އަލްފާޟިލް މުޙައްމަދު ޝަމީމް
މުޙައްމަދު ޝަމީމް، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 1 އޮކްޓޫބަރު 1984 ގައި، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީގައެވެ. ފުރަތަމަ އަދާކުރެއްވީ ސޯމިލްގައި، އެތާނގެ ކީހާއި ރޮންދާ ހިންގާ މީހެއްގެ ވަޒީފާއެވެ. އެތާނގައި އޭރު އާންމުކޮށް ކުރެއްވީ، ލަކުޑި ކީހުމުގެ މަސައްކަތެވެ. އޭގެފަހުން، ސޯ އޮޕަރޭޓަރު ކަމާއި، ސުޕަވައިޒަރު ކަމާއި، އޮޕަރޭޝަންސް އޮފިސަރުކަން ކުރައްވައިފައި ވެއެވެ. ސޯ އޮޕަރޭޓަރުގެ މަގާމުގައި 8 އަހަރެއްހާ ދުވަހު އަދި ސުޕަވައިޒަރުގެ މަގާމުގައި 6 އަހަރެއްހާ ދުވަހު ޚިދުމަތް ކުރައްވައިފައި ވެއެވެ. މީގެއިތުރުން، އޮޕަރޭޝަންސް އޮފިސަރުކަންވެސް 14 އަހަރަށްވުރެ ދިގު މުއްދަތެއްގައި ވަނީ ކުރައްވައިފައެވެ. މުޙައްމަދު ޝަމީމް މިހާރު ހުންނެވީ، ކަސްޓަމަރ ރިލޭޝަންސް އޮފިސަރުގެ މަގާމުގައެވެ.
ފަހަކަށްއައިސް މުޙައްމަދު ޝަމީމް މަސައްކަތް ކުރައްވަމުން ގެންދަވަނީ، އެމް.ޓީ.ސީ.ސީ.ގެ ފެރީ ސަރވިސްގައެވެ. އެގޮތުން، ވިލިނގިލީ އަވަށުގެ ފެރީ ޓަރމިނަލް ހެދުމުގެ ޢަމަލީ މަސައްކަތުގައި ބައިވެރިވެވަޑައިގެންފައި ވެއެވެ. މިހާރު އިސްކޮށް ހުންނަވައިގެން ބަލަހައްޓަވަމުން ގެންދަވަނީ، ގުޅީފަޅު ފެރީގެ ޚިދުމަތްތަކެވެ.
މުޙައްމަދު ޝަމީމަކީ، އެމް.ޓީ.ސީ.ސީ. އިން އާންމު ފަރާތްތަކަށް ދެމުންގެންދާ ޚިދުމަތްތަކުގެ މައުލޫމާތު، ކަސްޓަމަރުންނަށް އޭގެ އެންމެ ފުރިހަމަގޮތުގައި ފޯރުކޮށްދެއްވުމަށްޓަކައި، ގިނަ މަސައްކަތްތަކެއް ކުރައްވަމުން ގެންދަވާ ބޭފުޅެކެވެ. ޚާއްޞަކޮށް، ފެރީ ނިޒާމުގެ ތެރެއިން ރައްޔިތުންނަށް ދެމުންގެންދާ ޚިދުމަތްތަކުގައި، މުޙައްމަދު ޝަމީމް އަދާކުރައްވަމުން ގެންދަވާ ދައުރު ފާހަގަކޮށްލަން ޖެހެއެވެ.
މުޙައްމަދު ޝަމީމް ފާހަގަވެފައި ވަނީ، ކުންފުނީގައި ވަރަށް ފަރުވާތެރިކަމާ އެކީގައި، މަސައްކަތަށް އިސްކަން ދެއްވައިގެން ޚިދުމަތް ކުރައްވަމުން ގެންދަވާ ނަމޫނާ މުވައްޒަފެއްގެ ގޮތުގައެވެ. އަދި، ކުންފުނިން ބާއްވަވާ ޚާއްޞަ ހަފުލާތަކުގައްޔާއި، މިނޫންވެސް ކަންކަން އިންތިޒާމު ކުރެއްވުމުގައި، މުޙައްމަދު ޝަމީމް ޢަމަލީގޮތުން ބައިވެރިވެވަޑައިގެން، ހީވާގިކަމާއެކުގައި ޚިދުމަތް ކުރައްވަމުން ގެންދަވާ މުވައްޒަފެއްގެ ގޮތުގައެވެ.
މުޙައްމަދު ޝަމީމަކީ، ކުންފުނީގެ ވަޒީފާއާ އަލަށް ގުޅިވަޑައިގަންނަވާ މުވައްޒަފުންނަށް އެކިއެކި ތަމްރީނުތައް ދެއްވައި، ލިބިވަޑައިގެންފައިވާ ތަޖުރިބާގެ އަލީގައި އެކިއެކި ކަންކަމަށް މުވައްޒަފުން އަހުލުވެރި ކުރައްވަމުން ގެންދަވާ ބޭފުޅެއްވެސް މެއެވެ. މުޙައްމަދު ޝަމީމްވަނީ، 39 އަހަރަށްވުރެ ގިނަ ދުވަހު ދައުލަތަށް ޚިދުމަތް ކުރައްވައިފައެވެ.