އަލްފާޟިލް ޢަބްދުއްލަޠީފް އަޙްމަދު
ޢަބްދުއްލަޠީފް އަޙްމަދު، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 6 މޭ 1980 ގައެވެ. ފުރަތަމަ އަދާކުރެއްވީ، މެރިން ޑިވިޜަންގެ ޖޫނިއަރ މެކޭނިކެއްގެ ވަޒީފާއެވެ. އޭގެފަހުން، 1 ޖަނަވަރީ 1981ގައި، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އުފެއްދެވުމާ ގުޅިގެން، ޚިދުމަތް ކުރައްވަމުން ގެންދެވީ، އެ ކުންފުނީގައެވެ. އެ ކުންފުނީގެ ޖޫނިއަރ މެކޭނިކް ކަމާއި، އިލެކްޓްރިޝަން ކަމާއި، ޗީފް އިލެކްޓްރިޝަން ކަމާއި، ސީނިއަރ އިލެކްޓްރިޝަންގެ މަގާމު އަދާކުރެއްވިއެވެ. 1 ނޮވެންބަރު 2022 ގައި ރިޓަޔަރ ކުރެއްވިއިރު ޢަބްދުއްލަޠީފް ހުންނެވީ، އެ ކުންފުނީގެ ސަރވިސް އިންޖިނިއަރ ކަމުގެ މަގާމުގައެވެ.
ޢަބްދުއްލަޠީފް އަޙްމަދު ފުރަތަމަ އަދާކުރެއްވީ، ލޯންޗުތަކުގެ އިންޖީނާބެހޭ މަސައްކަތްތަކާއި، ލޯންޗުތަކުގެ ފެހި ކެހުމުގެ މަސައްކަތެވެ. އޭގެފަހުން، އެމް.ޓީ.ސީ.ސީ.ގެ އިލެކްޓްރިކާ ބެހޭ ހުރިހާ މަސައްކަތެއްވެސް ކުރެއްވިއެވެ. އަދި، އިންޖީނުގޭގައި މަސައްކަތް ކުރެއްވިއިރު، އިންޖީނުގެ މަސައްކަތް ދަސްކުރައްވައިގެން، އެ މަސައްކަތްވެސް ކުރެއްވިއެވެ. އެގޮތުން، "ގޯލްޑަން ރޭ" އާއި، "ސިލްވަރ ބީމް" އާއި، "ސިލްވަރ ކްރެސްޓް"ގެ އިންޖީނުގެ މަސައްކަތްތަކާއި، އެނޫން ބައެއް ލޯންޗުފަހަރުގެ އިންޖީނުގެ މަސައްކަތްތައްވެސް ކުރެއްވިއެވެ.
ތިލަފުށީގައި ހިނގަމުންދާ އެމް.ޓީ.ސީ.ސީ. ސައިޓުގެ ވަރަށްގިނަ މަސައްކަތްތައް ފެށުމުގައި ޢަބްދުއްލަޠީފް، މުހިންމު ދައުރެއް އަދާކުރައްވައިފައި ވެއެވެ. އަދި ޑޮކްޔާޑުގެ މަސައްކަތްތަކުގައިވެސް ޢަމަލީގޮތުން ބައިވެރިވެވަޑައިގެންފައިވާކަން، ޚާއްޞަ ގޮތެއްގައި ފާހަގަކޮށްލަން ޖެހެއެވެ.
2020ވަނަ އަހަރުގެ ފަހުކޮޅުން ފެށިގެން، ރިޓަޔަރ ކުރެއްވުމާ ހަމަޔަށް، ޢަބްދުއްލަޠީފް އަޙްމަދު މަސައްކަތް ކުރައްވަމުން ގެންދެވީ، އެމް.ޓީ.ސީ.ސީ. އިން ދުއްވާ ބަސްތައް ބެލެހެއްޓެވުމާއި، ސަރވިސް ކުރުމަށް، ހުޅުމާލޭގައި ގާއިމުކޮށްފައިވާ ސެންޓަރުގެ އިސް ބޭފުޅެއްގެ ގޮތުގައެވެ. އަދި މި ދެންނެވި މުއްދަތުގައި، އެމް.ޕީ.އެލް. އިން އެމް.ޓީ.ސީ.ސީ. އަށް ޓްރާންސްފަރ ކުރި ގްރޭޓަރ މާލޭ އޭރިއާގެ ބަސްތަކުގެ ސަރވިސް ރަނގަޅު ފެންވަރެއްގައި ކުރިއަށް ގެންދިޔުމަށް މަސައްކަތް ކުރައްވައި، އާރު.ޓީ.އެލް. ބަސް ސަރވިސްގެ ޚިދުމަތް ތަޢާރުފު ކުރުމުގައި، ޢަބްދުއްލަޠީފް އަޙްމަދު އިސް ދައުރެއް އަދާކުރައްވައިފައިވާކަން ފާހަގަކޮށްލަން ޖެހެއެވެ.
ޢަބްދުއްލަޠީފް އަޙްމަދަކީ، ލިބިވަޑައިގެންފައިވާ ތަމްރީނާއި ތަޖުރިބާގެ އަލީގައި، އެމް.ޓީ.ސީ.ސީ.ގެ މުވައްޒަފުންނަށް އެކިއެކި ތަމްރީނުތައް ދެއްވި ބޭފުޅެކެވެ. އަދި މިހާރު އެ ކުންފުނީގެ އިސް ބައެއް މަގާމުތަކުގައްޔާއި، ރާއްޖެއިން ބޭރުގެ ބައެއް ކުންފުނިތަކުގައްޔާއި، ރާއްޖޭގެ އެހެން ބައެއް ކުންފުނިތަކުގައި، ޢަބްދުއްލަޠީފް ތަމްރީނު ކުރެއްވި މުވައްޒަފުން ވަޒީފާ އަދާކުރަމުންގެންދާކަމީ، ޢަބްދުއްލަޠީފަށް ލިބިވަޑައިގަންނަވާ ވަރަށްބޮޑު އުފާފުޅެކެވެ.
ޢަބްދުއްލަޠީފް އަޙްމަދު ރިޓަޔަރ ކުރެއްވިއިރު، 42 އަހަރަށްވުރެ ދިގު މުއްދަތެއްގައި ވަނީ، ދައުލަތަށް ޚިދުމަތް ކުރައްވައިފައެވެ.