުއިޕްމަންޓުތަކަށް ދިމާވާ މައްސަލަތައް ހައްލުކޮށްދެއްވުމުގެ މަސައްކަތް ކުރައްވައިފައިވާކަން ފާހަގަކޮށްލަން ޖެހެއެވެ. ޚާއްޞަކޮށް، ކައްދުއާއި ކާޑެއްދޫ އެއަރޕޯޓް ހުޅުވުމަށް ތައްޔާރުވުމުގެ ގޮތުން، އެ އެއަރޕޯޓުތަކުގެ ކަރަންޓު ވިއުގަ ގާއިމުކުރުމުގައްޔާއި، ފިނިކުރުމުގެ ނިޒާމު ގާއިމުކުރެއްވުމުގައި، މޫސާ ނަޞީރު ޢަމަލީގޮތުން ބައިވެރިވެވަޑައިގެންފައި ވެއެވެ.
ޤައުމީ އެކިއެކި މުނާސަބަތުތަކާ ގުޅިގެން ބާއްވަވާ ފުޅަނދުބުރުތަކަށް، ކުންފުނީގެ ފަރާތުން ފުޅަނދުތައް ތައްޔާރުކުރުމުގައި، މޫސާ ނަޞީރު ޢަމަލީގޮތުން ވަނީ ބައިވެރިވެވަޑައިގެންފައެވެ. މިގޮތުން، އެންމެ ފުރަތަމަ ތައްޔާރުކުރެވުނު ފުޅަނދުން ފެށިގެން ކުންފުނިން މިހާތަނަށް ތައްޔާރުކުރި ހުރިހާ ފުޅަނދެއް ތައްޔާރުކުރުމުގެ މޭސްތިރިއެއްގެ ގޮތުންނާއި، މިނިވަން ފަންސާހުގައްޔާއި، ސަރުކާރުން ބާއްވަވާ އެކިއެކި ރަސްމިއްޔާތުތަކަށް ކުންފުނީގެ ފަރާތުން ތައްޔާރުކުރާ އިވެންޓުތަކުގައި ޓެކްނިކަލް ބޭފުޅެއްގެ ގޮތުންވެސް މޫސާ ނަޞީރު ވަނީ ވަރަށްގިނަ މަސައްކަތްތަކެއް ކޮށްދެއްވައިފައެވެ.