ހުވަދުއަތޮޅު އުތުރުބުރީ ނިލަންދޫ ރައްޔިތުންނާ ބައްދަލުކުރައްވައި، ރައީސުލްޖުމްހޫރިއްޔާގެ ނައިބު ޑޮކްޓަރ މުޙަންމަދު ޖަމީލު އަޙްމަދު ދެއްކެވި ވާހަކަފުޅު

بســم اللّـه الرّحمـن الرّحيــم

ނިލަންދޫ ކައުންސިލްގެ ޢިއްޒަތްތެރި ރައީސް، ކައުންސިލްގެ މެންބަރުން، އަތޮޅު ކައުންސިލްގެ ރައީސް، ރައްޔިތުންގެ މަޖިލީހުގެ ގއ. ދާއިރާގެ ޢިއްޒަތްތެރި މެންބަރު ސަޢުދު ޙުސައިން، ކޫއްޑޫ ފިޝަރީޒްގެ އެންމެހައި ބޭފުޅުން، މިއަދުގެ މި ކުޑަ އިޙްތިފާލުގައި ބައިވެރިވެވަޑައިގަންނަވާ ލޮބުވެތި އެންމެހައި ރައްޔިތުން.

އަޅުގަނޑު، އަޅުގަނޑުމެންގެ މިދަތުރުގައި އެކިހިސާބުތަކަށް ދިމާވެފައި ހުރި ދަތިތައް ބަލައިފިން. ސުނާމީގެ ގެތަކުގެ ވާހަކަ، ހަމަ އެބަހުރި ހުރިހާ ދިމާއެއްގައިވެސް. އެއީ ވަރަށް ހިތަށް އުނދަގޫވާ ވާހަކައެއް. އެއީ ސަބަބަކީ ވަގުތީހިޔާއެއްގައި ދިރިއުޅެމުންދާތާ ވަރަށްގިނަ ދުވަސްވީ ރައްޔިތުންތަކެއް އެބަތިއްބެވި. މިއީކީ ފަސޭހަ ކަންތައްތަކެއް ނޫން. މިތަންތާނގެ ކުދިން ބޮޑުވެ، މީހުންނާ ކައިވެނިކޮށްފި މިހާރު. އެތައް ދުވަސްތަކެއް ވެގެން މިދިޔައީ. ގަބޫލުކުރަން ދަތި، ޙަޤީޤަތުގައި މިހާ ގިނަ ދުވަސްތަކެއް މި މަސައްކަތް ނުނިމިދާތީ. އެކަމަކު ތިޔަބޭފުޅުން ގަބޫލުކުރައްވަންޖެހޭ ޙަޤީޤަތަކީ، އަޅުގަނޑުމެން އައީ އިހަކަށްދުވަހު. އަޅުގަނޑުމެން އައިއިރުވެސް، މި މަސައްކަތަށް އިހުމާލުވީ ފަރާތްތަކެއް އެބަ ތިއްބެވި. އަޅުގަނޑު މިހާރު ދަންނަވައިފިން. އަޅުގަނޑާ އެކީގައި ރައީސް އޮފީހުގެ ބޭފުޅުން އެބަ ތިއްބެވި. މުޅި މި މަޝްރޫޢު ހިނގައިދިޔަގޮތް، މުޅި ރާއްޖޭގައި އަދި މިއަތޮޅުގައިވެސް ހިނގައިދިޔަގޮތް، އަޅުގަނޑުމެން އެނބުރި ގޮއްސަ އިރާދަކުރެއްވިއްޔާ، މިކަންކަން ބަލާނަން. އަދި މިހާރު ހުއްޓިފައިވާ ސަބަބުތައް އިރާދަކުރެއްވިއްޔާ ނައްތާލައި، ލަސްތަކެއްނުވެ މިގެތައް، މިހާރު މިރަށުގައިވެސް ހުރި ގެތަކުގެ ތެރޭގައި، ގާތްގަނޑަކަށް 72 ޕަސެންޓްވަރު. މިއީ ދެން ހަމަ ހުރިހާ ހިސާބެއްގައިވެސް އެގޮތަށް މިހިރީ. 80، 70 ޕަސެންޓް ނިމިފައި، މިގެތައް ނުނިމި މިހިރީ. އަޅުގަނޑު ތިޔަބޭފުޅުންނަށް ހަމަ އިރާދަކުރެއްވިއްޔާ، ރައީސް ޔާމީންގެ ފަރާތްޕުޅުން ހަމަ ވަޢުދުވަން، މި މަސައްކަތް ބަލައި، ލަސްތަކެއްނުވެ މިކަން ނިންމުމުގެ އިންތިޒާމު ހަމަޖައްސައި، ކައުންސިލާ ގުޅިގެން އެކަން ކުރިއަށް ގެންދާނެ ކަމުގެ ޔަޤީންކަން ތިޔަބޭފުޅުންނަށް އަރުވަން.

އަޅުގަނޑުމެންގެ ޞިއްޙީ ޙާލަތުވެސް، އަޅުގަނޑުމެންގެ އެހެން ކަންތައްތައްވެސް އަޅުގަނޑުމެންނަށް ފަސޭހަވެގެންދާނެ. އެއީ އަޅުގަނޑު ދައްކާ ވާހަކައެއް ނޫން. އަޅުގަނޑު ދައްކާ ވާހަކައެއް ނޫން. ކީރިތި ޤުރްއާނުގައި اللّـه سبحـانـه وتعـالىއެގޮތަށް ވަޙީކުރައްވާފައިވަނީ. އެކަލާނގެ ވަޙީކުރައްވަނީ، فَأَمَّا مَنْ أَعْطَىٰ وَاتَّقَىٰ، وَصَدَّقَ بِالْحُسْنَىٰ، فَسَنُيَسِّرُهُ لِلْيُسْرَىٰ. فَأَمَّا مَنْ أَعْطَىٰ ތިޔަބައިމީހުންގެ ތެރެއިން މީސްމީހުންނަށް ހޭދަކުރާ މީހާ، ތިންކަމެއް މި އާޔަތުގައި މިވަނީ، މިސޫރަތުގައި.  ތިންކަމެއް ކޮށްފި މީހާއަށް، ތިމަން ﷲ ކަންތައްތައް ފަސޭހަކުރައްވާނަމޭ. فَأَمَّا مَنْ أَعْطَىٰ އެމީހުންނަކީ އެކަކު އަނެކަކަށް އެހީތެރިވާ މީހުންނޭ. ދެން އެކަންތައް ދޮއެއްތޯ އަޅުގަނޑުމެން މިއަދު މިކުރަނީ. އަޅުގަނޑުމެންގެ މުސްލިމް އަޚުން، ދުނިޔޭގެ އެހެން ތަންތާނގައި ވަރަށް ހާލުގައި ތިއްބެވީ. ވަރަށް ނިކަމެތި. މިއަދު މިގޮތަށް އަޅުގަނޑުމެން ތިބިއިރުވެސް، އަޅުގަނޑުމެންގެ އަޚުން ހަމަ އަނިޔާވެރިކަމުގެ ތެރޭގައި ހޭދަކުރަނީ. އެހީތެރިވާށޭ. فَأَمَّا مَنْ أَعْطَىٰ وَاتَّقَىٰ ބިރުވެތިވާށޭ.

والســّلام عليــكم ورحـمــة اللّـه وبـركاتـه