އަލްފާޟިލް މުޙައްމަދު ނަޞީރު
މުޙައްމަދު ނަޞީރު، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 15 މާރިޗު 1986 ގައެވެ. ފުރަތަމަ އަދާކުރެއްވީ، ގއ. ދާންދޫ އޮފީހުގެ ކާތިބު ކަމުގެ ވަޒީފާއެވެ. އޭގެފަހުން، އެ އޮފީހުގެ ސީނިއަރ ކުލާކް ކަމާއި، އެސިސްޓެންޓް ސެކްރެޓެރީ ކަމާއި، ސެކްރެޓެރީ ކަމާއި، އެޑްމިނިސްޓްރޭޓިވް އޮފިސަރު ކަމާއި، ދާންދޫ ކައުންސިލުގެ އިދާރާގެ އެޑްމިނިސްޓްރޭޓިވް އޮފިސަރުކަން ކުރެއްވިއެވެ. މުޙައްމަދު ނަޞީރު މިހާރު ހުންނެވީ، އެ އިދާރާގެ އެސިސްޓެންޓް ފައިނޭންސް އޮފިސަރުގެ މަގާމުގައެވެ.
މި ވޭތުވެދިޔަ 38 އަހަރަށްވުރެ ދިގު މުއްދަތުގެ ތެރޭގައި، މުޙައްމަދު ނަޞީރު މައިގަނޑު ގޮތެއްގައި ކުރައްވައިފައި ވަނީ، އިދާރީ މަސައްކަތްތަކެވެ. އެންމެ ފުރަތަމަ ކުރެއްވީ، އަތޮޅުއޮފީހަށް ފޮނުވަންޖެހޭ މެސެޖުތައް ފޮނުއްވުމާއި، ލިބޭ މެސެޖުތައް ނެންގެވުމުގެ މަސައްކަތެވެ. 1988ވަނަ އަހަރުގެ ތެރޭގައި، ވޯކީޓޯކީ ސެޓު ލިބުމުން މަސައްކަތް ކުރެއްވީ، ވޯކީޓޯކީ ސެޓު ބޭނުންކުރައްވައިގެންނެވެ. 1997ވަނަ އަހަރު ޓެލެފޯނުގެ ޚިދުމަތް ލިބެން ފެށުމުން، ލިޔުންތައް ފޮނުއްވަމުން ގެންދެވީ، ފެކްސްގެ ޒަރީއާއިންނެވެ.
މުޙައްމަދު ނަޞީރު، އިދާރީގޮތުން ކުރެއްވި މަސައްކަތްތަކުގެ އިތުރުން، ދާންދޫ ކައުންސިލުގެ އިދާރާގެ ފައިސާއާ ބެހޭ އެންމެހައި ކަންކަން ބެލެހެއްޓެވުމާއި، މުވައްޒަފުންގެ ހާޒިރީ ބެލެހެއްޓެވުމާއި، މުސާރަ ދިނުމާއި، އިންވެންޓްރީއާއި، ސްޓޮކް ބެލެހެއްޓެވުމުގެ މަސައްކަތް ކުރައްވައިފައި ވެއެވެ. މީގެއިތުރުން، ރަށުގެ ތަރައްޤީއަށްޓަކައި ކުރެވޭ ބައެއް ކަންކަމުގައިވެސް، ޢަމަލީގޮތުން މުޙައްމަދު ނަޞީރު ބައިވެރިވެވަޑައިގެންފައި ވެއެވެ.
މުޙައްމަދު ނަޞީރަކީ، ވަޒީފާގެ މާޙައުލުން ލިބިވަޑައިގެންފައިވާ ތަޖުރިބާގެ އަލީގައި، އެކުގައި މަސައްކަތް ކުރައްވާ މުވައްޒަފުންނަށް މަސައްކަތް ކުރާނެ ގޮތުގެ މައުލޫމާތު ދެއްވައި، ހަމަޖެހިފައިވާ އުސޫލުތަކާއި ގަވާއިދުތަކާ އެއްގޮތަށް ކަންކަން ކުރެއްވުމަށް މުވައްޒަފުންނަށް ބާރުއަޅުއްވަމުން ގެންދަވާ ބޭފުޅެކެވެ. އަދި، ކައުންސިލުގެ ލަނޑުދަނޑިތައް ހާސިލުކުރުމަށްޓަކައި ހުރިހާ މުވައްޒަފުންނާ ގުޅިގެން، ތެދުވެރިކަމާއި އިޚުލާޞްތެރިކަމާ އެކުގައި ޚިދުމަތް ކުރައްވަމުން ގެންދަވާ ބޭފުޅެއްވެސް މެއެވެ.
