އަލްފާޟިލް މުޙައްމަދު ހާޝިމް
މުޙައްމަދު ހާޝިމް، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 26 އޮކްޓޫބަރު 1983 ގައެވެ. އެއީ، އުމުރުން 15 އަހަރުގައެވެ. ފުރަތަމަ އަދާކުރެއްވީ، މޯލްޑިވްސް އެއަރޕޯޓްސް އޮތޯރިޓީގެ ލޭބަރަރއެއްގެ ވަޒީފާއެވެ. އޭގެފަހުން، 17 ޑިސެންބަރު 1987 ގައި ވަޒީފާއިން ވަކިވެވަޑައިގަތުމަށްފަހު، އަލުން އެއަރޕޯޓުގެ ޚިދުމަތާ ގުޅިވަޑައިގަތީ، 25 ޑިސެންބަރު 1988 ގައި، ލޭބަރަރއެއްގެ ވަޒީފާއިންނެވެ. އޭގެފަހުން، މޯލްޑިވްސް އެއަރޕޯޓްސް އޮތޯރިޓީއާއި، މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގެ ޕެއިންޓަރ ކަމާއި، އެސިސްޓެންޓް ފޯމަން ކަމުގެ މަގާމު އަދާކުރެއްވިއެވެ. މުޙައްމަދު ހާޝިމް މިހާރު ހުންނެވީ، ފޯމަންގެ މަގާމުގައެވެ.
މުޙައްމަދު ހާޝިމަކީ، ޚާއްޞަ އެހީއަށް ބޭނުންވާ ބޭފުޅަކަށްވީ ނަމަވެސް، ވަރަށް ފަރުވާތެރިކަމާ އެކީގައި މަސައްކަތް ކުރައްވަމުން ގެންދަވާ މުވައްޒަފެކެވެ. ހާޒިރީއަށް ފަރުވާތެރި އަދި ހަވާލުކުރާ ކޮންމެ މަސައްކަތެއްވެސް ވަރަށް ފުރިހަމައަށް ކުރައްވަމުން ގެންދަވާ މުވައްޒަފެކެވެ. އެއަރޕޯޓް ފްރޮންޓް އޭރިއާގެ ސަރަހައްދުތައް ރަނގަޅަށް ބެލެހެއްޓެވުމުގައިވެސް މުޙައްމަދު ހާޝިމް، މުހިންމު ދައުރެއް އަދާކުރައްވަމުން ގެންދަވައެވެ. މިގޮތުން، ފަސިންޖަރުންގެ ލަގެޖު އަރުވައި ބޭލުމާއި، އެއަރޕޯޓުގައި ހުންނަ ގަސްތައް ބެލެހެއްޓުމުގެ މަސައްކަތްތައް، ވަރަށް ފަރުވާތެރިކަމާއެކުގައި ހާޝިމް ކުރައްވައިފައި ވެއެވެ.
ޚާއްޞަ އެހީއަށް ބޭނުންވާ އެކި މީހުންނަށް ކުންފުނީގައި ޚިދުމަތް ކުރުމުގެ ފުރުޞަތު ހޯއްދަވައިދެއްވައި، ވަޒީފާގެ މާޙައުލަށް އެ މީހުން ތަމްރީނުކޮށްދެއްވައި، އެ މީހުންނަކީ، މުޖުތަމަޢު ބަލައިގަންނަ ބަޔަކަށް ހެއްދެވުމުގައި، މުޙައްމަދު ހާޝިމް އަދާކުރައްވާ ދައުރުވެސް ފާހަގަކޮށްލަން ޖެހެއެވެ.
މުޙައްމަދު ހާޝިމް ފާހަގަވެފައި ވަނީ، ކުންފުނިން ހިންގާ ހުރިހާ މަސައްކަތެއްގައިވެސް ޢަމަލީގޮތުން ބައިވެރިވެވަޑައިގެން، އެއްބާރުލުން ދެއްވަމުން ގެންދަވާ މުވައްޒަފެއްގެ ގޮތުގައެވެ. މިގޮތުން، އިސްވެރިން އަންގަވައިގެން، ވީ.ވީ.އައި.ޕީ. ފާލަމުގެ ކަންތައްތައް މެދުނުކެނޑި 10 އަހަރު ދުވަހު ވަނީ ބަލަހައްޓަވައިފައެވެ. އަދި އޭޕްރަންގައި ދަވާދުލުމުގެ މަސައްކަތުގައިވެސް ޢަމަލީގޮތުން ބައިވެރިވެވަޑައިގެންފައި ވެއެވެ.
މުޙައްމަދު ހާޝިމް ގަބޫލުކުރައްވާ ގޮތުގައި، އޭނާއަށް ދަސްކުރެއްވުނު މަސައްކަތެއް ދަސްކުރެއްވުނީ، އެހެން މީހުން ކުރާ މަސައްކަތްތައް ބައްލަވައިގެން، އެ މީހުންނާ ގުޅިގެން ޚިދުމަތް ކުރެއްވުމުގެ ފުރުޞަތު ލިބިވަޑައިގަތުމުންނެވެ. އެއަރޕޯޓުގައި ޚިދުމަތް ކުރެއްވުމަކީ، ލިބިވަޑައިގަންނަވާ ވަރަށްބޮޑު އުފަލެއް ކަމަށާއި، ހުރިހާ ކަމެއްގައިވެސް އެއަރޕޯޓުގެ މުވައްޒަފުންގެ އެހީތެރިކަން ލިބިވަޑައިގަންނަވާކަން މުޙައްމަދު ހާޝިމް ފާހަގަކުރައްވައެވެ.
މުޙައްމަދު ހާޝިމް، ކުންފުނީގައި ޚިދުމަތް ކުރައްވަމުން ގެންދަވާތާ މިހާރު 39 އަހަރަށްވުރެ ދިގު މުއްދަތެއް ވެއްޖެއެވެ.
