އަލްފާޟިލާ އާމިނަތު ނާޝިދާ
އާމިނަތު ނާޝިދާ، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 25 ޖޫން 1978 ގައެވެ. ފުރަތަމަ އަދާކުރެއްވީ، މިނިސްޓްރީ އޮފް ޕްރޮވިންޝަލް އެފެއާޒްގެ ބަޖެޓް ބަލަހައްޓާ ކާތިބާއެއްގެ ވަޒީފާއެވެ. އޭގެފަހުން، 31 ޖަނަވަރީ 1979 ގައި، އެއަރ މޯލްޑިވްސްއަށް ބަދަލުވެވަޑައިގަތެވެ. އެއަރ މޯލްޑިވްސްގައި އަދާކުރެއްވި މަގާމުތަކުގެ ތެރޭގައި، އިނގިރޭސި ކާތިބާ ކަމާއި، ޓްރެފިކް އެސިސްޓެންޓް ކަމާއި، އެސިސްޓެންޓް ޓްރެފިކް އޮފިސަރު ކަމާއި، ރިޒަރވޭޝަން އޮފިސަރު ކަމާއި، މޯލްޑިވްސް އެއަރ ސަރވިސަސް ލިމިޓެޑުގެ ސީނިއަރ ޓިކެޓިންގ/ރިޒަރވޭޝަން ކަމާއި، ރިޒަރވޭޝަން ސުޕަވައިޒަރު ކަމުގެ މަގާމު ހިމެނެއެވެ. އަދި އެއަރ މޯލްޑިވްސް ލިމިޓެޑުގެ ކަސްޓަމަރ ރިލޭޝަންސް އޮފިސަރު ކަމާއި، ސީނިއަރ ޓެރިފް އޮފިސަރު ކަމާއި، އެގްޒެކެޓިވް ޔީލްޑް މެނޭޖްމަންޓް ކަމުގެ މަގާމުވެސް އަދާކުރައްވައިފައި ވެއެވެ. މީގެއިތުރުން، އައިލެންޑް އޭވިއޭޝަން ސަރވިސަސް ލިމިޓެޑުގެ ރިޒަރވޭޝަން އެންޑް ޓިކެޓިންގ ސުޕަވައިޒަރު ކަމާއި، ސުޕަވައިޒަރ، ޕެސެންޖަރ އަޕްލިފްޓުގެ މަގާމުވެސް އަދާކުރައްވައިފައި ވެއެވެ.
އެއަރ މޯލްޑިވްސްގައި ޚިދުމަތް ކުރެއްވިއިރު، ކުރެއްވި މަސައްކަތްތަކުގެ ތެރޭގައި، ޓިކެޓު ވިއްކުމާއި، ރިޒަރވޭޝަން ހެއްދެވުން ހިމެނެއެވެ. އަދި، މަސައްކަތުގެ މާޙައުލުގައި ދިމާވާ އެކިއެކި ކަންކަން، ވިސްނުންތެރިކަމާ އެކުގައި ހައްލުކޮށްދެއްވުމުގައި، އިސް ދައުރެއް އަދާކުރެއްވިއެވެ.
އެއަރ މޯލްޑިވްސްއާއި، މޯލްޑިވްސް އެއަރ ސަރވިސަސް އަދި އައިލެންޑް އޭވިއޭޝަން ސަރވިސަސް ލިމިޓެޑުގައި، 29 އަހަރަށްވުރެ ދިގު މުއްދަތެއްގައި ޚިދުމަތް ކުރެއްވުމަށްފަހު، ދެން ބަދަލުވެވަޑައިގަތީ، މޯލްޑިވްސް އެއަރޕޯޓްސް ކޮމްޕެނީ ލިމިޓެޑަށެވެ. އެ ކުންފުނީގެ ކަސްޓަމަރ ސަރވިސަސް އޮފިސަރު ކަމާއި، ޕެސެންޖަރ ސަރވިސަސް އޮފިސަރު ކަމާއި، ސީނިއަރ އެޑްމިނިސްޓަރކަން ކުރައްވައިފައި ވެއެވެ.
އާމިނަތު ނާޝިދާ ފާހަގަވެފައި ވަނީ، ހަވާލުކުރެއްވި ކޮންމެ މަސައްކަތެއްވެސް ވަރަށް ފަރުވާތެރިކަމާއި ޝައުޤުވެރިކަމާއެކުގައި ކުރެއްވި އަދި ކުންފުނިން ހިންގާ ހުރިހާ މަސައްކަތެއްގައިވެސް ޢަމަލީގޮތުން ބައިވެރިވެވަޑައިގެން، އެއްބާރުލުން ދެއްވި މުވައްޒަފެއްގެ ގޮތުގައެވެ. އާމިނަތު ނާޝިދާއަކީ، ކުންފުނީގެ ސިޔާސަތުތަކާ އެއްގޮތަށް ކަންކަން ހިންގެވުމަށް މަސައްކަތް ކުރައްވައި އަދި މުވައްޒަފުންނާ މުޢާމަލާތު ކުރެއްވުމުގައި ހަރުދަނާ އުސޫލުތަކެއް ގެންގުޅުއްވައި، ކަންކަމާ ކެރިގެން ކުރިމަތިލެއްވި ބޭފުޅެއްވެސް މެއެވެ. އާމިނަތު ނާޝިދާއަކީ، ހިންގުންތެރިކަމާއި، މުވައްޒަފުންނާ ގުޅިގެން މަސައްކަތް ކުރެއްވި، ނަމޫނާ ބޭފުޅެކެވެ.
އާމިނަތު ނާޝިދާ 45 އަހަރަށްވުރެ ދިގު މުއްދަތެއްގައި ދައުލަތަށް ޚިދުމަތް ކުރެއްވުމަށްފަހު، ރިޓަޔަރ ކުރައްވައިފައި ވަނީ، 5 މާރިޗު 2024 ގައެވެ. އޭރު ހުންނެވީ، މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގެ ސީނިއަރ އެޑްމިނިސްޓަރ ކަމުގެ މަގާމުގައެވެ.