އަލްފާޟިލް މުޙައްމަދު ނަސީމް
މުޙައްމަދު ނަސީމް، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 16 ޑިސެންބަރު 1976 ގައެވެ. ފުރަތަމަ އަދާކުރެއްވީ، ކ. އަތޮޅު އަތޮޅުއޮފީހުގެ 2 ނަންބަރު ކާތިބެއްގެ ވަޒީފާއެވެ. އޭގެފަހުން، ޑިޕާޓްމަންޓް އޮފް އިލެކްޓްރިސިޓީގެ ޓެރިފް ކުލާކް ކަމާއި، ރައީސުލްޖުމްހޫރިއްޔާގެ އޮފީހުގެ 1 ނަންބަރު ކާތިބު ކަމުގެ މަގާމު އަދާކުރެއްވިއެވެ. 12 މާރިޗު 1981 ން ފެށިގެން 25 މޭ 2023 ގައި ވަޒީފާއިން ރިޓަޔަރ ކުރެއްވުމާ ހަމަޔަށް މުޙައްމަދު ނަސީމް ޚިދުމަތް ކުރެއްވީ، މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގައެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގައި މުޙައްމަދު ނަސީމް ޚިދުމަތް ކުރެއްވި 42 އަހަރަށްވުރެ ދިގު މުއްދަތުގައި، އެ ކުންފުނީގެ އެކި މަގާމުތައް ވަނީ އަދާކުރައްވައިފައެވެ. އެ މަގާމުތަކުގެ ތެރޭގައި، ކާތިބު ކަމާއި، ސެކްރެޓެރީ ކަމާއި، ބަޖެޓް އޮފިސަރު ކަމާއި، ސީނިއަރ ބަޖެޓް އޮފިސަރު ކަމާއި، މެނޭޖަރު ކަމާއި، ޑެޕިއުޓީ ޑިރެކްޓަރ ކަމާއި، ކޯސްޓް ކޮންޓްރޯލަރ ކަމާއި، އެގްޒެކެޓިވް ކޯޑިނޭޓަރ ކަމާއި، ޖެނެރަލް މެނޭޖަރުކަން ހިމެނެއެވެ. ރިޓަޔަރ ކުރެއްވިއިރު ހުންނެވީ، ކުންފުނީގެ އެސޯސިއޭޓް ޖެނެރަލް މެނޭޖަރު ކަމުގެ މަގާމުގައެވެ. މުޙައްމަދު ނަސީމް، އާންމުގޮތެއްގައި ޚިދުމަތް ކުރައްވައިފައި ވަނީ، ފައިސާއާބެހޭ ބައިގައެވެ.
މުޙައްމަދު ނަސީމަކީ، ވަޒީފާ އަދާކުރެއްވުމުގައި ވަރަށް ފަރުވާތެރިކަމާއި، އިޚުލާޞްތެރިކަމާ އެކުގައި ޚިދުމަތް ކުރެއްވި ބޭފުޅެކެވެ. އަދި ހަވާލުކުރެވޭ ކޮންމެ ކަމެއް، އެ ގަޑިއަކަށް ނިންމަވާ، ހީވާގި މުވައްޒަފެއްވެސް މެއެވެ. މުޙައްމަދު ނަސީމް ފާހަގަވެފައި ވަނީ، ކަންކަމުގައި އިސްނަންގަވައިގެން ޢަމަލީގޮތުން މަސައްކަތުގައި ބައިވެރިވެވަޑައިގެން، އެހެން މުވައްޒަފުންނަށް ހިތްވަރު ދެއްވައި، އެކުވެރި މާޙައުލެއްގައި މަސައްކަތް ކުރެއްވި ބޭފުޅެއްގެ ގޮތުގައެވެ.
މުޙައްމަދު ނަސީމަކީ، ކުންފުނިން ހިންގާ ހުރިހާ މަސައްކަތެއްގައިވެސް ޢަމަލީގޮތުން ބައިވެރިވެވަޑައިގެން، އެއްބާރުލުން ދެއްވައި، އަދި ކުންފުނީގެ ފަރާތުން ބާއްވާ އެކިއެކި އިވެންޓްތަކުގައި ފުރިހަމައަށް ބައިވެރިވެވަޑައިގެން، ކަންކަމުގެ އިންތިޒާމުތައް ވަރަށް ރަނގަޅަށް ހަމަޖައްސަވަމުން ގެންދެވި ބޭފުޅެއްވެސް މެއެވެ.
މުޙައްމަދު ނަސީމް، ވަޒީފާއިން ރިޓަޔަރ ކުރެއްވިއިރު، 46 އަހަރަށް ވުރެ ދިގު މުއްދަތެއްގައި، ދިވެހި ދައުލަތަށް ވަނީ ޚިދުމަތް ކުރައްވައިފައެވެ.
