އަލްފާޟިލް ޙުސައިން ޢަބްދުﷲ ޙުސައިން
ޙުސައިން ޢަބްދުﷲ ޙުސައިން، ދައުލަތަށް ޚިދުމަތް ކުރައްވަން ފެށްޓެވީ، އުމުރުން 15 އަހަރުގައެވެ. 1 އެޕްރީލް 1979ގައި، ހދ. ނޮޅިވަރަންފަރު އޮފީހުގެ ކާތިބެއްގެ ވަޒީފާއިން ޚިދުމަތް ފެށްޓެވީ، ރަށުއޮފީސްތަކަށް ކާތިބުން ހަމަޖެއްސެވި ދުވަސްވަރުގައެވެ. 30 ޑިސެންބަރު 2019 ގައި ޙުސައިން ޢަބްދުﷲ ޙުސައިން ވަޒީފާއިން ވަކިވެވަޑައިގެންނެވިއިރު ހުންނެވީ، ނޮޅިވަރަންފަރު ކައުންސިލްގެ އިދާރާގެ އެސިސްޓެންޓް ޑިރެކްޓަރ ކަމުގެ މަގާމުގައެވެ. ޚިދުމަތުގައި ހޭދަކުރެއްވި 40 އަހަރަށްވުރެ ދިގު މުއްދަތުގެ ތެރޭގައި، ނޮޅިވަރަންފަރު ކުޑަކަތީބު ކަމާއި، ކަތީބުކަންވެސް ކުރައްވައިފައި ވެއެވެ.
މި ވޭތުވެދިޔަ މުއްދަތުގެ ތެރޭގައި، ޙުސައިން ޢަބްދުﷲ ޙުސައިނާ ހަވާލުކުރެވޭ އެންމެހައި މަސައްކަތްތައް، ވަޒީފާގެ މަސްއޫލިއްޔަތާ އެއްގޮތަށް ވަނީ ކުރައްވައިފައެވެ. އެގޮތުން، ކުރެއްވި މަސައްކަތްތަކުގެ ތެރޭގައި، ވޯކީޓޯކީގެ ޒަރީއާއިން އަތޮޅުއޮފީހަށް ފޮނުވަންޖެހޭ މެސެޖުތައް ފޮނުއްވުމާއި، އަތޮޅުއޮފީހުން ފޮނުއްވާ މެސެޖުތައް، ފޮނުއްވާ ވަގުތު ލިޔުއްވުމާއި، ރަށުއޮފީހުން ތައްޔާރުކުރަންޖެހޭ އެކިއެކި ރިޕޯޓުތައް ތައްޔާރުކުރެއްވުމުގެ މަސައްކަތް ހިމެނެއެވެ. އޭގެއިތުރުން، އޮފީހުގެ ލިޔެކިޔުންތައް ބެލެހެއްޓެވުމާއި، އެކިއެކި ރެކޯޑުތައް ބެލެހެއްޓެވުމުގެ މަސައްކަތްވެސް ކުރައްވައިފައި ވެއެވެ.
ޙުސައިން ޢަބްދުﷲ ޙުސައިން، ރަށުގެ ކުޑަކަތީބު ކަމާއި، ކަތީބު ކަމުގެ މަގާމުގައި ޚިދުމަތް ކުރެއްވިއިރު، ރަށުގެ ތަރައްޤީއަށް ކުރެވުނު ގިނަގުނަ މަސައްކަތްތަކުގައި ޢަމަލީގޮތުން ބައިވެރިވެވަޑައިގެންފައި ވެއެވެ. އެގޮތުން، ރަށުގެ ރައްޔިތުންނަށް ކަރަންޓު ދިނުމަށް ކުރެވުނު މަސައްކަތްތަކުގައްޔާއި، މަގުތައް ހެދުމާއި، ފާލަމާއި ބަނދަރު ހެދުމާއި، ތަޢުލީމު ފޯރުކޮށްދިނުމަށް ސްކޫލެއް އިމާރާތް ކުރުމާއި، ޞިއްޙީ ދުޅަހެޔޮކަން ފޯރުކޮށްދިނުމަށްޓަކައި ޞިއްޙީ މަރުކަޒެއް އިމާރާތް ކުރުމުގެ މަސައްކަތްތަކުގައި، ޙުސައިން ޢަބްދުﷲ ޢަމަލީގޮތުން ބައިވެރިވެވަޑައިގެންނެވިކަން ފާހަގަކޮށްލަން ޖެހެއެވެ. އަދި، ރަށުގެ ރައްޔިތުންނަށް ދިމާވެފައިވާ އެކިއެކި ދަތި ކަންތައްތައް ހައްލުކޮށްދެއްވައި، ރައްޔިތުންގެ ޚިޔާލާއި މަޝްވަރާ ހޯއްދަވައިގެން، ކަންކަން ކުރައްވައިފައިވާކަންވެސް ފާހަގަކޮށްލަންޖެހެއެވެ.
ހދ. ނޮޅިވަރަންފަރަށް "ތިމާވެށީގެ ފެހިފަތް" ހޯއްދަވައި ދެއްވުމުގައްޔާއި، އަދި ދުންފަތުގެ އިސްތިއުމާލު ނުކުރާ ރަށެއްގެ ގޮތުގައި، ނޮޅިވަރަންފަރު ހެއްދެވުމަށް ކުރެއްވި މަސައްކަތުން އެކަން ކާމިޔާބުވެ، އެކަމުގެ ލިޔުން އެ ރަށަށް ހޯއްދަވައި ދެއްވުމުގައި، ޙުސައިން ޢަބްދުﷲ ޙުސައިން ޢަމަލީގޮތުން ކުރެއްވި މަސައްކަތްތައް ފާހަގަކޮށްލަން ޖެހެއެވެ.
ޙުސައިން ޢަބްދުﷲ ޙުސައިން، ނޮޅިވަރަންފަރުގެ ވެރިކަމުގެ މަގާމުގައި ހުންނެވިއިރު، ކުރެއްވި އެންމެ މުހިންމު އަދި އެންމެބޮޑު ކަމެއްގެ ގޮތުގައި ފާހަގަކޮށްލަންޖެހެނީ، އަތޮޅުގެ ތިން ރަށެއްގެ ރައްޔިތުން، ނޮޅިވަރަންފަރަށް ބަދަލުކުރެއްވުމުގެ މަސައްކަތުގައި އަދާކުރެއްވި ދައުރެވެ. އެ މަސައްކަތް ކާމިޔާބުކަމާއެކުގައި ނިންމަވައިލެއްވީ، ޙުސައިން ޢަބްދުﷲ ޙުސައިން އިސްކޮށް ހުންނަވައިގެންނެވެ. އަދި، ނޮޅިވަރަންފަރުން ކުޅުދުއްފުށްޓަށް އަތޮޅުވެރިކަން ބަދަލުކުރެއްވުމުން، ރަށަށް ލިބުނު ހީނަރުކަން ފޫބެއްދުމަށްޓަކައި، ޙިކުމަތްތެރިކަމާއެކުގައި، ގިނަގުނަ މަސައްކަތްތަކެއް ޙުސައިން ޢަބްދުﷲ ޙުސައިން ކުރެއްވިކަން ފާހަގަކޮށްލަން ޖެހެއެވެ.