އަލްފާޟިލް މުޙައްމަދު ޒާހިރު
މުޙައްމަދު ޒާހިރު، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 26 އެޕްރީލް 1983 ގައެވެ. ފުރަތަމަ އަދާކުރެއްވީ، އެއަރ މޯލްޑިވްސްގެ ލޯޑިންގ އެސިސްޓެންޓެއްގެ ވަޒީފާއެވެ. އޭގެފަހުން، އެއަރ މޯލްޑިވްސްގެ ޓްރެފިކް އެސިސްޓެންޓް ގްރޭޑް 1 ގެ މަގާމާއި، މޯލްޑިވްސް އެއަރ ސަރވިސަސް ލިމިޓެޑުގެ އެސިސްޓެންޓް ޓްރެފިކް އޮފިސަރުގެ މަގާމާއި، އެއަރ މޯލްޑިވްސް ލިމިޓެޑުގެ ސީނިއަރ ކަސްޓަމަރ ސަރވިސަސް އޮފިސަރުގެ މަގާމާއި، އައިލެންޑް އޭވިއޭޝަން ސަރވިސަސް ލިމިޓެޑުގެ ސީނިއަރ އޮފިސަރ، ކަސްޓަމަރ ސަރވިސަސްގެ މަގާމާއި، އެސިސްޓެންޓް މެނޭޖަރުގެ މަގާމާއި، އެސިސްޓެންޓް މެނޭޖަރ، ޑޮމެސްޓިކް އޮޕަރޭޝަންސް ކަމުގެ މަގާމު އަދާކުރައްވައިފައި ވެއެވެ. އަދި މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގެ އެސިސްޓެންޓް މެނޭޖަރު ކަމުގެ މަގާމުވެސް އަދާކުރައްވައިފައި ވެއެވެ. މުޙައްމަދު ޒާހިރު މިހާރު ހުންނެވީ، މެނޭޖަރުކަމުގެ މަގާމުގައެވެ.
މުޙައްމަދު ޒާހިރަކީ، އެއަރޕޯޓްސް ޓަރމިނަލް ސަރވިސަސް ޑިޕާޓްމަންޓުގެ އެންމެހައި ކަންކަން ވަރަށް ފަރުވާތެރިކަމާއެކުގައި ކުރައްވަމުން ގެންދަވާ ބޭފުޅެކެވެ. އެގޮތުން، ޑޮމެސްޓިކް ޓަރމިނަލްގައި އާންމުކޮށް ދިމާވާ އެންމެހައި މައްސަލަތަކަށް އަވަސް ހައްލެއް ހޯއްދަވައި ދެއްވައި، ޓަރމިނަލްގައި ތިބޭ ފަސިންޖަރުންނާއި، މުވައްޒަފުންނާ ބެހޭ އެންމެހައި ކަންކަން، ވަރަށްބޮޑު އިސްކަމެއް ދެއްވައިގެން ބަލަހައްޓަވަމުން ގެންދަވައެވެ.
މުޙައްމަދު ޒާހިރަކީ، އެމް.އޭ.ސީ.އެލް.ގެ ކުރިއެރުމަށްވެސް ގިނަ މަސައްކަތްތަކެއް ކޮށްދެއްވައިފައިވާ ބޭފުޅެކެވެ. މިގޮތުން، އެއަރޕޯޓުގެ އޮޕަރޭޝަންތައް ފަސޭހަކަމާއެކުގައި ހިންގުމަށާއި، އަދި ފަސިންޖަރުންނަށް ރަނގަޅު ޚިދުމަތްތަކެއް ފޯރުކޮށްދިނުމަށްޓަކައި ކުރައްވައިފައިވާ މަސައްކަތްތައް ފާހަގަކޮށްލަންޖެހެއެވެ. އަދި އެއަރޕޯޓުގެ ޓަރމިނަލް ސަރވިސަސްގެ ވަޒީފާއާ އަލަށް ގުޅިވަޑައިގަންނަވާ މުވައްޒަފުން ތަމްރީނު ކޮށްދެއްވުމުގައިވެސް މުޙައްމަދު ޒާހިރު ޢަމަލީގޮތުން ބައިވެރިވެވަޑައިގެން، އެ މުވައްޒަފުން މަސައްކަތަށް އަހުލުވެރިކުރުވައި، ހޭލުންތެރިކުރުއްވަމުން ގެންދަވައެވެ.
މުޙައްމަދު ޒާހިރަކީ، ކޯވިޑް-19ގެ ނުރައްކާތެރި ހާލަތުގައިވެސް، މެދުވެރިވި ދަތި އުނދަގޫ ހުރިހާ ކަންކަމަކާވެސް ކުރިމަތިލައްވައި، އުފެއްދުންތެރިކަމާއެކުގައި އޮޕަރޭޝަންތައް ކުރިއަށް ގެންދެވި ބޭފުޅެއްކަންވެސް ފާހަގަކޮށްލަން ޖެހެއެވެ.
މުޙައްމަދު ޒާހިރު ވަނީ، 40 އަހަރަށްވުރެ ގިނަ ދުވަހު ދައުލަތަށް ޚިދުމަތް ކުރައްވައިފައެވެ.