ޕޮލިސް ކޯޕްރަލް (ރިޓަޔަރޑް) އިބްރާހީމް ޢަލީ
ޕޮލިސް ކޯޕްރަލް (ރިޓަޔަރޑް) އިބްރާހީމް ޢަލީ، ދިވެހި ދައުލަތަށް ޚިދުމަތް ކުރައްވަން ފެށްޓެވީ، މިނިސްޓްރީ އޮފް ޕަބްލިކް ސޭފްޓީގެ ސިފައިންގެ މީހެއްގެ ވަޒީފާގައި، 15 ޖުލައި 1971 ގައެވެ. ސަރުކާރުގެ ވަޒީފާއިން ރިޓަޔަރ ކުރެއްވިއިރު ހުންނެވީ، ދިވެހި ފުލުހުންގެ ޚިދުމަތުގެ ކޯޕްރަލް ކަމުގެ ރޭންކުގައެވެ. ޚިދުމަތުގައި ހޭދަކުރެއްވި 38 އަހަރަށްވުރެ ދިގު މުއްދަތުގެ ތެރޭގައި، ނޭޝަނަލް ސެކިއުރިޓީ ސަރވިސްގެ ލާންސް ކޯޕްރަލްގެ ރޭންކުގައްޔާއި، ދިވެހި ފުލުހުންގެ ޚިދުމަތުގެ ކޯޕްރަލްގެ ރޭންކުގައި ޚިދުމަތް ކުރައްވައިފައި ވެއެވެ.
ޕޮލިސް ކޯޕްރަލް (ރިޓަޔަރޑް) އިބްރާހީމް ޢަލީ، ވަޒީފާ އަދާކުރެއްވިއިރު ފާހަގަވެފައި ވަނީ، އަޚްލާޤު ރަނގަޅު، ގަޑިއަށް ފަރުވާތެރި، ގަވާއިދުތަކާއި، އުސޫލުތަކާ އެއްގޮތަށް މަސައްކަތް ކުރެއްވި، ސިފައިންގެއާއި ފުލުހުންގެ ނަމޫނާ ބޭފުޅެއްގެ ގޮތުގައެވެ. ޔުނިޓުތަކުގެ ލެވެލްގައްޔާއި، ސިފައިންގެ ލެވެލްގައްޔާއި، ފުލުހުންގެ ލެވެލްގައި ހިންގުނު ގިނަ ކަންކަމުގައި ބައިވެރިވެވަޑައިގެން، އެކަންކަމަށް އެހީތެރިކަން ފޯރުކޮށްދޭން އެދިއްޖެ ހިނދަކު، ފަސްޖެހިވަޑައިނުގެން އެފަދަ ކަންކަމުގައި އެހީތެރިވެދެއްވައިފައިވާ ނަމޫނާ ބޭފުޅެއްގެ ގޮތުގައެވެ.
ނޭޝަނަލް ސެކިއުރިޓީ ސަރވިސްގެ އޮޕަރޭޝަނަލް ޑިއުޓީތަކުގެ އިތުރުން، ބައިވެރިވެވަޑައިގެންފައިވާ ކަންކަމުގެ ތެރޭގައި، އެއްމަސް ދުވަހަށް މާލޭގައި ހިންގުނު ކްރައިމް ޕްރިވެންޝަން ޓާސްކްފޯސްގައްޔާއި، 38 ވަނަ އޮޕަރޭޝަން ދަންމާނުގައްޔާއި، މާލޭގައި ހިންގުނު މީދާ މަދުކުރުމުގެ 4ވަނަ، އަދި 5ވަނަ ޕުރޮގުރާމުގައި ބައިވެރިވެވަޑައިގެން، މަސައްކަތް ކުރެއްވުން ހިމެނެއެވެ. އަދި ދިވެހި ފުލުހުންގެ ޚިދުމަތަށް 76 އަހަރު ފުރުމުގެ މުނާސަބަތުގައި ހިންގުނު އެކިއެކި ހަރަކާތްތައް އިންތިޒާމުކޮށް ހިންގުމުގައި، ވަރަށް ފަރުވާތެރިކަމާ އެކުގައި އިބްރާހީމް ޢަލީ ބައިވެރިވެވަޑައިގެން މަސައްކަތް ކުރައްވައިފައި ވެއެވެ. ދިގު މުއްދަތެއް ވަންދެން ދައުލަތަށް ޚިދުމަތް ކުރެއްވިއިރު، އެއްވެސްއިރެއްގައި މައްސަލައެއް ޖެހިގެން ފިޔަވަޅެއް އަޅުއްވައިފައި ނުވާކަންވެސް ފާހަގަކޮށްލަން ޖެހެއެވެ.
3 ނޮވެންބަރު 1988 ގައި ރާއްޖެއާ ކުރިމަތިވި ނުރައްކާތެރި ޢުދުވާނީ ޙަމަލައިގައި ޒަޚަމްވި މީހުންނަށް އެހީތެރިވެދެއްވައި، އެމީހުން ހޮސްޕިޓަލަށް ގެންދިޔުމުގައި، އިބްރާހީމް ޢަލީ ޢަމަލީގޮތުން ބައިވެރިވެވަޑައިގެންފައި ވެއެވެ.
ޕޮލިސް ކޯޕްރަލް (ރިޓަޔަރޑް) އިބްރާހީމް ޢަލީއަށް ލިބިވަޑައިގެންފައިވާ ތަޖުރިބާގެ އަލީގައި، އެކުގައި މަސައްކަތް ކުރައްވައިފައިވާ އެހެން މުވައްޒަފުންނަށް ކަންކަން އޮޅުންފިލުއްވައި ދެއްވައި، އަލަށް ޚިދުމަތާ ގުޅިވަޑައިގަންނަވާ މުވައްޒަފުންނަށް ތަމްރީނު ދެއްވުމާއި، އެހީތެރިވެ ދެއްވުމާއި، ކަންކަން ކުރަންވީގޮތް އޮޅުންފިލުއްވައި ދެއްވައިފައި ވެއެވެ.
ޕޮލިސް ކޯޕްރަލް (ރިޓަޔަރޑް) އިބްރާހީމް ޢަލީ، އިޚުލާޞްތެރިކަމާއި، ވަފާތެރިކަމާއެކުގައި ޤައުމަށް ކޮށްދެއްވި ޚިދުމަތުގެ އަގުވަޒަން ކުރައްވައި، 4 ކުލައާއި، 3 މެޑެލް ލިބިވަޑައިގެންފައި ވެއެވެ. އޭގެ ތެރޭގައި، އަޚުލާޤީ ކުލައާއި، އިޚުލާޞްތެރި ޚިދުމަތުގެ ކުލައާއި، ދިގު މުއްދަތެއްގައި ޚިދުމަތްކުރުމުގެ ކުލައާއި، ސިފައިންގެ ޚިދުމަތުގެ ކުލަ ހިމެނެއެވެ. ލިބިވަޑައިގެންފައިވާ މެޑެލްތަކުގެ ތެރޭގައި، ސައްތައިގެ މެޑެއްޔާއި، 3 ނޮވެންބަރުގެ މެޑެއްޔާއި، ފުލުހުންގެ މެޑެލް ހިމެނެއެވެ.
