بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ لَّلهِ رَبِّ الْعاَلَمِينْ، وَالصَّلاَة ُوَالسَّلاَمُ عَلَى سَيِّدنَا مُحَمَّدٍ وَعَلَى آلهِ وَصَحْبِهِ أَجْمَعِينْ.
ދިވެހިރާއްޖޭގައި ޤައުމީ ފެންވަރުގައި ފާހަގަކުރާ ފުރަތަމަ އިންޖިނޭރުންގެ ދުވަހުގެ މުނާސަބަތުގައި، ޚިދުމަތުގެ އެކި ދާއިރާތަކުގައި މަސައްކަތް ކޮށްދެއްވާފައިވާ އަދި މިހާރު މަސައްކަތް ކުރައްވަމުން ގެންދަވާ ހުރިހާ އިންޖިނޭރުންނަށް މަރްޙަބާއާއި ޝުކުރު ދަންނަވަމެވެ.
އިންޖިނޭރުންގެ ދުވަސް ފާހަގަކުރަން މި ފެށީ، ރާއްޖޭގައި މިހާތަނަށް ކުރެވިފައިވާ އިންޖިނޭރިންގގެ އެންމެ ބޮޑު އެއް މަސައްކަތް ކަމުގައިވާ ސިނަމާލެ ބުރިޖު ހުޅުވުނުތާ 7 އަހަރު ފުރުނު ދުވަހުއެވެ. ކަނޑު ހުރަސްކޮށް ބިނާކުރި މި ބުރިޖުގެ ސަބަބުން މާލެއާއި ހުޅުމާލޭގައި ދިރިއުޅޭ ބޮޑު އާބާދީ އެއްފަސްވެ، ރާއްޖޭގެ މައި އެއަރޕޯޓާވެސް އެއްގަމުން މިވަނީ ގުޅައިލެވިފައެވެ. މި ވޭތުވެދިޔަ 7 އަހަރުގެ ތެރޭގައި ދިވެހީންގެ ދިރިއުޅުމަށާއި، އިޤްތިޞާދަށް އަދި އިޖްތިމާޢީ ހުރިހާ ޚިދުމަތަކަށް ވަރަށް ބޮޑު ހެޔޮ ބަދަލެއް މި ބުރިޖުން ވަނީ ގެނެސްދީފައެވެ. މިކަމުން ކަށަވަރުވަނީ، އިންޖިނޭރިންގގެ މިފަދަ ބިޔަ މަސައްކަތަކުން ޤައުމަކަށް އަންނާނެ ހެޔޮ ބަދަލާއި ހަލުވި ކުރިއެރުމެވެ.
ޢުމްރާނީ ތަރައްޤީގެ އިތުރުން، ޞިނާޢީ އެކި މަސައްކަތްތަކާއި އިޖްތިމާޢީ ޚިދުމަތްތަކާއި، ދަތުރުފަތުރާއި، ހަކަތައާއި ސައިންސާއި، ޓެކްނޮލޮޖީގެ އެކި ދާއިރާތަކުގައިވެސް ތަފާތު ފަންނުގެ އިންޖިނޭރުން ޤައުމަށް ޚިދުމަތް ކުރައްވައެވެ. 2040 ވަނަ އަހަރަށް ދާއިރު ތަރައްޤީވެފައިވާ ޤައުމަކަށް ދިވެހިރާއްޖެ ހެދުމަށް ކަނޑައަޅާފައިވާ ލަނޑުދަނޑި ޙާޞިލްކުރުމުގައި، އަދި ޑިޖިޓަލް ދިވެހިރާއްޖެއެއްގެ އަމާޒަށް ވާޞިލުވުމަށް ފަށާފައިވާ މަސައްކަތުގައި، އަދި އިޢާދަކުރަނިވި ހަކަތަ ބޭނުންކުރާ މިންވަރު 33 އިންސައްތައަށް އިތުރުކުރުމަށް ހިންގާ މަޝްރޫޢު ފަދަ ހުރިހާ ކަމެއްގައިވެސް މި ދެންނެވި އެކި ދާއިރާތަކުގެ އިންޖިނޭރުންގެ ޢިލްމާއި، ތަޖްރިބާއާއި، އެހީތެރިކަމަށް ނުހަނު ބޮޑަށް ޤައުމު ބޭނުންވެއެވެ. ދިވެހިރާއްޖެއަށް ލިބިފައިވާ ޚާއްޞަ ސިފަތަކާއެކު، ރަށްވެހިކަމާއި ތަމައްދުންގެ ޒަމާނީ ކުރިބޯށިތަކާ ހަމަޔަށް ދެވޭނީ، ދިވެހި އިންޖިނޭރުންގެ ވިސްނުމާއި ރޭވުންތެރިކަމުން މަގުދައްކައިދީގެންނެވެ.
އިންޖިނޭރުން ޤައުމަށް ކޮށްދޭ ޚިދުމަތުގެ އަގު ވަޒަންކުރުމުގެ ގޮތުން އިރާދަކުރެއްވިއްޔާ މި އަންނަ 2026 ވަނަ އަހަރުން ފެށިގެން، އިންޖިނޭރުންގެ ޤައުމީ އެވޯޑް ސަރުކާރުން ދޭން ފަށާނަމެވެ. އަދި، އިންޖިނޭރުންގެ ޢިލްމީ ދިރާސާތަކަށް ފުރުޞަތު ފަހިކޮށްދީ، އެކި ދާއިރާތަކުން އިންޖިނޭރުކަން ކިޔަވައިދީ ތަމްރީނު ދިނުމަށް ސަރުކާރުންދޭ ސަމާލުކަން އިތުރުކުރާނަމެވެ.
ދިވެހި ކާބަފައިންނަކީ މާޒީގައިވެސް ފަންނުވެރި ހުނަރުވެރި ފާޑުވެރި ބަޔެކެވެ. އޮޑިދޯނިފަހަރު ކިއްސަރަށް ބަނުމުގައި ދިވެހި މާވަޑީންގެ ހުޝިޔާރުކަމާއި، ގަލުވަޑާމުގެ ޗާލު ބިނާތައް ކުރުމުގައި ދިވެހި މަސައްކަތްތެރީންގެ ހީވާގިކަން މިކަމަށް ހެކިދެއެވެ. އެ ދުވަހުއްސުރެ މިއަދާ ހަމަޔަށްވެސް ރާއްޖޭގެ ތަރައްޤީ ނެގެހެއްޓުމުގައި ދިވެހި އިންޖިނޭރުން އަދާކުރި ޤައުމީ ވާޖިބަށް ސާބަހާއި ތާރީފު ޙައްޤެވެ.
ދިވެހި ހުނަރުވެރި ސިކުނޑިތަކާއި، މަސައްކަތްތެރި މުލައްދަނޑިތަކުން މި ޤައުމު ބިނާކުރުމަށް ރެޔާއިދުވާލު މިކުރާ މަސައްކަތުގައި މާތްﷲ ބަރަކާތް ލައްވާށިއެވެ. ދިވެހިރާއްޖެއަށް ތަހުޒީބާއި ވިޔަވަތިކަމުގެ ރަން ޒަމާނެއް މިންވަރު ކުރައްވާށިއެވެ. އާމީން.