ދެމެހެއްޓެނިވި އިޤުތިޞާދީ ތަރައްޤީގައި އެންމެ ކުދި، ކުދި، އަދި މެދުފަންތީގެ ވިޔަފާރި (އެމް.އެސް.އެމް.އީ) ތަކުން އަދާކުރާ މުހިންމު ދައުރު، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ފާހަގަކުރައްވައިފިއެވެ.
ބައިނަލްއަޤްވާމީ އެމް.އެސް.އެމް.އީ ދުވަހާއި ގުޅުވައިގެން، އެމަނިކުފާނުގެ ރަސްމީ އެކްސް އެކައުންޓުން ހިއްސާ ކުރެއްވި ޕޯސްޓެއްގައި، މިފަދަ ވިޔަފާރިތައް ބާރުވެރި ކުރުވުމަށާއި، އެ ވިޔަފާރިތަކަށް އައު ބާޒާރުތައް ހޯދައިދިނުމަށް ސަރުކާރުން މަސައްކަތް ކުރައްވާނޭކަމުގެ ޔަޤީންކަން ވަނީ ދެއްވާފައެވެ.
އިޤުތިޞާދު ސިންދަފާތު ކުރުމުގައި ކުދި ވިޔަފާރިތަކުން މުހިންމު ދައުރެއް އަދާކުރާކަން ފާހަގަކުރައްވައި، ރައީސުލްޖުމްހޫރިއްޔާ ވިދާޅުވީ ނިމިގެންދިޔަ ދިވެހީންގެ އުފެއްދުންތެރިކަމުގެ މައުރަޒު ވެގެންދިޔައީ، އެމް.އެސް.އެމް.އީ.ތަކުގެ ދައުރުފުޅާކޮށް، އައު ބާޒާރުތަކާއި، އައު ފުރުސަތުތަކަށް ހުޅުވިގެންދިޔަ މައުރަޒަކަށް ކަމަށެވެ. އަދި، މިއީ 2040 ވަނަ އަހަރާއި ހަމައަށް ރާއްޖެއަކީ ތަރައްޤީވެފައިވާ ޤައުމަކަށްވުމަށް ކުރެވޭ މަސައްކަތުގައި އެޅިގެންދާ މުހިންމު ފިޔަވަޅެއް ކަމަށްވެސް އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާގެ މެސެޖުގައި، މިއަހަރުގެ ޝިޢާރު ކަމުގައިވާ، "ދެމެހެއްޓެނިވި ކުރިއެރުމާއި އީޖާދުކުރުން ކުރިއެރުވުމުގައި އެމް.އެސް.އެމް.އީ.ގެ ދައުރު ފުޅާކުރުން،" މިއީ އެންމެން ޝާމިލުވާ، ވިލުންތެރި ތަރައްޤީގެ މައްޗަށް ބިނާވެފައިވާ ދިވެހިރާއްޖޭގެ ޤައުމީ ތަޞައްވުރާއި ގުޅިފައިވާ ޝިޢާރެއްކަމުގައި އެމަނިކުފާނު ފާހަގަކުރެއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، އެމް.އެސް.އެމް.އީ.ތަކަކީ މުޖުތަމަޢުތައް ހަރުދަނާކޮށް، ސަގާފީ ތަކިރަތައް ހިމާޔަތްކޮށް، ޚާއްޞަކޮށް މަސްވެރިކަމާއި އުފެއްދުންތެރި ސިނާއަތްތަކުގައި އީޖާދީ ވިސްނުން ކުރިއަރުވައި، ރާއްޖޭގައި ވިޔަފާރީގެ ވާދަވެރިކަން ގެނެސްދޭ ބައެއްގެ ގޮތުގައި ފާހަގަކުރެއްވިއެވެ.
އެ މަނިކުފާނުގެ ވާހަކަފުޅުގައި، އިޤުތިޞާދީ ކުރިއެރުމަށްޓަކައި އެމް.އެސް.އެމް.އީ.ތަކަށް ސަގާފީ ތަރިކައިގެ ބޭނުން ހިފުމަށް މަގުފަހިކޮށްދީގެން، އުފެއްދުންތެރިކަމުގެ ދާއިރާގެ ޙިއްޞާ އިތުރުކޮށް، ދިވެހިރާއްޖޭގެ އުފެއްދުންތެރިކަމުން ބޮލަކަށް ޖެހޭ އާމްދަނީގެ ނިސްބަތް 15 އިންސައްތައަށް މަތިކުރުމަކީ އުފެއްދުންތެރި އިޤުތިޞާދީ އިސްތިރާޖުގެ އަމާޒުކަމުގައިވެސް އެމަނިކުފާނު ވިދާޅުވެފައިވެއެވެ.
އެގޮތުން، އަންހެން ވިޔަފާރިވެރިންނަށް ޚާއްޞަކޮށްގެން ތަޢާރަފްކުރި 100 މިލިއަން ރުފިޔާގެ ލޯން ސްކީމުން މިހާތަނަށް، އަންހެންކަނބަލުން އިސްނަގައިގެން ހިންގާ 350 އަށް ވުރެ ގިނަ ވިޔަފާރިއަށް އެހީތެރިކަން ފޯރުކޮށްދެވި، އެސް.އެމް.އީ ފައިނޭންސިންގ އަށް އަމާޒުކުރެވިގެން ހުޅުވާލެވޭ ލޯން ސްކީމްތަކުން، ރަށްތަކުގެ އާބާދީތަކަށް ލިބެމުންދާ ކުރިއެރުންތައް ރައީސުލްޖުމްހޫރިއްޔާ ފާހަގަކުރެއްވިއެވެ.
ރައީސުލްޖުމްހޫރިއްޔާގެ ވާހަކަފުޅު ނިންމަވާލައްވަމުން އެމަނިކުފާނު ވަނީ، އަމިއްލަ ފަރުދުންގެ ވިޔަފާރިތަކުގެ ވިލުންތެރިކަމާއި އިޖާދީ ވިސްނުމަށް ތަޢުރީފްކުރައްވައި، މިދާއިރާގައި މަޢުލޫމާތު ބަދަލުކުރުމާއި ބައިނަލްއަޤްވާމީ ގުޅުންތައް ބަދަހިކުރުމަށް ދައުލަތުން އިސްކަންދެއްވާނޭކަމުގެ ޔަޤީންކަން ދެއްވާފައެވެ.