އަލްފާޟިލާ ފާޠިމަތު ސަޢީދާ
ފާޠިމަތު ސަޢީދާ، ދިވެހި ދައުލަތަށް ޚިދުމަތް ކުރައްވަން ފެށްޓެވީ، އައްޑޫ ޑިވެލޮޕްމަންޓް އޮތޯރިޓީގެ ވަގުތީ ކާތިބާ ކަމުގެ ވަޒީފާގައި، 10 ޑިސެންބަރު 1984 ގައެވެ. މިހާރު އަދާކުރައްވަމުން ގެންދަވަނީ، އައްޑޫސިޓީ ކައުންސިލްގެ އިދާރާގެ އެސިސްޓެންޓް ކައުންސިލް އޮފިސަރު ކަމުގެ މަގާމެވެ. ޚިދުމަތުގައި ހޭދަކުރެއްވި 38 އަހަރަށްވުރެ ދިގު މުއްދަތުގެ ތެރޭގައި، އައްޑޫ ޑިވެލޮޕްމަންޓް އޮތޯރިޓީގެ ކާތިބާ ކަމާއި، އެސިސްޓެންޓް ސެކްރެޓެރީ ކަމާއި، ސަދަން ރީޖަނަލް އޮފީހުގެ އެސިސްޓެންޓް ސެކްރެޓެރީ ކަމާއި، ސެކްރެޓެރީ ކަމާއި، މިނިސްޓްރީ އޮފް އެޓޮލްސް ޑިވެލޮޕްމަންޓުގެ ސެކްރެޓެރީ ކަމާއި، މިނިސްޓްރީ އޮފް ހޯމް އެފެއާޒްގެ ސެކްރެޓެރީ ކަމާއި، އެޑްމިނިސްޓްރޭޓިވް އޮފިސަރު ކަމުގެ މަގާމު އަދާކުރައްވައިފައި ވެއެވެ. އަދި ދެކުނު ޕްރޮވިންސް އޮފީހުގެ އެސިސްޓެންޓް ހިއުމަން ރިސޯސް އޮފިސަރު ކަމާއި، ދެކުނު ސަރަޙައްދުގެ ޤައުމީ އިދާރާގެ އެސިސްޓެންޓް ހިއުމަން ރިސޯސް އޮފިސަރު ކަމާއި، އައްޑޫސިޓީ ކައުންސިލްގެ އިދާރާގެ އެސިސްޓެންޓް ހިއުމަން ރިސޯސް އޮފިސަރު ކަމުގެ މަގާމުވެސް އަދާކުރައްވައިފައި ވެއެވެ.
ގަން ބަލަހައްޓާ ޔުނިޓު، އެކި ދުވަސްވަރު ހިންގެވީ، އެކި އޮފީސް އޮފީހުން ކަމުގައިވިޔަސް، ފާޠިމަތު ސަޢީދާ އައްޑޫސިޓީ ކައުންސިލްގެ އިދާރާއަށް ބަދަލުވެވަޑައިގަތުމާ ހަމަޔަށް ޚިދުމަތް ކުރައްވަމުން ގެންދެވީ، އެ ޔުނިޓުގައެވެ. ފާޠިމަތު ސަޢީދާ އަދާކުރެއްވި މަގާމުތަކުގެ ހައިސިއްޔަތުން ކުރެއްވި މަސައްކަތްތަކުގެ ތެރޭގައި، ސްޓޯރުން މުދާ ދޫކުރާ ޗިޓާއި، ޔައުމިއްޔާ ފަދަ ލިޔުންތައް، ފަރުވާތެރިކަމާ އެކުގައި، އަތުން ލިޔުއްވައިފައި ވެއެވެ. އަދި ޓައިޕްރައިޓަރާއި، ކޮމްޕިއުޓަރު ތަޢާރުފުވުމުން، ލިޔުންތައް ލިޔުއްވީ، ޓައިޕް ކުރައްވައިގެންނެވެ. އޭގެ އިތުރުން، އައްޑޫސިޓީ ކައުންސިލްގެ އިދާރާގެ މުވައްޒަފުންގެ ޗުއްޓީ ރެކޯޑާއި، މުވައްޒަފުންނަށް ޗުއްޓީ ދިނުމާ ގުޅޭ އެންމެހައި ކަންކަން ބެލެހެއްޓެވުމާއި، މުވައްޒަފުންގެ ޕަރސަނަލް ފައިލްގެ ރެކޯޑު ބެލެހެއްޓެވުމުގެ މަސައްކަތް، ވަރަށް ފަރުވާތެރިކަމާ އެކުގައި މިހާރުވެސް ކުރައްވަމުން ގެންދަވައެވެ.
އައްޑޫ ޑިވެލޮޕްމަންޓް އޮތޯރިޓީގެ ފައިސާއާބެހޭ އެންމެހައި ކަންކަމާއި، މުސާރަ ދިނުމާއި، އާމްދަނީގެ ގޮތުގައި އޮފީހަށް ލިބޭ ފައިސާ ބަލައިގަތުމާއި، އާމްދަނީ ފައިސާގެ ދުވަހު ފޮތުގައި އަތުން ލިޔުއްވުމާއި، މުސާރަ ޝީޓުތައް އަތުން ލިޔުއްވުން ފަދަ މަސައްކަތްތައްވެސް ފާޠިމަތު ސަޢީދާ ކުރެއްވިއެވެ. ހަމައެއާއެކު، އޮފީހުން ހިންގަމުން އައި ގެސްޓްހައުސްއަށް ވަޑައިގަންނަވާ ސަރުކާރުގެ ވަފުދުތަކުގެ ބޭފުޅުންގެ ރެކޯޑުތައް ބަލަހައްޓަވައި، ބިލުތައް ހެއްދެވުމާއި، ފައިސާ ބަލައިގަތުމުގެ މަސައްކަތްވެސް، ވަރަށް ފަރުވާތެރިކަމާ އެކުގައި ކުރައްވައިފައި ވެއެވެ. މި މަސައްކަތްތައް ކުރެއްވިއިރު، އެއްވެސްއިރެއްގައި މައްސަލައެއް ޖެހިފައި ނުވާކަންވެސް ފާހަގަކޮށްލަން ޖެހެއެވެ.
ފާޠިމަތު ސަޢީދާއަށް ލިބިވަޑައިގެންފައިވާ ތަޖުރިބާގެ އަލީގައި، އެހެން މީހުންނަށް ކަންކަން އޮޅުންފިލުއްވައި ދެއްވައިފައި ވެއެވެ. މިގޮތުން، އޮފީހުގެ ވަޒީފާއާ އަލަށް ގުޅިވަޑައިގަންނަވާ މުވައްޒަފުންނަށް މަސައްކަތް ދަސްކޮށްދިނުމުގައްޔާއި، އިދާރީ މައްސަލަތަކާއި، ފައިސާއާ ބެހޭ މައްސަލަތައް ހައްލުކޮށްދިނުމުގައި އެހީތެރިވެދެއްވައި، މަސައްކަތުގެ ތަޖުރިބާ ހޯދަން އޮފީހަށް އަންނަ ފަރާތްތަކަށް، ކަންކަން ކުރަންވީ ގޮތާއި، ކަންކަން ހިނގަމުންދާ ގޮތް އޮޅުންފިލުއްވައި ދެއްވައިފައި ވެއެވެ.
