އަލްފާޟިލް އިބްރާހީމް ވަޙީދު
އިބްރާހީމް ވަޙީދު، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 22 ފެބުރުވަރީ 1981 ގައެވެ. ފުރަތަމަ އަދާކުރެއްވީ، ރާއްޖެތެރޭގެ މަދަރުސާ/މަކުތަބުތަކުގެ މުދައްރިސެއްގެ ވަޒީފާއެވެ. އޭގެފަހުން، ރާއްޖެތެރޭގެ ޕްރައިމަރީ ޓީޗަރު ކަމުގެ ވަޒީފާ އަދާކުރެއްވުމަށްފަހު، ވަޒީފާއިން ވަކިވެވަޑައިގެން، އަލުން ޚިދުމަތާ ގުޅިވަޑައިގަތީ، 11 މާރިޗު 1986ގައެވެ. 15 އޮގަސްޓު 2022 ގައި ދައުލަތުގެ ޚިދުމަތުން ރިޓަޔަރ ކުރެއްވިއިރު އިބްރާހީމް ވަޙީދު ހުންނެވީ، މަކުނުދޫ ސްކޫލުގެ ޕްރައިމަރީ ޓީޗަރު ކަމުގެ މަގާމުގައެވެ.
އިބްރާހީމް ވަޙީދު، ދައުލަތަށް ޚިދުމަތް ކުރެއްވި 39 އަހަރަށްވުރެ ދިގު މުއްދަތުގެ ތެރޭގައި، މަކުނުދޫ ސްކޫލުގައި ޚިދުމަތް ކުރެއްވުމުގެ އިތުރުން، ރާއްޖޭގެ އެހެން ބައެއް ރަށްރަށުގެ މަދަރުސާތަކުގައި ތަޢުލީމު އުނގަންނައި ދެއްވުމަށްޓަކައި ގިނަގުނަ ޚިދުމަތްތަކެއް ވަނީ ކޮށްދެއްވައިފައެވެ. އެގޮތުން، އެންމެ ފުރަތަމަ، ތިލަދުންމަތީ ދެކުނުބުރީ ނޮޅިވަރަންފަރު ސްކޫލުގައި، އިސް މުދައްރިސެއްގެ ޒިންމާ އަދާކުރެއްވުމަށްފަހު، 1982ވަނަ އަހަރު ހދ. އަތޮޅު ތަޢުލީމީ މަރުކަޒަށް ބަދަލުވެވަޑައިގެން، އެ މަރުކަޒުގައި ޚިދުމަތް ކުރެއްވިއެވެ. އޭގެފަހުން، ޏ. އަތޮޅު ތަޢުލީމީ މަރުކަޒުގައި، ޕްރައިމަރީ ޓީޗަރެއްގެ ގޮތުގައިވެސް ޚިދުމަތް ކުރައްވައިފައި ވެއެވެ. މީގެއިތުރުން، ހދ. އަތޮޅު މަދަރުސާގައްޔާއި، ށ. އަތޮޅު މަދަރުސާގައްޔާއި، ވ. އަތޮޅު ތަޢުލީމީ މަރުކަޒުގައިވެސް އިބްރާހީމް ވަޙީދު ޓީޗަރެއްގެ ގޮތުގައި ޚިދުމަތް ކުރެއްވިއެވެ.
އިބްރާހީމް ވަޙީދު، ކިޔަވައިދެއްވުމުގެ ބުރަ މަސްއޫލިއްޔަތު އަދާކުރައްވަމުންވެސް، 1993ވަނަ އަހަރުން ފެށިގެން މަކުނުދޫ ސްކޫލުގައި އެސިސްޓެންޓް ސުޕަވައިޒަރުގެ މަގާމުގައްޔާއި، ސުޕަވައިޒަރުގެ މަގާމުގައި ހުންނަވައިގެން، އެ މަގާމުތަކުގެ މަސްއޫލިއްޔަތު ހީވާގިކަމާއެކުގައި އަދާކުރެއްވިއެވެ.
ޓީޗަރުން ތަމްރީނު ކުރުމުގެ ކޯސް ފުރިހަމަކުރައްވައިފައިވާ އެހެން ބޭފުޅުން ޚިދުމަތަށް ނުކުންނަވަން ފެށްޓެވުމާ ހަމަޔަށް މަކުނުދޫގެ ތަޢުލީމުގެ އެންމެ އިސް އާރުކާޓީންގެ ތެރޭގައި، އިބްރާހީމް ވަޙީދު ވަނީ ހިމެނިވަޑައިގެންފައެވެ. މީގެއިތުރުން، ރަށުއޮފީހުގެ ބެއްލެވުމުގެ ދަށުން ސްކޫލުތައް ހިންގި ދުވަސްވަރު، ސްކޫލު ހިންގުމުގެ ޒިންމާތަކާއި، ބަޖެޓު ބެލެހެއްޓެވުމުގެ މަސްއޫލިއްޔަތުވެސް އިބްރާހީމް ވަޙީދު އަދާކުރެއްވިއެވެ. އަދި، މަކުނުދޫ ސްކޫލުގެ ލީޑިންގ ޓީޗަރެއްގެ ގޮތުގައި ހުންނަވައިގެން، ރިޓަޔަރ ކުރެއްވުމާ ހަމަޔަށް ކިޔަވައިދެއްވުމުގެ މަސްއޫލިއްޔަތު އަދާކުރެއްވިއެވެ.
1989ވަނަ އަހަރު، މަކުނުދޫ ސްކޫލުގައި އިބްރާހީމް ވަޙީދު ވަޒީފާ އަދާކުރައްވަން ފެށްޓެވުމާއެކު، މަކުނުދޫ ސްކޫލުގެ އެތައް ދަރިވަރުންނަކަށް ހިލޭ ޓިއުޝަން ދެއްވައި، މުދައްރިސުން ތަމްރީނު ކުރުމުގެ ކޯހުގައި ބައިވެރިކުރުވުމަށް އަމާޒުކުރައްވައިގެން، ދަރިވަރުންނަށް އުނގަންނައިދެއްވައި، ކޯހުގައި ބައިވެރިވުމުގެ ފުރުޞަތު އެ ކުދިންނަށް ލިބިގެންދިޔަކަން ފާހަގަކޮށްލަން ޖެހެއެވެ. އަދި މަކުނުދޫ ސްކޫލުގައި މިހާރު ކިޔަވައިދެއްވާ ޓީޗަރުންގެ ތެރޭގައި، އެ ކުދިން ހިމެނޭކަމީ، އިބްރާހީމް ވަޙީދަށް ވަރަށްބޮޑު އުފާފުޅެއް ލިބިވަޑައިގަންނަވާ ކަމެކެވެ. މީގެއިތުރުން، މަކުނުދޫ ސްކޫލުގައި މެދު މަދްރަސީ ތަޢުލީމު ފެށުމަށްޓަކައި އެކަމުގެ ތަމްރީނު ހޯއްދަވައިގެން، އެ ސްކޫލުގައި ގްރޭޑް 6، 7 އުފެދިގެން ދިޔުމުގައި، އިބްރާހީމް ވަޙީދު އަދާކުރެއްވި ދައުރުވެސް ފާހަގަކޮށްލަން ޖެހެއެވެ.
އިބްރާހީމް ވަޙީދު ކިޔަވައިދެއްވި ދަރިވަރުން، ތަފާތު ދާއިރާތަކުން މަތީ ތަޢުލީމު ހާސިލުކޮށްގެން، މަސައްކަތުގެ މައިދާނަށް ނުކުމެ ޤައުމަށް ޚިދުމަތް ކުރަމުން ގެންދާކަމީ، ލިބިވަޑައިގެންނެވި ކާމިޔާބީއެއް ކަމުގައި ދެކެވަޑައިގަންނަވައެވެ.
