އަލްފާޟިލް އަޙްމަދު ސާޖިދު
އަޙްމަދު ސާޖިދު، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 3 އެޕްރީލް 1985 ގައި، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީގެ މެކޭނިކް (ޓްރޭނީ) އެއްގެ ވަޒީފާއިންނެވެ. މި ވޭތުވެދިޔަ 38 އަހަރަށްވުރެ ދިގު މުއްދަތުގެ ތެރޭގައި، ޚިދުމަތް ކުރައްވައިފައި ވަނީ، އެ ކުންފުނީގައެވެ. އަޙްމަދު ސާޖިދު އަދާކުރެއްވި ވަޒީފާތަކުގެ ތެރޭގައި، މެކޭނިކް ކަމާއި، ސީނިއަރ މެކޭނިކް ކަމާއި، ސަރވިސް އިންޖިނިއަރުކަން ހިމެނެއެވެ. އަޙްމަދު ސާޖިދު މިހާރު ހުންނެވީ، ސީނިއަރ އިންޖިނިއަރު ކަމުގެ މަގާމުގައެވެ. އެއީ، ޓްރޭޑިންގ ޑިޕާޓްމަންޓުގައެވެ.
އަޙްމަދު ސާޖިދު ފުރަތަމަ ޚިދުމަތް ކުރެއްވީ، ޔަންމާ ސެންޓަރުގައި، އިންޖީނު މަސައްކަތް ދަސްކުރާ މުވައްޒަފެއްގެ ގޮތުގައެވެ. އެއީ، ޓޫޓީ އިންޖީނުވެސް ރާއްޖެއަށް ތަޢާރުފުވެގެން އައި ދުވަސްވަރު ކަމަށްވުމުން، އެ މަސައްކަތުގައި ސާޖިދު އިސް ދައުރެއް އަދާކުރެއްވިއެވެ. އަދި އެމް.ޓީ.ސީ.ސީ.އަށް ގެންނަ ޔަންމާ އިންޖީނު، ކަސްޓަމަރުންނަށް ވިއްކުމުގެ ކުރިން، އިންޖީނު އަޅާ ދޯނި ސަރވޭ ކުރުމަށްފަހު، އެ ދޯންޏަކަށް އެންމެ އެކަށީގެންވާ އިންޖީނަކީ ކޮބައިތޯ ބައްލަވައި، ދޯނީގެ ވެރިފަރާތަށް އެކަން ކަށަވަރުކޮށްދެއްވައެވެ. ދޯނިފަހަރުގައި އަލަށް އަޅާ އިންޖީނުގެ ސީ ޓްރަޔަލް ހެދުމާއި، ކޮމިޝަން ކުރެއްވުމާއި، އިންޖީނަށް ދިމާވާ މައްސަލަތައް ވޮރަންޓީގެ ދަށުން ހައްލު ކޮށްދެއްވުމަކީ، މިހާރުވެސް އަޙްމަދު ސާޖިދު ކުރައްވަމުން ގެންދަވާ މަސައްކަތްތަކެކެވެ.
އަޙްމަދު ސާޖިދަކީ، ކުންފުނީގެ ޚިދުމަތާ އަލަށް ގުޅިވަޑައިގަންނަވާ މުވައްޒަފުންނަށް އިންޖީނާބެހޭ އެކިއެކި ތަމްރީނުތައް ދެއްވަމުން ގެންދަވާ ބޭފުޅެއްވެސް މެއެވެ. އަދި އެ މަސައްކަތް، މާލޭގެ އިތުރުން، ރާއްޖޭގެ އަތޮޅުތަކުގައިވެސް ކުރައްވަމުން ގެންދަވައެވެ. އެމް.ޓީ.ސީ.ސީ. އަށް ގެންނަ ބޮޑެތި އިންޖީނުތައް އުޅަނދުފަހަރުގައި އިންސްޓޯލް ކުރުމުގެ މަސައްކަތުގައި، އަޙްމަދު ސާޖިދު އިސް ދައުރެއް އަދާކުރައްވަމުން ގެންދަވައެވެ.
ކުންފުނީގެ އިންޖިނިއަރިންގ ސަރވިސްގައްޔާއި، ޓްރާންސްޕޯޓް ސަރވިސަސްގައި އަޙްމަދު ސާޖިދު ޚިދުމަތް ކުރައްވަމުން ގެންދެވިއިރު، އެންމެ
އިސްކަމެއް ދެއްވީ، ހަވާލުވެވަޑައިގެންނެވި ކޮންމެ ކަމެއް އެންމެ ފުރިހަމައަކަށް ކުރައްވައި، އެކަމެއް ނިންމަންޖެހޭ ވަގުތަށް ނިންމެވުމަށެވެ. އަޙްމަދު ސާޖިދަކީ، އަބަދުވެސް ކުންފުނީގެ ކުރިއެރުމަށް ވިސްނަވައިގެން، އިޚުލާޞްތެރިކަމާއި، ތެދުވެރިކަމާއެކުގައި ޚިދުމަތް ކުރައްވަމުން ގެންދަވާ ބޭފުޅެއްކަން ފާހަގަކޮށްލަން ޖެހެއެވެ. އަދި ލިބިވަޑައިގެންފައިވާ ތަޖުރިބާގެ އަލީގައި، ކުންފުނީގެ ޒުވާން އެތައް މުވައްޒަފުންނަކަށް ތަމްރީނު ދެއްވައި، އިރުޝާދު ދެއްވަމުން ގެންދަވާ ބޭފުޅެއްވެސް މެއެވެ.
