ޖަޕާނު ރައްޔިތުންނާއެކު ދިވެހި ރައްޔިތުންނާއި ދިވެހި ޤައުމު އޮތްކަން އަންގައިދިނުމަށްޓަކައި "ޖަޕާނާއެކު ދިވެހިން" މި ޝިޢާރުގެ ދަށުން މިއަދު ފެށުނު ހަރަކާތުގައި ރާއްޖޭގެ ވީހާވެސް ގިނަ ރައްޔިތުން ބައިވެރިވެވަޑައިގެން ދެއްވުމަށް ރައީސުލްޖުމްހޫރިއްޔާ މުޙަންމަދު ނަޝީދު އެދިވަޑައިގެންފިއެވެ. ރައީސުލްޖުމްހޫރިއްޔާ މިކަމަށް އެދިވަޑައިގަތީ، މިއަދު އެމަނިކުފާނު ދެއްވި ހަފްތާގެ ރޭޑިޔޯ ޚިޠާބުގައި، މިދިޔަ ހުކުރު ދުވަހު ޖަޕާނަށް އައި ބާރުގަދަ ބިންހެލުމާއި، އަދި އެ ބިންހެލުމާ ގުޅިގެން އުފެދުނު ސުނާމީގައި، އެ ޤައުމުގެ އެތައް ބަޔަކު މަރުވެ، ޢިމާރާތްތަކާއި ގެދޮރާއި މުދަލަށްވެސް ބޮޑެތި ގެއްލުންތަކެއް ލިބިފައިވާތީ، ޖަޕާނުގެ ރައްޔިތުންނަށް ހަމްދަރުދީ ފާޅުކުރުމަށާއި، ޖަޕާނު ރައްޔިތުންނަށް އެހީވުމަށް ކުރެވެމުންދާ މަސައްކަތްތަކުގެ މައްޗަށް ބައްލަވާލައްވައި ވާހަކަފުޅު ދައްކަވަމުންނެވެ.
ޖަޕާނަކީ ވަރަށް ކުރިއްސުރެ ފެށިގެން ރާއްޖެއާ ވަރަށް ގާތް ގުޅުމެއް އޮންނަ އަދި ރާއްޖޭގެ ތަރައްޤީގައި ވަރަށް މުހިންމު ދައުރެއް އަދާކޮށްފައިވާ އަދި އަދާކުރަމުންދާ ޤައުމެއްކަން ރައީސުލްޖުމްހޫރިއްޔާ ފާހަގަކުރެއްވިއެވެ. އެމަނިކުފާނު ވިދާޅުވިގޮތުގައި، ޖަޕާނުން ރާއްޖެއަށް އެހީތައް ވެދެއްވާފައިވާ ދާއިރާތައް ވަރަށް ގިނައެވެ. ރާއްޖެއަށް ދިމާވާ ކޮންމެ ބޮޑު ކަމެއްގައިވެސް އެންމެ ފުރަތަމަ އެހީތެރިވެދޭ ޤައުމުތަކުގެ ތެރޭގައި ޖަޕާނު ހިމެނެއެވެ. ސުނާމީ ކާރިސާގައި ޖަޕާނުން ރާއްޖެއަށް ވެދިން އެހީތަކަކީވެސް، މިފަދަ ފުރުޞަތެއްގައި ހަނދާންކޮށްލަންޖެހޭ އެހީތަކެކެވެ. ރާއްޖެއަކީ ކުޑަ ޤައުމެއް ކަމަށްވީނަމަވެސް، މި ހާލަތުގައި ޖަޕާނު ރައްޔިތުންނަށް ދިވެހި ރައްޔިތުންގެ ފަރާތުން ވެދެވެން އޮތް އެހީއެއް ވެދިނުމަކީ، ވަރަށް މުހިންމު ކަމެއް ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ މިއަދު ދެއްވި ހަފްތާގެ ރޭޑިޔޯ ޚިޠާބުގައި، ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން އެޅުމަށް ހަމަޖެހިފައިވާ 10,000 ހައުސިންގ ޔުނިޓު އެޅުމުގެ މަޝްރޫޢުގެ މަސައްކަތްތައް މިހާރު ގޮސްފައިވާ ހިސާބާބެހޭގޮތުންވެސް ވާހަކަފުޅު ދެއްކެވިއެވެ. މިގޮތުން ހައުސިން ޔުނިޓު އެޅުމުގެ ޢަމަލީ މަސައްކަތްތައް މިހާރު ހިނގަމުންދާ ރަށްރަށާބެހޭ ތަފްޞީލު މަޢުލޫމާތު ދެއްވިއެވެ. މި ރޮނގުން ވާހަކަފުޅު ދައްކަވަމުން، ޖުމްލަކޮށް ބައްލަވާއިރު، މިއަދާ ހަމައަށް 4710 ހައުސިންގ ޔުނިޓް އެޅުމަށް ކޮންޓްރެކްޓް ކުރެވި، އޭގެތެރެއިން 1780 ހައުސިންގ ޔުނިޓް އެޅުމުގެ ޢަމަލީ މަސައްކަތް މިހާރު ހިނގަމުންދާކަން އެމަނިކުފާނު ފާހަގަކުރެއްވިއެވެ.
ރައީސުލްޖުމްހޫރިއްޔާގެ ރޭޑިޔޯ ޚިޠާބުގައި، 2012 ވަނައަހަރު ކުޅުމަށް ހަމަޖެހިފައިވާ އޭ.އެފް.ސީ ޗެލެންޖްކަޕްގައި، ދިވެހިރާއްޖެ ހިމެނޭ ގްރޫޕްގެ މެޗްތައް އަންނަ ހޯމަދުވަހު ރާއްޖޭގައި ފެށޭގޮތަށް ހަމަޖެހިފައިވުމާއެކު، ރާއްޖޭގެ ޤައުމީ ފުޓްބޯޅަ ޓީމަށް އެމަނިކުފާނުގެ އިޚްލާޞްތެރި ހެޔޮއެދުންތައް ފޮނުއްވިއެވެ. އަދި ޤައުމީ ޖޯޝާއި ފޯރިއާއެކު ދިވެހި ޤައުމީ ޓީމަށް ހިތްވަރުދެއްވައި ސަޕޯޓްކޮށްދެއްވުމަށް ހުރިހާ ދިވެހި ރައްޔިތުންނަށް ރައީސުލްޖުމްހޫރިއްޔާ ގޮވާލެއްވިއެވެ. އަދި ދިވެހިޓީމު ކުޅޭ ކޮންމެ މެޗަކުންވެސް މޮޅުވެގެން ދަނޑުން ފައިބާތަން ފެނުމަކީ، ރައީސުލްޖުމްހޫރިއްޔާއާއި ދިވެހި ހުރިހާ ރައްޔިތުންގެވެސް އުންމީދު ކަމުގައިވެސް ވިދާޅުވިއެވެ.