އަލްފާޟިލް ޢަބްދުލްޙަކީމް ޙަސަން
ޢަބްދުލްޙަކީމް ޙަސަން، ދިވެހި ދައުލަތަށް ޚިދުމަތް ކުރައްވަން ފެށްޓެވީ، އަތިރީމާފަންނުގޭ ޓްރޭޑިންގ އޭޖެންސީ (އޭ.ޓީ.އޭ.)ގެ ޑްރައިވަރު ކަމުގެ ވަޒީފާއިން 5 މޭ 1971 ގައެވެ. އޭ.ޓީ.އޭ.ގެ ނަން، ސްޓޭޓް ޓްރޭޑިންގ އޯގަނައިޒޭޝަންގެ ނަމަށް ބަދަލުކުރެއްވުމާ ގުޅިގެން، ފަހުން ޚިދުމަތް ކުރެއްވީ، އެސް.ޓީ.އޯ. ގައެވެ. މެދުކެނޑުމެއްނެތި، 39 އަހަރަށްވުރެ ދިގު މުއްދަތަކަށް ޚިދުމަތް ކުރެއްވުމަށްފަހު، ވަޒީފާއިން ރިޓަޔަރ ކުރެއްވީ، 10 މޭ 2010 ގައެވެ.
ޢަބްދުލްޙަކީމް ޙަސަން، ވަޒީފާ އަދާކުރައްވަން ފެށްޓެވިއިރު، ފުރަތަމަ ކުރެއްވީ، އޭ.ޓީ.އޭ.އިން ގެންނަ މުދާ އެމް.ޖީ.ބީ.އެސް.ގެ ފިހާރަތަކަށް ގެންގޮސްދިނުމުގެ މަސައްކަތެވެ. ސަރުކާރުން އެކި ދުވަސްވަރު ހިންގެވި ބޮޑެތި މަސައްކަތްތަކުގައި، ޢަބްދުލްޙަކީމް ޢަމަލީގޮތުން ބައިވެރިވެވަޑައިގެން މަސައްކަތް ކުރެއްވިއެވެ. އެގޮތުން، ފާހަގަކޮށްލެވޭ ބޮޑެތި މަސައްކަތްތަކުގެ ތެރޭގައި، 1990ވަނަ އަހަރު ދިވެހިރާއްޖޭގައި ބޭއްވި ސާރކް ސަމިޓަށް އިމާރާތްކުރި ދަރުބާރުގޭގެ މަސައްކަތަށް ބޭނުންވާ މެޓީރިއަލްސް، ސައިޓަށް ޑެލިވަރ ކުރުމާއި، އިމާރާތް ކުރުމުގައި ޢަމަލީގޮތުން ބައިވެރިވެވަޑައިގެން މަސައްކަތް ކުރެއްވުން ހިމެނެއެވެ. އޭގެ އިތުރުން، އެސް.ޓީ.އޯ. އިން ފުނަދޫގައި ތެޔޮ ރައްކާކުރުމަށް ބޭނުންވާ ތެޔޮ ތާނގީތައް ބެހެއްޓުމަށް އެންމެ ފުރަތަމަ ހިންގުނު މަޝްރޫޢުގައިވެސް ޢަމަލީގޮތުން ބައިވެރިވެވަޑައިގެން މަސައްކަތް ކުރެއްވިއެވެ. އޭގެއިތުރުން، އެ މަސައްކަތް ކުރާ މީހުންގެ އިސް މީހެއްގެ ގޮތުން މަސައްކަތް ބެލެހެއްޓެވުންވެސް ހިމެނެއެވެ.
ޢަބްދުލްޙަކީމް ޙަސަންގެ އެންމެ ޚާއްޞަ ސިފަތައް ކަމުގައި ފާހަގަވެފައިވަނީ، ހަވާލުކުރެވޭ މަސައްކަތްތައް، އިޚުލާޞްތެރިކަމާއި، ތެދުވެރިކަމާއި، އަމާނާތްތެރިކަމާ އެކުގައި ކުރައްވައި، ގަޑިއަށް ނިންމަވާ ކަމެވެ. އެސް.ޓީ.އޯ. އަށް ރާއްޖެއިން ބޭރުން ގެންނަ މުދާ، އެސް.ޓީ.އޯ.އިން ގަނޑުކޮށް މުދާ ނަގާ ފަރާތްތަކަށް، ވެހިކަލްގައި ގެންގޮސްދިނުމުގެ މަސައްކަތް، ދިގު މުއްދަތެއްގައި ޢަބްދުލްޙަކީމް ކުރެއްވިއެވެ. އަދި ކަސްޓަމްސްއިން ކްލިއަރކޮށްގެން އެސް.ޓީ.އޯ.ގެ ގުދަންތަކަށް ގެންދަންޖެހޭ މުދާ ގެންދިޔުމުގެ މަސައްކަތާއި، ސަރުކާރުގެ އޮފީސްތަކަށް އެސް.ޓީ.އޯ. މެދުވެރިކޮށްގެން ރާއްޖެއިން ބޭރުން ގެންނަ އެކި ބާވަތްބާވަތުގެ މުދާ، އެ މުދަލެއް އޯޑަރުކުރާ ސަރުކާރުގެ އޮފީސްތަކަށް ގެންގޮސްދިނުމުގެ މަސައްކަތްވެސް ކުރެއްވިއެވެ.
ޢަބްދުލްޙަކީމް ވަނީ، އެސް.ޓީ.އޯ.ގެ ވެރިން ދުއްވާ ވެހިކަލް ބެލެހެއްޓެވުމާއި، ވެހިކަލްގެ ޑްރައިވަރުކަންވެސް ކުރައްވައިފައެވެ. ޢަބްދުލްޙަކީމް ޙަސަނަށް ލިބިވަޑައިގެންފައިވާ ތަޖުރިބާގެ އަލީގައި، އެހެން މުވައްޒަފުންނަށް މަސައްކަތް ދަސްކޮށްދެއްވިއެވެ. މިގޮތުން، އެސް.ޓީ.އޯ. ވެހިކަލް ގަރާޖުގެ މަސައްކަތާ އަލަށް ގުޅިވަޑައިގަންނަވާ މުވައްޒަފުންނަށް، ވެހިކަލްތައް ބެލެހެއްޓުމާ ގުޅޭ މައުލޫމާތު ދެއްވުމާއި، މުވައްޒަފުންގެ މެދުގައި މަސައްކަތްތައް ރޭވުމުގައި އިސް ދައުރެއް އަދާކުރައްވައިފައި ވެއެވެ.
ޢަބްދުލްޙަކީމް ވަޒީފާ އަދާކުރެއްވިއިރު، އޮފީހަށް ދުވަހަކުވެސް ގަޑިޖެހިފައި ނުވާކަން ފާހަގަކޮށްލަންޖެހެއެވެ.