އަލްފާޟިލް ޙަސަން ޚަލީލް
ޙަސަން ޚަލީލް، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 1 ޖަނަވަރީ 1983 ގައެވެ. މި ވޭތުވެދިޔަ 41 އަހަރަށްވުރެ ދިގު މުއްދަތުގެ ތެރޭގައި ޚިދުމަތް ކުރައްވައިފައި ވަނީ، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީގައެވެ. ފުރަތަމަ އަދާކުރެއްވީ، އެސިސްޓެންޓް އިންޖިނިއަރެއްގެ ވަޒީފާއެވެ. އޭގެފަހުން، ސްޓޮކް ޑިޕާޓްމަންޓުގެ ޗީފް އިންޗާޖް ކަމާއި، އެސިސްޓެންޓް ސުޕަވައިޒަރު ކަމާއި، މެއިންޓެނަންސް އޮފިސަރު ކަމާއި، ސީނިއަރ ސްޓޮކް އިންޗާޖް ކަމުގެ މަގާމު އަދާކުރައްވައިފައި ވެއެވެ. އަދި، ޑެޕިއުޓީ މެނޭޖަރު ކަމާއި، ސީނިއަރ ސަރވިސް އިންޖިނިއަރު ކަމާއި، ސަރވިސް އިންޖިނިއަރު ކަމާއި، ކޮންސަލްޓަންޓް އިންޖިނިއަރު ކަމުގެ މަގާމުވެސް އަދާކުރައްވައިފައި ވެއެވެ. ޙަސަން ޚަލީލް މިހާރު ހުންނެވީ، ސީނިއަރ އިންޖިނިއަރު ކަމުގެ މަގާމުގައެވެ.
ޙަސަން ޚަލީލަކީ، ރަސްމީ ވަޒީފާގައި ޚިދުމަތް ކުރައްވަން ފެށްޓެވުމުގެ ކުރިންވެސް، 1978ވަނަ އަހަރުގެ ތެރޭގައި ޔަންމާ ސެންޓަރުގައި، ޔަންމާ އިންޖީނާބެހޭ މަސައްކަތްތައް ކުރައްވައިފައިވާ ބޭފުޅެކެވެ. އޭރު ވ. އަތޮޅުގައްޔާއި، މ. އަތޮޅުގައި، ޔަންމާ ސެންޓަރުގެ ދެ ގޮފި ހުރުމާއެކު، އެ ތަންތަނުގައިވެސް ޙަސަން ޚަލީލް ޚިދުމަތް ކުރެއްވިއެވެ. އަދި، ކަމާގުޅޭ ތަމްރީނުތައް، ޖަޕާނުން ފުރިހަމަކުރައްވައިފައި ވެއެވެ.
ޙަސަން ޚަލީލް، ޔަންމާ އިންޖީނާބެހޭ މަސައްކަތްތައް ކުރައްވަމުން ގެންދަވާތާ މިހާރު 45 އަހަރަށްވުރެ ދިގު މުއްދަތެއް ވެއްޖެއެވެ. އެކަމުގެ އަގުވަޒަންކުރައްވައި، ޔަންމާގެ ފަރާތުން ޚިދުމަތުގެ އެވޯޑެއް ޙަސަން ޚަލީލަށް ވަނީ ދެއްވައިފައެވެ.
އަލިފުށީ ބޯޓުޔާޑުގައި ދޯނިފަހަރު ބަންނަމުން ގެންދިޔައިރު، ބޮޑެތި ދޯނިފަހަރުގައި އިންޖީނު އެޅުމަށްޓަކައި ގެންނަންޖެހޭ ބަދަލުތައް ގެނައުމުގައި، ޙަސަން ޚަލީލް މުހިންމު މަސައްކަތްތަކެއް ކުރައްވައިފައި ވެއެވެ. މިގޮތުން، ބޯޓުޔާޑުގައި ބަންނަ ދޯނިފަހަރުގެ ސައިޒު ބޮޑުވަމުން އައިވަރަކަށް، އެ އުޅަނދަށް ބޭނުންވާ ސައިޒުގެ އިންޖީނު ހޯދުމުގެ މަސައްކަތުގައިވެސް ޙަސަން ޚަލީލް މުހިންމު ދައުރެއް އަދާކުރައްވައިފައި ވެއެވެ. އަދި، ކުދި ދޯނިފަހަރުގައި އަޅާ ޓޫޓީ އިންޖީނު ރާއްޖެއަށް ތަޢާރުފު ކުރުމުގައިވެސް، ޙަސަން ޚަލީލް ކުރެއްވި މަސައްކަތްތައް ފާހަގަކޮށްލަން ޖެހެއެވެ.
އެމް.ޓީ.ސީ.ސީ. ގައި މިހާރު މައިގަނޑު ގޮތެއްގައި ޙަސަން ޚަލީލް ކުރައްވާ މަސައްކަތްތަކުގެ ތެރޭގައި، ޔަންމާ އިންޖީނު ގަންނަން އަންނަ ފަރާތްތަކަށް ޔަންމާ އިންޖީނާބެހޭ މައުލޫމާތު ދެއްވުމާއި، އޮޑިވެރިން ގަންނަން ބޭނުންވާ އިންޖީނު، އޮޑީގައި އެޅޭތޯ ބެއްލެވުމަށްޓަކައި އެ ރަށްރަށަށް ވަޑައިގެން އޮޑިވެރިޔާއަށް މައުލޫމާތު ދެއްވުން ހިމެނެއެވެ. އޭގެ އިތުރުން، އުޅަނދުތަކަށް ބޭނުންކުރާ ބުރަފަތީގެ ހިސާބުތައް ހައްދަވައި، އިންޖީނު އަޅައިގެން އެ އުޅަނދު ދުވާނެ ކަމަށް ލަފާކުރާ ދުވެލީގެ ހިސާބު ހައްދަވައި، އަދި، އުޅަނދުގައި އިންޖީނު އެޅުމަށްފަހުގައި ޓެސްޓު ކުރުމަށް އުޅަނދު ދުއްވުމުގެ ހުރިހާ މަރުހަލާއެއް ފުރިހަމަ ކުރެއްވުންވެސް ހިމެނެއެވެ.