ލީބިޔާގައި އުދުހުން މަނާ ސަރަޙައްދެއް ޤާއިމު ކުރުމަށް، އ.ދ.ގެ ސަލާމަތީ މަޖިލީހުން ފާސްކުރި ޤަރާރު 1973، ބައިނަލްއަޤްވާމީ މުޖްތަމަޢުން ތަންފީޒުކުރަމުން ގެންދާ ގެންދިއުމަށް ދިވެހި ސަރުކާރުން މަރުޙަބާ ވިދާޅުވެއްޖެއެވެ. އަދި، ލީބިޔާގެ ޢާންމު ރައްޔިތުންނަށް ވީހާވެސް ގެއްލުން ނުލިބޭނެ ގޮތަކަށް މި ޤަރާރު ތަންފީޒު ކުރަމުން ގެންދާނެ ކަމަށްވެސް ދިވެހި ސަރުކާރުން އުންމީދު ކުރައްވައެވެ. މިކަން ހާމަކުރައްވާފައިވަނީ، ރައީސުލްޖުމްހޫރިއްޔާގެ އޮފީހުން މިއަދު ނެރުއްވި ބަޔާނެއްގައެވެ.
މީގެއިތުރުން، ލީބިޔާގައި ކާނަލް ޤައްޒާފީގެ ވެރިކަން ވީއެންމެ އަވަހަކަށް ނިމުމަކަށް އައިސް، ޔުނިވަރސަލް ޑެކްލަރޭޝަން އޮފް ހިއުމަން ރައިޓްސްގައި ކަށަވަރު ކޮށްދީފައިވާ އަސާސީ އިންސާނީ ޙައްޤުތައް އެ ޤައުމުގެ ރައްޔިތުންނަށް ލިބިދެވޭނެކަމަށް ރާއްޖެއިން އެދޭކަން މި ބަޔާނުގައިވެސް ތަކުރާރު ކުރައްވާފައިވެއެވެ.