އަލްފާޟިލާ އާމިނަތު ޞާބިރާ
އާމިނަތު ޞާބިރާ، ދިވެހި ދައުލަތަށް ޚިދުމަތް ކުރައްވަން ފުރަތަމަ ފެށްޓެވީ،1 ޖޫން 1985 ގައި، އައްޑޫ ޑިވެލޮޕްމަންޓް އޮތޯރިޓީގެ ޓައިޕިސްޓެއްގެ މަގާމުންނެވެ. 19 ފެބުރުވަރީ 1986 ގައި ވަޒީފާއިން ވަކިވެވަޑައިގަތުމަށްފަހު، އަލުން ޚިދުމަތާ ގުޅިވަޑައިގަތީ، 5 މާރިޗު 1987 ގައެވެ. އޭރުއްސުރެ ފެށިގެން ޚިދުމަތް ކުރައްވަމުން ގެންދަވަނީ، އައްޑުއަތޮޅު ހިތަދޫ ރީޖަނަލް ހޮސްޕިޓަލުގައެވެ. އެތާނގެ ޓައިޕިސްޓް ކަމާއި، އެސިސްޓެންޓް ސެކްރެޓެރީ ކަމާއި، ސެކްރެޓެރީ ކަމާއި، ސީނިއަރ ސެކްރެޓެރީ ކަމާއި، ޕަރޗޭސިންގ އޮފިސަރު ކަމާއި، އެސިސްޓެންޓް މެނޭޖަރ، ޕްރޮކިއުމަންޓް ކަމުގެ މަގާމު އަދާކުރައްވައިފައި ވެއެވެ. އަދި އެ ހޮސްޕިޓަލުގެ މެޑިކަލް ރެކޯޑް އޮފިސަރުގެ މަގާމު އަދާކުރައްވައިފައި ވެއެވެ. 5 ޖަނަވަރީ 2020 އިން ފެށިގެން އާމިނަތު ޞާބިރާ، ޚިދުމަތް ކުރައްވަމުން ގެންދަވަނީ، އައްޑޫ އެކުއެޓޯރިއަލް ހޮސްޕިޓަލުގައެވެ. މިހާރު ހުންނެވީ، އެ ހޮސްޕިޓަލުގެ މެޑިކަލް ރެކޯޑް އޮފިސަރުގެ މަގާމުގައެވެ.
މި ވޭތުވެދިޔަ 37 އަހަރަށްވުރެ ދިގު މުއްދަތުގައި، އާމިނަތު ޞާބިރާ ކުރައްވައިފައިވާ މައިގަނޑު މަސައްކަތްތަކުގެ ތެރޭގައި، ހޮސްޕިޓަލުގެ އިދާރީ މަސައްކަތްތަކާއި، ކްލިނިކަލް މަސައްކަތްތައް ހިމެނެއެވެ. އަދި ހޮސްޕިޓަލަށް ޒިޔާރަތްކުރާ މެޑިކަލް ޓީމުތަކުގެ މަސައްކަތުގައި ޢަމަލީގޮތުން ބައިވެރިވެވަޑައިގެން، އެ ޓީމުތަކަށް ބޭނުންވާ ކަންކަން ހަމަޖައްސަވައި ދެއްވުން ހިމެނެއެވެ. އާމިނަތު ޞާބިރާ އެންމެ ގިނަ ދުވަހު ކުރެއްވި މަސައްކަތްތަކުގެ ތެރޭގައި، ރީޖަނަލް ހޮސްޕިޓަލަށާއި، ހެލްތު ސެންޓަރުތަކަށް ބޭނުންވާ މެޑިކަލް ކޮންޒިއުމަބްލްސްއާއި، ލެބޯރެޓަރީއަށް ބޭނުންވާ ރީއެޖެންޓްސްތަކާއި، ޑައިލިސިސްގެ ޚިދުމަތް ގާއިމުކުރުމަށްޓަކައި، އެ ޔުނިޓަށް ބޭނުންވާ ކެމިކަލްތަކާއި، އެހެނިހެން ތަކެތި ހޯއްދެވުމުގެ މަސައްކަތާއި، އޮޕަރޭޝަން ތިއޭޓަރަށް ބޭނުންވާ މެޑިކަލް އަދި ޖެނެރަލް ކޮންޒިއުމަބްލްސް ހޯއްދެވުމުގެ މަސައްކަތް ހިމެނެއެވެ. މި ތަކެތި ހޯއްދެވުމަށްޓަކައި އޯޑަރު ފޯމުތައް ހެލްތު މިނިސްޓްރީއަށް ފޮނުއްވައިގެން، އެޕްރޫވަލް ހޯއްދަވައި، ސަޕްލަޔަރުން މެދުވެރިކޮށް، އެ ތަކެތި ލިބޭތޯ ބައްލަވައި، ސްޓޮކް ހުސްވުމުގެ ކުރިން، އެ ތަކެތި ގެނެސް ގުދަންކޮށް، ސްޓޮކް ބެލެހެއްޓެވުމުގެ މަސައްކަތްވެސް ކުރައްވައިފައި ވެއެވެ. އަދި ހަމައެހެންމެ، ހޮސްޕިޓަލަށާއި، އަތޮޅުގެ ހުރިހާ ހެލްތު ސެންޓަރުތަކަށް ބޭނުންވާ މެޑިކަލް އޮކްސިޖަނާއި، ނައިޓްރޮސް، ސްޓޮކުން ހުސްނުވެ ބެލެހެއްޓުމުގައި، އެކި ގޮންޖެހުންތަކާ ކުރިމަތިލައްވައި، ކައިރި އަތޮޅުތަކުން ތަކެތި ގެންނަވައިގެން، ކަންކަން ހައްލުކުރެއްވުމަށްޓަކައި ގިނަ މަސައްކަތްތަކެއް ކުރައްވައިފައިވާކަން ޚާއްޞަ ގޮތެއްގައި ފާހަގަކޮށްލަން ޖެހެއެވެ.
ކުއްލި ހާލަތުގައި ބަލިމީހުން ގޮވައިގެން މާލެއަށް ގެންދިޔުމަށް ދުރާލައި ތައްޔާރުވުމާއި، ބަލިމީހުން ގޮވައިގެން މާލެއަށް ދިޔުމުގެ މަސައްކަތްވެސް ޞާބިރާ ކުރައްވައިފައި ވެއެވެ. އަދި އިމަރޖެންސީ ހާލަތުގައި މާލެއަށް ފޮނުވަންޖެހޭ ބަލިމީހުންގެ ދަތުރަށް ބޭނުންވާ މެޑިކަލް އިކުއިޕްމަންޓްސް ފަދަ ތަކެތި ތައްޔާރުކޮށް، މެޑިކަލް ޓީމާ ހަވާލުކުރަންޖެހޭ ކޮންމެ ވަގުތަކުވެސް އެކަން ކޮށްދެއްވައިފައިވާކަންވެސް ފާހަގަކޮށްލަން ޖެހެއެވެ. ޞާބިރާ ވަނީ، ހޮސްޕިޓަލުގެ ބަލިމީހުންގެ ތަފާސްހިސާބު ރެކޯޑުތައްވެސް ފަސޭހައިން ބަލައިލެވޭ ގޮތަށް ކޮމްޕިއުޓަރައިޒް ކުރުމުގެ މަސައްކަތް ކުރައްވައިފައެވެ.
