އަލްފާޟިލް މުޙައްމަދު ޙަމީދު
މުޙައްމަދު ޙަމީދު، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 8 މާރިޗު 1984 ގައި، މިނިސްޓްރީ އޮފް އެޑިޔުކޭޝަންގެ ހެޑްމާސްޓަރ (ޓްރޭނީ) އެއްގެ ވަޒީފާއިންނެވެ. އެ މަގާމުގައި ހުންނަވައިގެން ޚިދުމަތް ކުރެއްވީ، ހދ. އަތޮޅުގެ ތަޢުލީމީ މަރުކަޒުގައެވެ. އޭގެފަހުން، އޭޝިއާ ފައުންޑޭޝަނާއި، ދިވެހި ސަރުކާރާއި، މެލޭޝިޔާ ސަރުކާރުގެ އެހީގައި، ހެޑްމާސްޓަރ ޓްރޭނިންގ ކޯހެއް، މުޙައްމަދު ޙަމީދު މެލޭޝިޔާގައި ފުރިހަމަކުރެއްވިއެވެ. އެއަށްފަހު، 1 ޖަނަވަރީ 1987 ގައި ރާއްޖެތެރޭގެ ކިޔަވައިދޭ ތަންތާނގެ ހެޑްމާސްޓަރ ގްރޭޑް 3ގެ މަގާމަށް ހަމަޖެއްސެވިއެވެ. މުޙައްމަދު ޙަމީދަކީ، ބައެއް އަތޮޅުތަކުގެ ތަޢުލީމީ މަރުކަޒުތަކާއި، އަތޮޅު މަދަރުސާތަކުގެ ހެޑްމާސްޓަރުކަންވެސް ކުރައްވައިފައިވާ ބޭފުޅެކެވެ. އަދި
ވ. ކެޔޮދޫ ސްކޫލުގެ އެސިސްޓެންޓް ޕްރިންސިޕަލް ކަމާއި، ޑެޕިއުޓީ ޕްރިންސިޕަލް ކަމާއި އަދި ފ. މަގޫދޫ ސްކޫލުގެ ޕްރިންސިޕަލްކަންވެސް ކުރައްވައިފައިވާ ބޭފުޅެކެވެ.
މުޙައްމަދު ޙަމީދު ވަނީ، ޕްރިންސިޕަލުންނަށް ޚާއްޞަކޮށްގެން، ވަރލްޑް ބޭންކާއި، ދިވެހި ސަރުކާރުގެ އެހީގައި ހިންގި "ބެޗްލަރ އޮފް އެޑިޔުކޭޝަނަލް ލީޑަރޝިޕް އެންޑް މެނޭޖްމަންޓް" ކޯސްވެސް ފުރިހަމަކުރައްވައިފައެވެ.
މުޙައްމަދު ޙަމީދަކީ، ހަވާލުކުރެއްވި ކޮންމެ ޒިންމާއެއްވެސް، އިޚުލާޞްތެރިކަމާއި ފަރުވާތެރިކަމާ އެކީގައި އަދާކުރެއްވި ބޭފުޅެކެވެ. ހދ. އަތޮޅު ތަޢުލީމީ މަރުކަޒާއި، ކެޔޮދޫ ސްކޫލާއި، މަގޫދޫ ސްކޫލުގައި ހޭދަކުރެއްވި މުއްދަތުގެ ތެރޭގައި، ސްކޫލުގެ ދަރިވަރުންގެ ހުނަރުވެރިކަމާއި ޤާބިލުކަން އިތުރުކުރެއްވުމަށްޓަކައި އަމިއްލައަށް އިސްނަންގަވައިގެންނާއި، ސްކޫލުގެ ފަރާތުން ހިންގި އެކި ޕުރޮގުރާމުތައް ހިންގެވުމުގައި، މުޙައްމަދު ޙަމީދު ޢަމަލީގޮތުން ބައިވެރިވެވަޑައިގެންފައި ވެއެވެ. އަދި ދަރިވަރުންގެ ކިޔެވުމުގެ ކަންކަން ރާއްވަވައި ހިންގެވުމުގައްޔާއި، އެކަންކަން ހިނގާ ނުހިނގާ ގޮތް ބައްލަވައި، މުދައްރިސުންނަށް އިރުޝާދު ދެއްވުމުގައިވެސް މުޙައްމަދު ޙަމީދު، މުހިންމު ދައުރެއް އަދާކުރައްވައިފައި ވެއެވެ. މީގެއިތުރުން، މުޙައްމަދު ޙަމީދު ކިޔަވައިދެއްވި ސްކޫލުތަކުގައި، ކޮމިއުނިޓީ އެޑިޔުކޭޝަން ތަޢާރުފު ކުރެއްވުމުގެ މަސައްކަތް ކުރައްވައިފައިވާކަން ފާހަގަކޮށްލަން ޖެހެއެވެ.
9 އެޕްރީލް 2024 ގައި ރިޓަޔަރ ކުރެއްވިއިރު، 38 އަހަރަށްވުރެ ދިގު މުއްދަތެއްގައި މުޙައްމަދު ޙަމީދު ވަނީ ދައުލަތަށް ޚިދުމަތް ކުރައްވައިފައެވެ. އޭރު ހުންނެވީ، ފ. މަގޫދޫ ސްކޫލުގެ ޕްރިންސިޕަލް ކަމުގެ މަގާމުގައެވެ.
