މިނިސްޓްރީ އޮފް ޑިފެންސް

1.     ދިވެހިރާއްޖޭގެ މިނިވަންކަމާއި ސިޔާދަތަށް ނުރައްކަލެއް ނުވަތަ އުނިކަމެއް އަތުވެދާނެ ކޮންމެ ކަމަކުން، ދިވެހި ދައުލަތާއި ޤާނޫނީ ވެރިކަން ދިފާޢުކޮށް ހިމާޔަތްކުރުން. އަދި އެފަދަ ކަމެއް މީހަކު ނުވަތަ ބަޔަކު ކުރާނަމަ އެކަމެއް މަނާކޮށް ވަގުތުން ހުއްޓުވައި ޤާނޫނީ ގޮތުން އަޅަންޖެހޭ ފިޔަވަޅުތައް އެޅުން.

2.     ދިވެހިރާއްޖޭގެ ދިފާޢާއި ޤައުމީ ސަލާމަތާބެހޭ ސިޔާސަތުތައް އެކަށައެޅުމުގައި ރައީސުލްޖުމްހޫރިއްޔާ އަދި ސިފައިންގެ ވެރިޔާއަށް ލަފާދީ، އެހީތެރިވުން.

3.     ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގައި ބަޔާންކޮށްފައިވާ ގޮތުގެ މަތިން ރާއްޖޭގެ އާކިޕެލެޖިކަލް ބޭސްލައިންތަކުގެ ތެރޭގައިވާ ބިމާއި، ޖައްވާއި، ކަނޑާއި، އެ ކަނޑުގެ އަޑީގައިވާ ބިމާއި، އެ ކަނޑާ ގުޅިފައިވާ ޖައްވު ދިފާޢުކޮށް، ޙިމާޔަތްކުރުން. އަދި މިކަންކަމާބެހޭގޮތުން ހެދިފައިވާ ޤާނޫނުތަކާއި ގަވާއިދުތައް ތަންފީޒުކުރުމުގައި، ސަރުކާރަށް އެހީތެރިވުން.

4.     ދިވެހިރާއްޖޭގެ އިޤުތިޞާދީ ސަރަހައްދާއި އެ ސަރަހައްދުގައިވާ ޤުދުރަތީ ވަސީލަތްތައް ހިމާޔަތްކޮށް ބެލެހެއްޓުން. އަދި ރާއްޖޭގެ އިޤުތިޞާދީ ސަރަހައްދުގައި އެއްވެސް ބަޔަކު ގަވާއިދާ ޚިލާފަށް މަސްވެރިކަން ކުރާކަން ނުވަތަ އެނޫންވެސް ރާއްޖޭގެ ޤާނޫނާއި ޚިލާފުކަމެއް ކުރާކަން އެނގިއްޖެނަމަ، އެކަމެއް ބަލައި އެކަމެއް މަނާކޮށް، އެކަމާމެދު އަޅަންޖެހޭ ފިޔަވަޅުތައް އެޅުން.

5.     ދިވެހިރާއްޖޭގެ ޚާއްޞަ އިޤުތިޞާދީ ސަރަހައްދާއި އަދި ސިޔާސީ ސަރަހައްދުގެ އެއްގަމާއި، ކަނޑާއި ވައިގެ ތެރެއިން، ބޭރު ޤައުމުތަކުގެ އުޅަނދުތަކާއި، މަތިންދާ ބޯޓު ފަހަރު ދަތުރުކުރުމުގައި ޤާނޫނާ ޚިލާފު ޢަމަލެއް ކޮށްފިނަމަ، އެކަމެއް ބަލައި، އެކަމާމެދު އަޅަންޖެހޭ ފިޔަވަޅުތައް އެޅުން.

6.     ކަނޑުމަތީގައި ހާލުގައި ޖެހޭ މީހުން ހޯދައި ސަލާމަތްކުރުމާއި، ކަނޑާއި އެއްގަމުގައި ދިމާވާ ނުރައްކާތެރި ހާދިސާތަކުގައި ރައްޔިތުންގެ ފުރާނައާއި މުދާ ސަލާމަތްކުރުން.

7.     އަލިފާނުގެ ނުރައްކަލުން ރައްޔިތުންނާއި އެމީހުންގެ މުދާ ސަލާމަތްކުރުމުގެ ގޮތުން އަޅަންޖެހޭ ފިޔަވަޅުތައް އެޅުން.

8.     ރާއްޖެއަށް ދިމާވާ ޤުދުރަތީ ބޮޑެތި ހާދިސާތަކާއި، އެނޫންވެސް ނުރައްކާތެރި ބޮޑެތި ހާދިސާތަކުގައި ރައްޔިތުންގެ ފުރާނައާއި މުދާ ސަލާމަތްކުރުމާއި، އަދި އެފަދަ ހާދިސާއަކުން ލިބިދާނެ ގެއްލުން ކުޑަކުރުމަށް މަސައްކަތްކުރުމާއި، އެކަން އާންމު ޙާލަތަކަށް ގެނައުމުގައި ސަރުކާރުގެ ކަމާބެހޭ ފަރާތްތަކާ ގުޅިގެން އިސްވެ ހަރަކާތްތެރިވުން.

9.     ދިވެހިރާއްޖޭގެ މިނިވަންކަމާއި އިސްތިޤުލާލާއި، ރާއްޖޭގެ ސިޔާދަތާއި ޤައުމީ ސަލާމަތާއި ޤާނޫނީ ވެރިކަމަށް ނުރައްކަލެއް ނުވަތަ އުނިކަމެއް އަތުވެދާނެ ކަންކަމާބެހޭ މަޢުލޫމާތު އެއްކޮށް ދިރާސާކޮށް، އެންކަމާބެހޭގޮތުން އަޅަންޖެހޭ ފިޔަވަޅުތައް އެޅުން.

10. ޤައުމީ މަޞްލަޙަތާއި އަމަންޢާންމަށް ގެއްލުމެއްވެދާނެ ކޮންމެ ކަމަކުން ދިވެހި ދައުލަތް ހިމާޔަތްކޮށް ރައްކާތެރިކުރުމުގައި ސަރުކާރުގެ ކަމާބެހޭ ފަރާތްތަކަށް އެހީތެރިވުން.

11. ރާއްޖޭގެ ކަނޑާއި ވައިގެ ބަނދަރުތަކުގެ ސަލާމަތްތެރިކަމާއި ރައްކާތެރިކަން ބެލެހެއްޓުން.

12. ދިވެހިރާއްޖޭގެ މަދަނީ ވައިގެ ދަތުރުފަތުރުގެ ނިޒާމާއި ބައިނަލްއަގުވާމީ ކަނޑުގެ ބަނދަރުތަކާއި ޕޯޓް ފެސިލިޓީތަކުގެ ސަލާމަތްތެރިކަމާގުޅޭ ސިޔާސަތުތައް ކަނޑައެޅުމުގައާއި އެ ދާއިރާތަކުން ކަނޑައަޅައިފައިވާ ސިޔާސަތުތަކަށް ގެންނަން ޖެހޭ ބަދަލުތަކާ ގުޅޭގޮތުން ކަމާބެހޭ ފާރާތްތަކަށް ލަފާދިނުން.

13. ދިވެހިރާއްޖޭގެ މަދަނީ ވައިގެ ދަތުރުފަތުރުގެ ނިޒާމާއި ބައިނަލްއަގުވާމީ ކަނޑުގެ ބަނދަރުތަކާއި ޕޯޓް ފެސިލިޓީތަކުގެ ސަލާމާތްތެރިކަމާގުޅޭ ގަވާއިދުތަކާއި މިންގަނޑުތަކާއި އުސޫލުތައް އެކުލަވައިލުން.

14. ރާއްޖޭގެ ކަނޑާއި ވައިގެ ބަނދަރުތަކަށް އަންނަ އަދި ފުރާ އުޅަނދުފަހަރާއި އެ އުޅަނދުފަހަރުން އެތެރެކުރެވޭ އަދި ބޭރުކުރެވޭ ތަކެއްޗާއި، އަންނަ އަދި ފުރާ މީހުންނާއި، ބަނދަރު ހިމެނޭ ސަރަހައްދުތަކަށް ވަދެނިކުމެވާ މީހުންނާއި، ވެއްދޭ އަދި ނެރެވޭ ތަކެތި ބެލުމާއި މިފަދަ ކަންކަން ބެލެހެއްޓުމުގައި، ސަރުކާރުގެ ކަމާބެހޭ ފަރާތްތަކަށް އެހީތެރިވެދިނުން.

15. ދިވެހިރާއްޖޭގެ މަދަނީ ވައިގެ ބަނދަރުތަކާއި ބައިނަލްއަގުވާމީ ކަނޑުގެ ބަނދަރުތަކުގެ ސަލާމަތްތެރިކަން ބަލަހައްޓާ އިދާރާތަކަށް ބޭނުންވާ ޖާގައާއި ސަޕޯޓް ފެސިލިޓީތަކާއި އާލާތްތަކާއި ވަސީލަތްތައް ލިބިފައިވާކަން ކަށަވަރުކުރުން.

16. ދިވެހިރާއްޖޭގެ މަދަނީ ވައިގެ ދަތުރުފަތުރުގެ ނިޒާމާއި ބައިނަލްއަގުވާމީ ކަނޑުގެ ބަނދަރުތަކަށް ކުރިމަތިވެދާނެ ނުރައްކާތަކާބެހޭ މައުލޫމާތު ދިވެހިރާއްޖޭގެ އިންޓެލިޖެންސް އިދާރާ ތަކުންނާއި ބައިނަލްއަގުވާމީ އިދާރާތަކުން ލިބިގަތުމާއި، އެފަދަ މަޢުލޫމާތު އެއްކޮށް ރައްކާތެރިކަމާއެކު ބެލެހެއްޓުމާއި، އެ މައުލޫމާތު ދިރާސާކުރުމާއި، އެފަދަ ދިރާސާތަކުގެ ނަތީޖާ އާއި ދިވެހިރާއްޖޭގެ މަދަނީ ވައިގެ ދަތުރުފަތުރުގެ ނިޒާމަށް ކުރިމަތިވެދާނެކަމަށް ގަބޫލުކުރެވޭ ނުރައްކާތަކާބެހޭ މައުލޫމާތު، ކަނޑައަޅައިފައިވާ އުސޫލުތަކާ އެއްގޮތަށް ކަމާބެހޭ ފަރާތްތަކާ ހިއްސާކުރުން.

17. ދިވެހިރާއްޖޭގެ މަދަނީ ވައިގެ ދަތުރުފަތުރުގެ ނިޒާމާއި ބައިނަލްއަގުވާމީ ކަނޑުގެ ބަނދަރުތަކަށް ކުރިމަތިވާ ނުރައްކާތައް ވަޒަންކޮށް، އެ ދަނޑިވަޅަކަށް އެކަށޭނަ ތްރެޓް ލެވެލް ކަނޑައަޅައި، ކަމާބެހޭ ފަރާތްތަކަށް އެންގުން.

18. ދިވެހިރާއްޖޭގެ މަދަނީ ވައިގެ ދަތުރުފަތުރުގެ ނިޒާމާއި ބައިނަލްއަގުވާމީ ކަނޑުގެ ބަނދަރުތަކާއި ޕޯޓް ފެސިލިޓީތަކުގެ ސަލާމަތްތެރިކަމަށް ކަނޑައަޅައިފައިވާ މިންގަނޑުތަކާއި އުސޫލުތައް ތަންފީޒުކުރަމުންދާ މިންވަރު ދެނެގަތުމަށްޓަކައި އިންސްޕެކްޝަންތަކާއި އޮޑިޓްތައް ހެދުމާއި، މި އިންސްޕެކްޝަންތަކާއި އޮޑިޓްތަކުން އިޞްލާޙުކުރަންޖެހޭކަމަށް ފާހަގަކުރެވޭ ކަންކަން އިޞްލާޙުކުރުމަށް އެންގުމާއި، އެކަންކަން ފުރިހަމަކުރާ މިންވަރު ބެލުން.

19. ޤާނޫނާ ޚިލާފަށް ހިންގޭ ޢަމަލަކުން މަދަނީ ވައިގެ ދަތުރުފަތުރަށް އަރައިފާނެ ބުރުލަކުން އެ ސިނާއަތުގެ ސަލާމަތްތެތިކަން ކަށަވަރުކުމަށްޓަކައި ޢަމަލު ކުރާނެ ސަލާމަތްތެރިކަމާ ގުޅުންހުރި ޤައުމީ މިންގަނޑުތަކާއި ޕްރޮގްރާމްތައް (ނޭޝަނަލް ސިވިލް އޭވިއޭޝަން ސެކިއުރިޓީ ޕްރޮގްރާމް (NCASP) ހިމެނޭގޮތުން) ކަނޑައަޅައި، މި ކަންކަމާ ގުޅުންހުރި އިދާރާތަކުން އެ މިންގަނޑުތަކާއި ޕްރޮގްރާމްތައް ތަންފީޒު ކުރަމުންދާކަން ކަށަވަރުކުރުން.

20. އޭވިއޭޝަން ސެކިއުރިޓީ އާއި ގުޅޭ ޚިދުމަތް ދޭ ފަރާތްތަކަށް ނޭޝަނަލް ސިވިލް އޭވިއޭޝަން ސެކިއުރިޓީ ޕްރޮގްރާމް (NCASP)ގެ ދަށުން މިނިސްޓްރީން ކުރަންޖެހޭ ކަންކަން އިންތިޒާމުކޮށް، އަންގަންޖެހޭ އެންގުންތައް އެންގުން.

21. މަދަނީ ވައިގެ ދަތުރުފަތުރުގެ ސަލާމަތްތެރިކަމާ ގުޅުންހުރި ކަންކަން ވިލަރެސް ކުރުން.

22. ދިވެހިރާއްޖޭގެ މަދަނީ ވައިގެ ދަތުރުފަތުރުގެ ނިޒާމުގައި މަސްއޫލުވާ އެންމެހައި ފަރާތްތަކުގެ ސެކިއުރިޓީ ޕުރޮގުރާމުތަކާއި ސެކިއުރިޓީ ޕްލޭންތައް ވަޒަންކުރުމާއި، އެ ޕުރޮގުރާމުތަކާއި ޕްލޭންތަކަށް ހުއްދަ ދިނުން.

23. ދިވެހިރާއްޖޭގައި މަދަނީ ވައިގެ ބަނދަރުތައް ގާއިމުކުރުމާއި، އެތަންތަން އޮޕަރޭޓްކުރުމާއި، އެތަންތަނުން އެކިއެކި ޚިދުމަތްތައް ފޯރުކޮށްދިނުމުގައި، ނޭޝަނަލް ސިވިލް އެވިއޭޝަން ސެކިއުރިޓީ ޕްރޮގްރާމް (NCASP) ގެ ދަށުން ދޭންޖެހޭ ހުއްދަތައް ދިނުން.

24. އެއަރޕޯޓް އޮޕަރޭޓަރ ސެޓިފިކެޓް ހޯދުމަށާއި އެ ސެޓްފިކެޓް އައުކުރުމުގައި މަދަނީ ވައިގެ ދަތުރުފަތުރުގެ ސަލާމަތްތެރިކަމާ ގުޅޭގޮތުން ބޭނުންވާ ހުއްދަތައް ދޫކުރުން.

25. ވައިގެ މަގުން ހަތިޔާރު އުފުލުމަށް އެއަރލައިންތަކުގެ ސެކިއުރިޓީ ޕްރޮގްރާމުގައި ކަނޑައަޅައިފައިވާ އުސޫލުތަކާއި އެއްގޮތައް މިނިސްޓްރީން ދޭންޖެހޭ ހުއްދަ ދިނުމާއި ފުރިހަމަކުރަންޖެހޭ އެންމެހައި ކަންކަން ފުރިހަމަކުރުން.

26. "ކޮންވެންޝަން އޮން އިންޓަރނޭޝަނަލް ސިވިލް އޭވިއޭޝަން"ގެ ސޭފްގާރޑިންގ އިންޓަރނޭޝަނަލް ސިވިލް އޭވިއޭޝަން އެގެއިންސްޓް އެކްޓްސް އޮފް އަންލޯފުލް އިންޓަފިއަރެންސް އާއި މަދަނީ ވައިގެ ދަތުރުފަތުރުގެ ސަލާމަތްތެރިކަމާ ގުޅުންހުރި، ދިވެހި ދައުލަތުން ކުރަންޖެހޭ ކަންކަން ކުރުމާއި އެކަންކަމާގުޅޭ ނިޒާމުތައް ގާއިމުކޮށް ހިންގައި ބެލެހެއްޓުމާއި، އެކަންކަމުގައި ދިވެހިރާއްޖެ ތަމްސީލުކުރުން.

27. ދިވެހިރާއްޖޭގެ މަދަނީ ވައިގެ ބަނދަރުތަކުގައި ހިނގާ ސަލާމަތްތެރިކަމާ ގުޅޭ ހަދިސާތައް (ސެކިއުރިޓީ ބްރީޗް އިންސިޑެންޓް) ތަޙުޤީޤު ކުރުމާއި، އެފަދަ ކަންކަމާބެހޭ ރަސްމީ ރިޕޯރޓްތައް ތައްޔާރުކޮށް ކަމާބެހޭ ފަރާތްތަކާ ހިއްސާކުރުން.

28. ދިވެހިރާއްޖޭގެ މަދަނީ ވައިގެ ބަނދަރުތަކުން ޚިދުމަތް ހޯދާ ފަރާތްތަކުން، މަދަނީ ވައިގެ ދަތުރުފަތުރުގެ ސަލާމަތްތެރިކަމާބެހޭ ގޮތުން ފާހަގަކުރެވޭ ކަންކަން ހުށަހަޅާނެ ކޮންފިޑެންޝަލް ރިޕޯޓިންގ ސިސްޓަމެއް ގާއިމުކުރުން.

29. ދިވެހިރާއްޖޭގެ މަދަނީ ވައިގެ ދަތުރު ފަތުރުގެ ނިޒާމުގައި ހިމެނޭ ފަރާތްތަކުގެ ތެރެއިން، މަދަނީ ވައިގެ ދަތުރުފަތުރުގެ ސަލާމަތްތެރިކަމާގުޅޭ ގަވާއިދުތަކާއި މިންގަޑުތައް ތަންފީޒު ނުކުރާ އަދި އެއްބަސްވެފައިވާ ކަރެކްޓިވް އެކްޝަން ޕްލޭން އާއި އެއްގޮތަށް ޢަމަލު ނުކުރާ ފަރާތްތަކާމެދު ނޭޝަނަލް ކޮލިޓީ ކޮންޓްރޯލް ޕްރޮގްރާމުގައި ކަނޑައަޅައިފައިވާ އުސޫލުތަކާ އެއްގޮތައް ފިޔަވަޅު އެޅުން.

30. ދިވެހިރާއްޖޭގެ މަދަނީ ވައިގެ ބަނދަރުތަކުގައާއި، ބައިނަލްއަގުވާމީ ކަނޑުގެ ބަނދަރުތަކުގެ ސަލާމަތްތެރިކަން ބެލެހެއްޓުމުގައި ބޭނުންކުރާ ސެކިއުރިޓީ އިކުއިޕްމަންޓްތަކުގައި ހުންނަންޖެހޭ މިންގަނޑުތައް ކަނޑައެޅުމާއި، އެ އިކުއިޕްމަންޓްތައް ދިވެހިރާއްޖޭގެ މަދަނީ ވައިގެ ބަނދަރުތަކުގައާއި ބައިނަލްއަގުވާމީ ކަނޑުގެ ބަނދަރުތަކުގައި ބޭނުންކުރުމުގެ ހުއްދަ ދިނުން.

31. އިންޓަރނޭޝަނަލް ސިވިލް އޭވިއޭޝަން އޮތޯރިޓީއާއި ޤައުމުތަކުގެ އެޕްރޮޕްރިއޭޓް އޮތޯރިޓީ ފޯ ސިވިލް އޭވިއޭޝަން ސެކިއުރިޓީގެ ގޮތުގައި ކަނޑައަޅައިފައިވާ އިދާރާތަކުން ރާއްޖޭގައި ހިންގާ ސެކިއުރިޓީ އޯޑިޓްތަކުގެ އެންމެހައި ކަންކަން ވިލަރެސްކުރުން.

32. ދިވެހިރާއްޖޭގައި ރަޖިސްޓްރީ ކޮށްފައިވާ މަދަނީ އެއަރލައިންތަކުން ދަތުރުކުރާ ގައުމީ އަދި ބައިނަލްއަގުވާމީ ވައިގެ ބަނދަރުތަކުގައި ޢަމަލުކުރަމުންދަނީ އެއަރލައިންތަކުގެ އެއަރލައިން އޮޕަރޭޓަރ ސެކިއުރިޓީ ޕްރޮގްރާމްއާއި އެއްގޮތަށްތޯ ބެލުމަށް އިސްޕެކްޝަންތަކާއި ކޮލިޓީ ކޮންޓްރޯލް ހަރަކާތްތައް ރާވައި ހިންގުމާއި، ބައިނަލްއަގުވާމީ ވައިގެ ބަނދަރުތަކުގައި އެ ޤައުމުތަކުގެ އެޕްރޮޕްރިއޭޓް އޮތޯރިޓީ ފޯ ސިވިލް އޭވިއޭޝަން ސެކިއުރިޓީގެ ގޮތުގައި ކަނޑައަޅައިފައިވާ އިދާރާތަކުން ހިންގާ އިސްޕެކްޝަންތައް ވިލަރެސްކުރުން.

33. އިންޓަރނޭޝަނަލް ސިވިލް އޭވިއޭޝަން އޮތޯރިޓީން ކަނޑައަޅައިފައިވާ މިންގަނޑުތަކާ އެއްގޮތަށް ނޭޝަނަލް ސިވިލް އޭވިއޭޝަން ސެކިއުރިޓީ ޕްރޮގްރާމް (NCASP)އާއި ނޭޝަނަލް ސިވިލް އޭވިއޭޝަން ސެކިއުރިޓީ ޓްރޭނިންގ ޕްރޮގްރާމްއާއި ނޭޝަނަލް ސިވިލް އޭވިއޭޝަން ސެކިއުރިޓީ ކޮލިޓީ ކޮންޓްރޯލް ޕްރޮގްރާމް ތައްޔާރުކުރުމާއި، އެ ޕުރޮގުރާމުތައް މުރާޖައާކޮށް ގެންނަންޖެހޭ އިޞްލާޙުތައް ގެނައުމާއި، އެ ޕުރޮގުރާމުތައް ތަންފީޒުކުރުމަށް ކަމާބެހޭ އިދާރާތަކަށް އެންގުން.

34. ދިވެހިރާއްޖޭގައި އޭވިއޭޝަން ސެކިއުރިޓީ ތަމްރީން ދޭ މަރުކަޒުތައް ހިންގުމުގެ ހުއްދަ ދިނުމާއި، ނޭޝަނަލް ސިވިލް އޭވިއޭޝަން ސެކިއުރިޓީއާ ގުޅޭ ތަމްރީނު ޕުރޮގުރާމުތައް ހިންގުމުގެ ހުއްދަ ދިނުމާއި، ނޭޝަނަލް ސިވިލް އޭވިއޭޝަން ސެކިއުރިޓީ ޕްރޮގްރާމް (NCASP) ރެގިއުލޭޓުކުރާ ފަރާތުގެ ހައިސިއްޔަތުން މިނިސްޓްރީން ހިންގަން ލާޒިމުކުރާ ތަމްރީނު ޕުރޮގުރާމުތައް ރާވައި ހިންގުން.

35. މަދަނީ ވައިގެ ދަތުރުފަތުރުގެ ސަލާމަތްތެރިކަން އިތުރުކުރުމަށާއި އެކަމަށް ކަނޑައަޅައިފައިވާ މިންގަނޑުތައް ތަންފީޒުކުރުމުގައި ޤައުމުތަކަށް އެހީތެރިވެދިނުމާއި، މަދަނީ ވައިގެ ދަތުރުފަތުރުގެ ސަލާމަތްތެރިކަމާގުޅޭ ފަންނީ މައުލޫމާތު ބަދަލުކުރުމަށް އުފައްދައިފައިވާ ސަރަހައްދީ އަދި ބައިނަލްއަގުވާމީ ޖަމާއަތްތަކުގައި ދިވެހިރާއްޖެ ތަމްސީލުކުރުން.

36. "ދިވެހިރާއްޖޭގެ ބައިނަލްއަގުވާމީ ކަނޑުގެ ބަނދަރުތަކާއި ޕޯޓް ފެސިލިޓީތަކުގެ ސަލާމާތްތެރިކަމާ ގުޅޭގޮތުން ކަނޑައަޅައިފައިވާ މިންގަނޑުތަކާ އެއްގޮތަށް ކަމާބެހޭ އެންމެހައި ފަރާތްތަކުން ޢަމަލުކުރަމުންދާކަން ކަށަވަރުކުރުން.

37. "އިންޓަރނޭޝަނަލް ކޮންވެންޝަން ފޯރ ދަ ސޭފްޓީ އޮފް ލައިފް އެޓް ސީ – ޗެޕްޓަރ 2-11 (ސްޕެޝަލް މެޝަރސް ޓު އެންހޭންސް މެރިޓައިމް ސެކިއުރިޓީ)" އާއި އެ ކޮންވެންޝަންގެ ދަށުން އެކުލަވައިލައިފައިވާ "އިންޓަރނޭޝަނަލް ޝިޕް އެންޑް ޕޯޓް ފެސިލިޓީ ސެކިއުރިޓީ ކޯޑް" (އައި.އެސް.ޕީ.އެސް ކޯޑް) ހިމެނޭހެން ބައިނަލްއަގުވާމީ ކަނޑުގެ ބަނދަރުތަކުގެ ސަލާމަތްތެރިކަމާ ގުޅޭ ބައިނަލްއަގުވާމީ އެއްބަސްވުންތަކާއި މުޢާހަދާތަކާއި ޕްރޮޓޮކޯލްތަކުގައި ދިވެހިރާއްޖޭގެ ފަރާތުން ބައިވެރިވުމާއި، ރާއްޖެއިން ބައިވެރިވެފައިވާ އެފަދަ އެއްބަސްވުންތަކާއި މުޢާހަދާތަކާއި ޕްރޮޓޮކޯލްތަކުގެ ދަށުން ކުރަންޖެހޭ ކަންކަން ކުރުމާއި، ބައިނަލްއަގުވާމީ ކަނޑުގެ ބަނދަރުތަކުގެ ސަލާމަތްތެރިކަމާ ގުޅޭ ބައިނަލްއަގުވާމީ ފޯރަމްތަކުގައި ދިވެހިރާއްޖެ ތަމްސީލުކުރުން.

38. "ކޮންވެންޝަން ފޯރ ދަ ސަޕްރެޝަން އޮފް އަންލޯފުލް އެކްޓްސް އެގެއިންސްޓް ސޭފްޓީ އޮފް މެރިޓައިމް ނެވިގޭޝަން" އާއި "ޖިބޫތީ ކޯޑް އޮފް ކޮންޑަކްޓް ކޮންސާރނިން ދަ ރިޕްރެޝަން އޮފް ޕައިރެސީ އެންޑް އާމްޑް ރޮބަރީ އެގެއިންސްޓް ޝިޕްސް" ހިމެނޭހެން ކަނޑު ދަތުރުފަތުރުގެ ސަލާމަތްތެރިކަމާ ގުޅޭ ބައިނަލްއަގުވާމީ އެއްބަސްވުންތަކާއި މުޢާހަދާތަކާއި ޕްރޮޓޮކޯލްތަކުގައި ދިވެހިރާއްޖޭގެ ފަރާތުން ބައިވެރިވުމާއި، ރާއްޖެއިން ބައިވެރިވެފައިވާ އެފަދަ އެއްބަސްވުންތަކާއި މުޢާހަދާތަކާއި ޕްރޮޓޮކޯލްތަކުގެ ދަށުން ކުރަންޖެހޭ ކަންކަން ކުރުމާއި، ކަނޑު ދަތުރުފަތުރުގެ ސަލާމަތްތެރިކަމާ ގުޅޭ ބައިނަލްއަގުވާމީ ފޯރަމްތަކުގައި ދިވެހިރާއްޖެ ތަމްސީލުކުރުން.

39. ދިވެހިރާއްޖޭގެ ބައިނަލްއަގުވާމީ ކަނޑުގެ ބަނދަރުތަކާއި ޕޯޓް ފެސިލިޓީތަކުގެ ތެރެއިން "ކެޕްޓަން އޮފް ދަ ޕޯޓް" އަދި "ޕޯޓް ފެސިލިޓީ ސެކިއުރިޓީ އޮފިސަރ" ހަމަޖައްސަންޖެހޭ ބަނދަރުތަކާއި ޕޯޓް ފެސިލިޓީތައް ކަނޑައެޅުމާއި، އެ މަޤާމުތަކަށް މީހުން ޢައްޔަންކުރުމުގެ ހުއްދަ ދިނުން.

40. ހާލަތަށް ރިއާޔަތްކޮށް ދިވެހިރާއްޖޭގެ ބައިނަލްއަގުވާމީ ކަނޑުގެ ބަނދަރުތަކުގެ "ސެކިއުރިޓީ ލެވެލް" ކަނޑައެޅުން.

41. ޕޯޓް ސެކިއުރިޓީ ޓްރެއިނިންގ ޕްރޮގްރާމްތައް ރާވައި ހިންގުމާއި، ޕޯޓް ސެކިއުރިޓީ ޚިދުމަތްދޭ ފަރާތްތައް ތަމްރީނުކުރުން.

42. ޕޯޓުތަކާއި ޕޯޓް ފެސިލިޓީތައް އޮޕަރޭޓުކުރުމުގެ ހުއްދައަށް ހޯދުމާއި އައުކުރުމުގައި ޕޯޓުތަކާއި ޕޯޓް ފެސިލިޓީތަކުގެ ސަލާމަތްތެރިކަމާ ގުޅޭގޮތުން ބޭނުންވާ ހުއްދަތައް (ސެކިއުރިޓީ ކްލިއަރަންސް) ދޫކުރުން.

43. ނޭޝަނަލް މެރިޓައިމް ސެކިއުރިޓީ ކޮމިޓީގެ މަސައްކަތްތައް ރާވައި ހިންގުމާއި، އެ ކޮމިޓީގެ ސެކްރެޓޭރިއަޓް ބެލެހެއްޓުން.

44. ދިވެހިރާއްޖޭގެ މަދަނީ ވައިގެ ބަނދަރުތަކާއި ބައިނަލްއަގުވާމީ ކަނޑުގެ ބަނދަރުތަކުގެ ސަލާމަތްތެރިކަމާ ގުޅުންހުރި ގަވާއިދުތަކާއި މިންގަނޑުތަކާއި އުޞޫލުތައް ތަންފީޒުކުރުމުގައި ހަރަކާތްތެރިވާ ފަރާތްތަކަށް ބޭނުންވާ ފަންނީ އެހީތެރިކަން ފޯރުކޮށްދިނުން.

45. އެއަރ އެންބިއުލަންސާއި އެންބިއުލާންޗުގެ ޚިދުމަތް ދިނުމުގެ އެންމެހައި އިންތިޒާމުތައް ހަމަޖެއްސުމާއި، އެއްތަނުން އަނެއްތަނަށް ވައިގެ މަގުންނާއި ކަނޑުމަގުން ބަލިމީހުން އުފުލުމަށް ކުރަންޖެހޭ އެންމެހައި ކަންކަން ކުރުން.

46. އެއަރ އެންބިއުލަންސާއި އެންބިއުލާންޗުގެ ޚިދުމަތް ދިނުމަށް ބޭނުންކުރާ އުޅަނދުފަހަރު ދުއްވުމާއި،
އެ އުޅަނދުފަހަރު ބަލަހައްޓައި މަރާމާތުކުރުމާއި، އެ އުޅަނދުފަހަރުގެ ރަޖިސްޓްރީއާއި، މިނޫންވެސް
އެ އުޅަނދުފަހަރާބެހޭ ލިޔެކިއުންތައް ބެލެހެއްޓުމާއި، އެ އުޅަނދުފަހަރަށް ބޭނުންވާނެ ލޮޖިސްޓިކް ސަޕޯޓް ފޯރުކޮށްދިނުމާއި، އެ އުޅަނދުފަހަރަށް ފަޅުވެރިން ހަމަޖެއްސުމާއި އެފަރާތްތަކަށް ތަމްރީނު ދިނުން. 

47. ޤާނޫނު ނަންބަރު 75/4 (ދިވެހިރާއްޖެއަށް ގެނައުން މަނާ ތަކެތީގެ ޤާނޫނު)ގެ ދަށުން މިނިސްޓްރީން ކުރަންޖެހޭ އެންމެހައި ކަންކަން ކުރުން.

48. ޤާނޫނު ނަންބަރު 2022/22 (ކެމިކަލް ހަތިޔާރު މަނާކުރުމުގެ ޤާނޫނު) ތަންފީޒުކުރުން.

49. މޯލްޑިވްސް ނޭޝަނަލް ސަރވިސްއާގުޅޭގޮތުން އެކުލަވައިލަންޖެހޭ އުސޫލުތައް އެކުލަވައިލައި ތަންފީޒުކުރުން.

50. މޯލްޑިވްސް ނޭޝަނަލް ސަރވިސްއަށް މީހުން އެންރޯލްކުރުމާ ގުޅޭ އެންމެހައި ކަންކަން ރާވައި އިންތިޒާމުކުރުމާއި، ނޭޝަނަލް ސަރވިސްއަށް އެންރޯލްކުރެވޭ ފަރާތްތައް ރަޖިސްޓްރީކުރުމާއި، މޯލްޑިވްސް ނޭޝަނަލް ސަރވިސްގެ މެންބަރުންނާ ގުޅޭ އިދާރީ ކަންކަން ބެލެހެއްޓުން.

51. މޯލްޑިވްސް ނޭޝަނަލް ސަރވިސްގެ ތަމްރީނުގެ ނިޒާމު އެކަށައަޅައި، އެ ނިޒާމު ތަންފީޒުކުރުން.

52. މޯލްޑިވްސް ނޭޝަނަލް ސަރވިސްގެ ތަމްރީނުގެ ނިޒާމުގެ ދަށުން ހިންގާ ތަމްރީނުތައް ހިނގާނުހިނގާގޮތް ބެލުމާއި، އެ ނިޒާމު ތަރައްޤީކުރުމަށް ކަމާބެހޭ މުއައްސަސާތަކާ ގުޅިގެން މަސައްކަތްކުރުން.

53. ކަނޑައެޅިފައިވާ މިންގަނޑުތަކާ އެއްގޮތަށް މޯލްޑިވްސް ނޭޝަނަލް ސަރވިސްގެ ތަމްރީނު ޕުރޮގުރާމުތައް ހިންގުމާއި، މޯލްޑިވްސް ނޭޝަނަލް ސަރވިސްގެ ތަމްރީނު ޕުރޮގުރާމުތަކުގެ ތެރެއިން އެހެނިހެން މުއައްސަސާތަކާ ގުޅިގެން ކުރިޔަށް ގެންދަންޖެހޭ ޕުރޮގުރާމުތައް ރާވައި ހިންގުމުގައި އެ މުއައްސަސާތަކާ ވިލަރެސްކުރުން.

54. މޯލްޑިވްސް ނޭޝަނަލް ސަރވިސްގެ ތަމްރީނު ފުރިހަމަކުރާ ފަރާތްތައް އެކްޓިވް ސަރވިސްގެ މުއްދަތުގައި ޚިދުމަތްކުރުމަށް ރައީސުލްޖުމްހޫރިއްޔާގެ ލަފާގެ މަތިން ކަނޑައަޅާ ތަންތަނުގައި ޚިދުމަތްކުރުމުގެ އިންތިޒާމުތައް ހަމަޖައްސައިދިނުން.

55. މޯލްޑިވްސް ނޭޝަނަލް ސަރވިސްގެ މެންބަރުންގެ ތެރެއިން އެކްޓިވް ސަރވިސްގެ މުއްދަތު ފުރިހަމަކުރާ ފަރާތްތައް ރައީސުލްޖުމްހޫރިއްޔާގެ ލަފާއާއެކު ރިޒާވް މެންބަރުންގެ ގޮތުގައި ރަޖިސްޓަރީކުރުމާއި، ރިޒާވް މެންބަރުންނާ ގުޅޭގޮތުން ހަމަޖައްސަންޖެހޭ އިދާރީ އިންތިޒާމުތައް ހަމަޖެއްސުން.

56. މޯލްޑިވްސް ނޭޝަނަލް ސަރވިސްގެ މެންބަރުން ޤައުމީ ޚިދުމަތަށް ނެރެންޖެހޭ ހާލަތްތަކުގައި އެ މެންބަރުންނަށް ޤައުމީ ޚިދުމަތަށް ނުކުތުމަށް އެންގުމުގެ ނޯޓިސް ފޮނުވުމާއި، ޤައުމީ ޚިދުމަތުގައި ހޭދަކުރާ މުއްދަތުގައި
އެ މެންބަރުންގެ އިދާރީ އިންތިޒާމުތައް ހަމަޖެއްސުން.

57. މޯލްޑިވްސް ނޭޝަނަލް ސަރވިސްގެ ނިޒާމު ހިންގުމަށް ބޭނުންވާ ބަޖެޓު އެކުލަވައިލުމާއި، އެ ނިޒާމު ހިންގުމަށް ބޭނުންވާ ވަސީލަތްތަކާއި އާލާތްތައް ހޯދުމާއި، ނޭޝަނަލް ސަރވިސްގެ މެންބަރުންގެ އިނާޔަތްތަކާގުޅޭ ކަންކަން ބެލެހެއްޓުން.

58. މޯލްޑިވްސް ނޭޝަނަލް ސަރވިސްގެ ނިޒާމު ކުރިޔަށްދާގޮތް ވަޒަންކުރުމާއި، އެ ނިޒާމު އިތުރަށް ހަރުދަނާކޮށް ތަރައްޤީކުރުމަށް ކުރަންޖެހޭ ކަންކަން ކުރުން.

59. ޤައުމީ ތަރައްޤީގެ ޕްލޭނާ އެއްގޮތްވާ ގޮތުގެ މަތިން، މިނިސްޓްރީގެ ދާއިރާއާ ގުޅުންހުރި ތަރައްޤީގެ މަޝްރޫޢުތައް އެކުލަވައިލުމާއި، ކަމާބެހޭ ފަރާތްތަކާ ގުޅިގެން އެ މަޝްރޫޢުތައް ރާވައި ހިންގުމާއި، މޮނިޓަރކޮށް އިވެލުއޭޓްކުރުން.

60. ދިވެހިރާއްޖޭގެ ފަރާތުން ސޮއިކޮށް ތަޞްދީޤުކޮށްފައިވާ ބައިނަލްއަގުވާމީ އަދި ސަރަހައްދީ މުޢާހަދާތަކާއި އެއްބަސްވުންތަކުގައި މިނިސްޓްރީން ކުރުން ލާޒިމުކުރާ އެންމެހައި ކަންކަން ހިންގައި ތަންފީޒުކުރުން.

61. މިނިސްޓްރީގެ ދާއިރާއިން އެކުލަވައިލަންޖެހޭ ޤާނޫނުތަކުގެ ދެލިކޮޕީ އެކުލަވައިލުމުގައި ކަމާބެހޭ ފަރާތްތަކަށް ފަންނީ އެހީތެރިކަން ފޯރުކޮށްދިނުން.

62. މިނިސްޓްރީގެ މަސައްކަތްތަކާ ގުޅިގެން، ޤާނޫނީގޮތުން ހިންގަންޖެހޭ ކަންތައްތައް ހިންގައި ބެލެހެއްޓުން.

ތިރީގައި މިވާ ތަންތަން ހިނގަމުންދާނީ، މިނިސްޓްރީ އޮފް ޑިފެންސްގެ ދަށުންނެވެ.

(ހ) އޭވިއޭޝަން އެންޑް ޕޯޓް ސެކިއުރިޓީ ކޮމާންޑް

(ށ) ނޭޝަނަލް ކައުންޓަރ ޓެރަރިޒަމް ސެންޓަރ

(ނ) މޯލްޑިވްސް ހައިޑްރޯގްރަފިކް ސަރވިސް

(ހ) އޭވިއޭޝަން އެންޑް ޕޯޓް ސެކިއުރިޓީ ކޮމާންޑްގެ މަސައްކަތްތައް

ދިވެހިރާއްޖޭގެ މަދަނީ ވައިގެ ބަނދަރުތަކާއި ބައިނަލްއަގުވާމީ ކަނޑުގެ ބަނދަރުތަކާއި ޕޯޓް ފެސިލިޓީތަކުގެ ސަލާމަތާއި ރައްކާތެރިކަން ބެލެހެއްޓުމަށްޓަކައި އަންނަނިވި ކަންކަން ކުރުން:

1.     މަދަނީ ވައިގެ ދަތުރުފަތުރާއި ބައިނަލްއަގުވާމީ ކަނޑުގެ ބަނދަރުތަކުގެ ސަލާމަތްތެރިކަމަށް ނުރައްކާ ކުރިމަތިވެދާނެ ހާލަތްތަކާއި ކަންކަން ދެނެގަނެ، އެފަދަ ހާލަތްތަކާއި ކަންކަމާ ގުޅިގެން ވަގުތުން ފިޔަވަޅު އަޅައި އެކަންކަން ހުއްޓުވުމުގެ ނިޒާމުތައް، ކަމާގުޅުން ހުރި ގަވާއިދުތަކާއި ޕްރޮގްރާމްތަކާއި އުޞޫލުތަކާއި މިންގަނޑުތަކާ އެއްގޮތަށް، މަދަނީ ވައިގެ ބަނދަރުތަކާއި ބައިނަލްއަގުވާމީ ކަނޑުގެ ބަނދަރުތަކުގައި ގާއިމުކުރުން.

2.     މަދަނީ ވައިގެ ދަތުރުފަތުރާއި ބައިނަލްއަގުވާމީ ކަނޑުގެ ބަނދަރުތަކުގެ ސަލާމަތްތެރިކަމާ ގުޅޭގޮތުން މިނިސްޓްރީން ކަނޑައަޅާ ސިޔާސަތުތަކާއި، އެ ދާއިރާތަކުން އެކުލަވައިލައިފައިވާ ގަވާއިދުތަކާއި ޕްރޮގްރާމްތަކާއި އުޞޫލުތަކާއި މިންގަނޑުތަކުގެ ދަށުން، ޕޯޓް އެންޑް އޭވިއޭޝަން ސެކިއުރިޓީ ސަރވިސް ޕްރޮވައިޑަރގެ ހައިސިއްޔަތުން ކުރަންޖެހޭ އެންމެހައި ކަންކަން ކުރުން.

3.     މަދަނީ ވައިގެ ބަނދަރުތަކުން ޚިދުމަތް ލިބިގަންނަ ފަރާތްތަކަށް ރައްކާތެރި މާޙައުލެއް ގާއިމުކޮށް ދެމެހެއްޓުމަށްޓަކައި ވައިގެ ބަނދަރުތަކުގެ އެންމެހައި ސަރަހައްދުތަކާއި، ވައިގެ ބަނދަރުތަކުގައި ހެދިފައިވާ ހާބަރުތަކާއި، ވަށައިގެންވާ ސަރަޙައްދުތަކުގައި ފޯރިމަރައި ބެލެހެއްޓުމާއި، ވައިގެ ބަނދަރުތަކުގައި ޖައްސާ އަދި ފުރާ އުޅަނދުފަހަރާއި، ވައިގެ ބަނދަރުތަކުގެ އޭވިއޭޝަން ސެކިއުރިޓީ އާއި ގުޅުންހުރި ތަންތަނާއި ތަކެތި ރައްކާތެރިކޮށް ބެލެހެއްޓުން.

4.     ބައިނަލްއަގުވާމީ ކަނޑުގެ ބަނދަރުތަކުން ޚިދުމަތް ލިބިގަންނަ ފަރާތްތަކަށް ރައްކާތެރި މާޙައުލެއް ގާއިމުކޮށް ދެމެހެއްޓުމަށްޓަކައި ކަނޑުގެ ބަނދަރުތަކުގެ ޕެރިމީޓަރ ސެކިއުރިޓީ ބެލެހެއްޓުމާއި، ބަނދަރުގެ ސަރަޙައްދުގައި ފޯރިމަރައި ބެލެހެއްޓުން.

5.     މަދަނީ ވައިގެ ބަނދަރުތަކާއި ބައިނަލްއަގުވާމީ ކަނޑުގެ ބަނދަރުތަކުން ފުރައިގެންދާ އުޅަނދުފަހަރާއި، އެ އުޅަނދުފަހަރުގައި އުފުލާ ކާގޯއާއި، އުޅަނދުތަކަށް އަރުވާ ބާލާ ޕްރޮވިޝަންސްއާއި އެހެނިހެން އެފަދަ ތަކެއްޗާއި، ދަތުރުކުރާ ފަސިންޖަރުންނާއި ކުރޫންނާއި، އެ މީހުން ގެންދާ ތަކެތި ބަލައި ފާސްކުރުން.

6.     މަދަނީ ވައިގެ ބަނދަރުތަކާއި ބައިނަލްއަގުވާމީ ކަނޑުގެ ބަނދަރުތަކުގައި މަސައްކަތްކުރާ މުވައްޒަފުން ބަލައި ފާސްކުރުން.

7.     މަދަނީ ވައިގެ ބަނދަރުތަކާއި ބައިނަލްއަގުވާމީ ކަނޑުގެ ބަނދަރުތަކުގެ ސެކިއުރިޓީ ރެސްޓްރިކްޓެޑް އޭރިއާތަކަށް ވަދެނުކުމެވާ އެއްގަމު އުޅަނދުތަކަށް ހުއްދަދިނުމާއި އެ އުޅަނދުތައް ބަލައި ފާސްކުރުން.

8.     ދިވެހިރާއްޖޭގެ ބައިނަލްއަގުވާމީ ކަނޑުގެ ބަނދަރުތަކުގެ އާންމު ސަރަހައްދުތަކަށް ވަދެނުކުމެވާ އެއްގަމު އުޅަނދުތަކާއި، ދިވެހިރާއްޖޭގެ ބައިނަލްއަގުވާމީ ކަނޑުގެ ބަނދަރުތަކަށް އަންނަ ރާއްޖެއިން ބޭރަށް ދަތުރުކުރާ އުޅަނދުތައް ފިޔަވައި އެ ބަނދަރުތަކަށް ވަދެނުކުމެވާ ކަނޑުގެ އުޅަނދުފަހަރަށް ހުއްދަދިނުމާއި އެ އުޅަނދުތައް ބަލައި ފާސްކުރުން.

9.     މަދަނީ ވައިގެ ބަނދަރުތަކާއި ބައިނަލްއަގުވާމީ ކަނޑުގެ ބަނދަރުތަކުގެ ސަލާމަތްތެރިކަން ބެލެހެއްޓުމަށް ގާއިމުކޮށްފައިވާ ސަރވައިލެންސް އަދި މޮނިޓަރިންގ (ސީ.ސީ.ޓީ.ވީ ސިސްޓަމް ފަދަ) ނިޒާމްތަކާއި އެ ނިޒާމުތަކާއި ގުޅުންހުރި އާލާތްތައް މެދުކެނޑުމެއްނެތި އޮޕަރޭޓްކޮށް މޮނިޓަރކުރުން.

10. މަދަނީ ވައިގެ ބަނދަރުތަކާއި ބައިނަލްއަގުވާމީ ކަނޑުގެ ބަނދަރުތަކުގެ ސަލާމަތްތެރިކަމަށް ނުރައްކާ ކުރިމަތިވެދާނެ ހާލަތްތަކުގައި ޢަމަލުކުރަން ކަނޑައަޅާ ގޮތްތައް، އެއަރޕޯޓްތަކާއި ކަނޑުގެ ބަނދަރުތަކުގެ އިމަރޖެންސީ ރެސްޕޯންސް އަދި ސެކިއުރިޓީ ކޮންޓިންޖެންސީ ޕްލޭންތަކުގައި ހިމެނުމަށް ކަމާގުޅޭފަރާތްތަކަށް ފޮނުވައި، އެ ފަރާތްތަކާ ގުޅިގެން  އިމަރޖެންސީ ރެސްޕޯންސް އަދި ސެކިއުރިޓީ ކޮންޓިންޖެންސީގެ ފަރިތަކުރުންތައް ބާއްވައި ތަންފީޒުކުރުން.

11. މަދަނީ ވައިގެ ބަނދަރުތަކާއި ބައިނަލްއަގުވާމީ ކަނޑުގެ ބަނދަރުތަކުގެ ސަލާމަތްތެރިކަން ބެލެހެއްޓުމުގެ މަސައްކަތްތަކަށް އެކަށޭނެ ޒަމާނީ ވަސީލަތްތަކާއި މެޝިނަރީ އާއި އެހެނިހެން އާލާތް ހޯދުމަށް ކަމާބެހޭ ފަރާތްތަކާ ގުޅިގެން މަސައްކަތްކުރުން.

12. މަދަނީ ވައިގެ ދަތުރުފަތުރާއި ބައިނަލްއަގުވާމީ ކަނޑުގެ ބަނދަރުތަކުގެ ސަލާމަތްތެރިކަމާ ގުޅޭ ގަވާއިދުތަކާއި ޕްރޮގްރާމްތަކާއި އުޞޫލުތަކާއި މިންގަނޑުތަކާ އެއްގޮތަށް، މަދަނީ ވައިގެ ދަތުރުފަތުރާއި ބައިނަލްއަގުވާމީ ކަނޑުގެ ބަނދަރުތަކުގައި ސެކިއުރިޓީ ފާހުގެ ނިޒާމު ގާއިމުކޮށް، އެ ނިޒާމު ހިންގުން.

13. މަދަނީ ވައިގެ ބަނދަރުތަކާއި ބައިނަލްއަގުވާމީ ކަނޑުގެ ބަނދަރުތަކުގެ އޮޕަރޭޓަރުންނާ ގުޅިގެން، އެ ތަންތަނުގެ "ސެކިއުރިޓީ ރެސްޓްރިކްޓެޑް އޭރިއާ"ތައް ކަނޑައެޅުމާއި، އެ ސަރަޙައްދުތަކަށް ވަނުމުގެ ހުއްދަ ދިނުން.

14. މަދަނީ ވައިގެ ބަނދަރުތަކާއި ބައިނަލްއަގުވާމީ ކަނޑުގެ ބަނދަރުތަކުގެ ސަލާމަތްތެރިކަމާ ގުޅުންހުރި މުހިންމު މައުލޫމާތު އެއްކޮށް، ކަނޑައަޅައިފައިވާ އުސޫލުތަކާ އެއްގޮތަށް، ދިވެހިރާއްޖެ އާއި ބައިނަލްއަޤްވާމީ އިދާރާތަކާ ހިއްސާކުރުން.

15. މަދަނީ ވައިގެ ބަނދަރުތަކާއި ބައިނަލްއަގުވާމީ ކަނޑުގެ ބަނދަރުތަކުގެ ސެކިއުރިޓީ އެސެސްމަންޓްތައް ހެދުން.

16. ހުރިހާ ވަގުތެއްގައި ފަސޭހައިން ބޭނުންކުރެވޭނެ ޕްރައިމަރީ އަދި ބެކްއަޕް މުވާސަލާތީ ނިޒާމުތައް މަދަނީ ވައިގެ ބަނދަރުތަކާއި ބައިނަލްއަގުވާމީ ކަނޑުގެ ބަނދަރުތަކުގައި ގާއިމުކޮށް ބެލެހެއްޓުން.

17. މަދަނީ ވައިގެ ބަނދަރުތަކާއި ބައިނަލްއަގުވާމީ ކަނޑުގެ ބަނދަރުތައް ޓެރަރިޒަމާއި ޣައިރު ޤާނޫނީ ޢަމަލުތަކުން ރައްކާތެރިކޮށް ދެމެހެއްޓުމަށްޓަކައި އޭވިއޭޝަން ސެކިއުރިޓީއާއި ޕޯޓް ސެކިއުރިޓީގެ ދާއިރާއިން ބޭނުންވާ ފަންނީ މީހުން ބިނާކުރުމާއި، އެ ދާއިރާތަކުން މުވައްޒަފުން ތަމްރީނުކުރުން.

18. މަދަނީ ވައިގެ ބަނދަރުތަކާއި ބައިނަލްއަގުވާމީ ކަނޑުގެ ބަނދަރުތަކުގައި ހިންގާ ޤާނޫނާއި ގަވާއިދާ ޚިލާފު ޢަމަލުތައް ތަޙުޤީޤުކުރުމުގައި ކަމާބެހޭ ފަރާތްތަކަށް އެހީތެރިކަން ފޯރުކޮށްދިނުން.

19. މަދަނީ ވައިގެ ދަތުރުފަތުރުގެ ސަލާމަތްތެރިކަމާއި ބައިނަލްއަގުވާމީ ކަނޑުގެ ބަނދަރުތަކުގެ ސަލާމަތްތެރިކަމާބެހޭ ޤާނޫނުތަކާއި ގަވާއިދުތައް ކަމާބެހޭ އިދާރާތަކާ ގުޅިގެން ތަންފީޒުކުރުން.

20. ދިވެހިރާއްޖޭގެ ބައިނަލްއަގުވާމީ ކަނޑުގެބަނދަރުތަކަށް ދަތުރުކުރާ އުޅަނދުތަކުގެ "ޝިޕް ސެކިއުރިޓީ އޮފިސަރުން"އާ ގުޅިގެން އެ އުޅަނދުތަކުގެ ސަލާމަތީ ކަންކަން ބެލެހެއްޓުން.

21. ބައިނަލްއަގުވާމީ ކަނޑުގެ ބަނދަރުތަކުގައި ޕޯޓް ސެކިއުރިޓީ ކޮމިޓީތައް އެކުލަވާލައި، އެ  ކޮމިޓީތަކުގެ މަސައްކަތްތައް ރާވައި ހިންގުމާއި، އެ ކޮމިޓީތަކުގެ ސެކްރެޓޭރިއަޓް ބެލެހެއްޓުން

(ށ) ނޭޝަނަލް ކައުންޓަރ ޓެރަރިޒަމް ސެންޓަރގެ މަސައްކަތްތައް

1.     އެންޓި ޓެރަރިޒަމާއި، ކައުންޓަރ ޓެރަރިޒަމާ ގުޅުންހުރި އެންމެހައި ކަންތައްތައް ޤައުމީ ފެންވަރުގައި ވިލަރެސްކުރުން.

2.     ޓެރަރިޒަމްގެ ޢަމަލުތަކާ ދެކޮޅަށް ބައިނަލްއަގުވާމީ ފަރާތްތަކުން ފިޔަވަޅު އެޅުމުގައި ގެންގުޅޭ މިންގަނޑުތައް ބަލައި ދިރާސާކޮށް، ދިވެހިރާއްޖޭގެ މާޙައުލާ ގުޅޭގޮތަށް ރާއްޖޭގައި ކައުންޓަރ ޓެރަރިޒަމާއި އެންޓި ޓެރަރިޒަމްގެ ފިޔަވަޅުތައް ބައްޓަންކުރުން.

3.     ދައުލަތުގެ އިދާރާތަކަށް ލިބޭ ޓެރަރިޒަމާގުޅޭ އިންޓެލިޖެންސާއި މަޢުލޫމާތު އެނަލައިޒްކުރުމާއި، ޓެރަރިޒަމާ ގުޅުންހުރި އިންޓެލިޖެންސާއި މަޢުލޫމާތު ރައްކާތެރިކަމާއެކު ބަދަލުކުރުމަށް ކަމާބެހޭ މިނިސްޓަރު އެކުލަވައިލާ  އޮނިގަނޑާ އެއްގޮތަށް ކަމާބެހޭ ދައުލަތުގެ އިދާރާތަކުގެ މެދުގައި އެ އިންޓެލިޖެންސާއި މަޢުލޫމާތު ބަދަލުކުރުމުގައި އެހީތެރިވެދީ، އެ އިންޓެލިޖެންސާއި މަޢުލޫމާތު ބަދަލުކުރުމުގެ ކަންކަން ވިލަރެސްކުރުން.

4.     ޓެރަރިޒަމަށް ވާގިވެރިވުމުގެ ގޮތުން ހިންގާ ޢަމަލުތަކާއި، އެފަދަ ޢަމަލުތައް ހިންގުމަށް ފައިސާ ހޯދާ މަގުތަކާއި، އެފަދަ ފައިސާ ދައުރުކުރާ ފަންޑުތަކާބެހޭ މަޢުލޫމާތު ދައުލަތުގެ ކަމާބެހޭ ފަރާތްތަކުގެ މެދުގައި ހިއްސާކުރުމުގެ މަސައްކަތް ފަހިކޮށްދިނުމާއި ވިލަރެސްކުރުން.

5.     ޓެރަރިޒަމްގެ ޢަމަލު ހިންގާ ފަރާތްތަކާއި އެފަދަ ޢަމަލު ހިންގުމަށް އެހީތެރިވާ ފަރާތްތަކާއި ޓެރަރިޒަމަށް ފައިސާ ޚަރަދުކުރާ ފަރާތްތަކުގެ މުދަލާއި ފައިސާ ހިފެހެއްޓުމާބެހޭ އުސޫލުތަކާއި މިންގަނޑުތައް ކަނޑައެޅުމުގައި ކަމާބެހޭ ފަރާތްތަކަށް ބޭނުންވާ ފަންނީ އެހީތެރިކަން ފޯރުކޮށްދިނުމާއި، ބައިނަލްއަގުވާމީ މިންގަނޑުތަކަށް އަންނަ ބަދަލުތަކަށް ރިއާޔަތްކޮށް އެ އުސޫލުތަކާއި މިންގަނޑުތަކަށް ގެންނަންޖެހޭ ބަދަލުތައް ގެނައުމަށް ކަމާބެހޭ ފަރާތްތަކަށް އިރުޝާދުދިނުން.

6.     އެކިއެކި ވިސްނުންތަކުގައި ހައްދުފަހަނައަޅާފައިވާ ފަރާތްތަކަށް ފައިސާދީގެންނާއި، މަޢުލޫމާތާއި ތަމްރީނުދީގެންނާއި، މިނޫންވެސް ގޮތްގޮތުން ވާގިވެރިވެ އެހީތެރިވާ ފަރާތްތައް ދެނެގަނެ، އެ ފަރާތްތައް ހުއްޓުވުމަށްޓަކައި ކުރަންޖެހޭ ކަންތައްތައް ކަމާބެހޭ ފަރާތްތަކުން ކުރާކަން ކަށަވަރުކުރުން.

7.     އެކިއެކި ވިސްނުންތަކުގައި ހައްދުފަހަނައަޅާފައިވާ ފަރާތްތަކުން ރާއްޖޭގެ ސުލްޙަމަސަލަސްކަމާއި، އަމާންކަމަށް ނުރައްކާކުރުމަށް ހިންގާ ކަންތައްތަކާބެހޭ މަޢުލޫމާތު ދައުލަތުގެ ކަމާބެހޭ ފަރާތަކުގެ މެދުގައި ހިއްސާކުރުމުގައި އެހީތެރިވެދިނުމާއި އެކަންކަން ވިލަރެސްކުރުން.

8.     އެކިއެކި ވިސްނުންތަކުގައި ހައްދުފަހަނަޅާދިއުމަށް މެދުވެރިވާ ސަބަބުތަކާއި، ހާލަތްތަކާއި، އިޖުތިމާއީ ގޮންޖެހުންތައް ދެނެގަނެ، އެކަންކަމާބެހޭ ދިރާސާތައް ހަދައި، މިފަދަ ވިސްނުންތައް މުޖުމަޢުގައި އަށަގެންނެވުން ކުޑަކުރުމަށްޓަކައި އިޖުތިމާއީ ދާއިރާގެ ސަރުކާރުގެ ވުޒާރާތަކާއި ދައުލަތުގެ މުއައްސަސާތަކާއި، ހިލޭސާބަހަށް މަސައްކަތްކުރާ ޖަމާޢަތްތަކާއި ޖަމުޢިއްޔާތަކާ ގުޅިގެން މަސައްކަތްކުރުން.

9.     ޓެރަރިޒަމްގެ ޢަމަލުތަކަށް ހުށަހެޅިފައިވާ ފަރާތްތަކަށާއި، އެފަދަ ޢަމަލުތަކަށް ހުށަހެޅުމުގެ ފުރުޞަތު އޮތް ފަރާތްތަކަށާއި، ޓެރަރިޒަމްގެ ޢަމަލުތަކުގައި ބައިވެރިވެފައިވާ ފަރާތްތަކަށް (ޖަލުތަކުގައި ތިބި ޤައިދީންވެސް ހިމެނޭގޮތައް) ރިހެބިލިޓޭޝަން ޕްރޮގްރާތަކާއި ރީ-އިންޓަގްރޭޝަން ޕްރޮގްރާމްތައް ހިންގާކަން ކަށަވަރުކުރުން.

10. އެކިއެކި ވިސްނުންތަކުގައި ހައްދުފަހަނަޅާފައިވާ ފަރާތްތަކުން މީހުންގެ ފުރާނައާއި މުދަލަށް ގެއްލުންދިނުން ހުއްޓުވުމަށްޓަކައި، ބައިނަލްއަގުވާމީ އަދި ސަރަހައްދީ ފެންވަރުގައި ހިންގާ ހަރަކާތްތަކުގައި ބައިވެރިވެ ރާއްޖެ ތަމްސީލުކުރުން.

11. ކަންކަމުގައި ތިމާ ދެކޭގޮތް މުޖުތަމަޢުގައި އަށަގެންނެވުމަށް ބާރުގެ ބޭނުންކޮށްގެން ނުވަތަ ހަތިޔާރުގެ ބޭނުންކޮށްގެން ހިންގާ ހަރަކާތްތައް ހުއްޓުވުމަށްޓަކައި، ދައުލަތުގެ ކަމާބެހޭ އިދާރާތަކާ ގުޅިގެން އަޅަންޖެހޭ ފިޔަވަޅު އެޅުން.

12. ޤައުމީ ފެންވަރުގައި ކައުންޓަރ ޓެރަރިޒަމަށް ތައްޔާރުވެފައިވާ މިންވަރު ބެލުމުގެ ގޮތުން ޓެރަރިޒަމްގެ ހަމަލާތަކަށް ރެސްޕޮންޑް ކުރާނެގޮތުގެ ފަރިތަކުރުންތައް ބާއްވާކަން ކަށަވަރުކުރުން.

13. ކައުންޓަރ ޓެރަރިޒަމުގެ ސިޔާސަތުތަކާއި، ސްޓްރެޓްޖީތައް އެކުލަވާލުމުގައި ރައީސުލްޖުމްހޫރިއްޔާއަށާއި ޤައުމީ ސަލާމަތާބެހޭ މަޖިލީހަށް ލަފަޔާއި، އިރުޝާދުދިނުން.

14. ކައުންޓަރ ޓެރަރިޒަމްގެ ސިޔާސަތުތަކާއި، ސްޓްރެޓެޖީތައް ތަންފީޒުކުރުމުގައި ދައުލަތުގެ ކަމާބެހޭ އިދާރާތަކަށް އެހީތެރިކަމާއި އެއްބާރުލުން ދިނުމާއި، އެ އިދާރަތަކުގެ މެދުގައި ވިލަރެސްކުރުން.

15. ދައުލަތުގެ އިދާރާތަކުން ޓެރަރިޒަމާގުޅޭ އިންޓެލިޖެންސްއާއި މަޢުލޫމާތު އެއްކުރުމުގައާއި ދައުލަތުގެ އިދާރާތަކުގެ މެދުގައި އެ އިންޓެލިޖެންސް އާއި މަޢުލޫމާތު ހިއްސާކުރުމުގައި ޢަމަލުކުރާނެ ގޮތްތައް ކަނޑައެޅުމުގައި ކަމާބެހޭ ފަރާތްތަކަށް ލަފާދިނުން.

16. ޓެރަރިޒަމާ ދެކޮޅަށް "ކައިނެޓިކް" އޮޕަރޭޝަންތައް ހިންގުމަށް ބޭނުންވާ މަޢުލޫމާތު ފޯރުކޮށްދިނުމާއި، އެފަދަ އޮޕަރޭޝަންތައް ހިނގަމުންދާއިރު ބޭނުންވާ އެހީތެރިކަން ފޯރުކޮށްދިނުމާއި، ޓެރަރިޒަމާ ދެކޮޅަށް "ކައިނެޓިކް" އޮޕަރޭޝަންތައް ހިންގުމުގައި ޢަމަލުކުރަންވީ ގޮތްތަކާގުޅޭގޮތުން ކަމާބެހޭ ފަރާތްތަކަށް ބޭނުންވާ ލަފާދިނުން.

17. ޓެރަރިޒަމާ ދެކޮޅަށް ކުރެވޭ ބައިނަލްއަގުވާމީ މަސައްކަތްތަކުގައި ދިވެހިރާއްޖެ ތަމްސީލުކުރުން.

18. ބައިނަލްއަގުވާމީ، ސަރަހައްދީ އަދި ޤައުމީ ފެންވަރުގައި ޓެރަރިޒަމާގުޅޭ ޢިލްމީ ދިރާސާކޮށް، ދިރާސާ ކަރުދާސް ލިޔެ ޝާއިޢުކުރުން.

19. ޓެރަރިޒަމުގެ ނުރައްކަލާ ބެހޭގޮތުންނާއި، ޓެރަރިޒަމުން ރައްކާތެރިވުމަށް ކުރަންޖެހޭ ކަންތައްތަކާއި ބެހޭގޮތުން ދައުލަތުގެ އިދާރާތަކަށާއި، ސިނާއީ މަރުކަޒުތަކަށާއި، ޓޫރިސްޓް ރިސޯޓުތަކަށާއި، އިޖުތިމާއީ ޚިދުމަތް ފޯރުކޮށްދޭ ތަންތަނަށާއި، އާންމު ރައްޔިތުންނަށް މަޢުލޫމާތު ފޯރުކޮށްދީ، ހޭލުންތެރިކަން އިތުރުކުރުން.

20. އެންޓި ޓެރަރިޒަމާއި ކައުންޓަރ ޓެރަރިޒަމާބެހޭ ކަންކަމުގައި ބޭރުގެ ފަރާތްތަކުގެ އެހީތެރިކަން ހޯދުމާއި، އެފަރާތްތަކާއެކު މަސަތްކަތްކުރުން.

21. ޓެރަރިޒަމާބެހޭ ޤާނޫނާއި، ޓެރަރިޒަމާ ގުޅުންހުރި ޤާނޫނުތައް ސަލާމަތީ ބާރުތަކުންނާއި އެހެނިހެން އިދާރާތަކުން ތަންފީޒުކުރަމުން ގެންދާގޮތް އޮޅުންފިލުވައި، ހަރުދަނާކުރަންޖެހޭ ކަންކަން ދެނެގަނެ،
އެ ކަންތައްތައް ރައީސުލްޖުމްހޫރިއްޔާއަށާއި ޤައުމީ ސަލާމަތާބެހޭ މަޖިލީހަށް ހުށަހެޅުން.

(ނ) މޯލްޑިވްސް ހައިޑްރޯގްރަފިކް ސަރވިސްގެ މަސައްކަތްތައް

1.     ދިވެހިރާއްޖޭގެ ސަރަހައްދުތަކުގެ ހައިޑްރޯގްރަފިކް ސަރވޭތައްކޮށް، މަޢުލޫމާތު އެއްކޮށް ބެލެހެއްޓުން.

2.     މެރިން ސްޕޭޝަލް ޑޭޓާ އިންފްރާސްޓްރަކްޗަރ (އެމް.އެސް.ޑީ.އައި.) ގާއިމުކޮށް ބެލެހެއްޓުން.

3.     ސަރުކާރުގެ އިދާރާތަކުގެ ބޭނުންތަކަށް ކުރާ ހައިޑްރޯގްރަފިކް ސަރވޭތަކުގެ މަޢުލޫމާތު ހޯދައި، މަޢުލޫމާތު އެއްކޮށް ބެލެހެއްޓުން.

4.     ސަރުކާރުގެ އިދާރާތަކުން ކުރިއަށްގެންދާ މަސައްކަތްތަކަށް ބޭނުންވާ ހައިޑްރޯގްރަފިކް މަޢުލޫމާތު ފޯރުކޮށްދިނުމާއި، އެ ފަރާތްތަކަށް ބޭނުންވާ ފަންނީ ލަފައާއި މަޝްވަރާދިނުން.

5.     ދިވެހިރާއްޖޭގެ ސަރަހައްދުތަކުގެ ނިޔަމިކަމުގެ ޗާޓުތައް ކުރަހައި އަދާހަމަކޮށް އާންމުކުރުމާއި، ނޯޓިކަލް ޕަބްލިކޭޝަންތައް ޝާއިޢުކޮށް އަދާހަމަކުރުން.

6.     ދިވެހިރާއްޖޭގެ ސަރަހައްދުތަކުގައި ކަނޑު ދަތުރުފަތުރު ކުރުމަށް ބޭނުންވާ ނިޔަމިކަމުގެ ސަލާމަތާއި ރައްކާތެރިކަމާބެހޭ މަޢުލޫމާތު ކަމާބެހޭ ފަރާތްތަކަށް ފޯރުކޮށްދިނުމާއި، ކަނޑައެޅިފައިވާ އުސޫލުތަކާ އެއްގޮތަށް އެފަދަ މަޢުލޫމާތު އާންމުކުރުން.

7.     ހައިޑްރޯގްރަފީގެ ދާއިރާގެ ބައިނަލްއަގުވާމީ އޯގަނައިޒޭޝަންތަކާއި ޖަމުޢިއްޔާތަކުގައި ބައިވެރިވެ ރާއްޖެ ތަމްސީލްކުރުމާއި، ހައިޑްރޯގްރަފީގެ ދާއިރާއިން ރާއްޖެއާއި، ރާއްޖޭން ބޭރުގެ ފަރާތްތަކާ ގުޅިގެން ކުރަންޖެހޭ ކަންތައްތައް ކުރުން.

8.     ރާއްޖޭގައި ހައިޑްރޯގްރަފީގެ ދާއިރާ ކުރިއެރުވުމަށް ބައިނަލްއަޤުވާމީ އެހީ (ގްރާންޓް) ހޯދުމަށް މަސައްކަތްކުރުން.

9.     ހައިޑްރޯގްރަފީގެ ދާއިރާއަށް ބޭނުންވާ މީހުން ތަމްރީނުކުރުމާއި، އެ ދާއިރާއިން އިންސާނީ ވަސީލަތްތައް ތަރައްޤީކުރުމަށްޓަކައި ކަމާބެހޭ ފަރާތްތަކަށް ބޭނުންވާ ފަންނީ ލަފައާއި އެހީތެރިކަން ފޯރުކޮށްދިނުން.

10. ހައިޑްރޯގްރަފީއާ ގުޅުންހުރި ކަންތައްތަކުގައި ޤައުމީފެންވަރުގައި ފޯކަލްޕޮއިންޓެއްގެ ގޮތުގައި މަސައްކަތްކުރުން.