بســم اللّـه الرّحمـن الرّحيــم
އައްޑޫ ޔޫތު ޑިވެލޮޕްމަންޓް ޕްރޮގްރާމްގެ ދަށުން ތައްޔާރުކުރެވުނު ކްރިކެޓް ޓީމާއި، އަދި އެ ޓީމުގެ އޮފިޝަލުންނާއި، ކޯޗާ ބައްދަލުކޮށްލުމަކީ، މިއަދު އަޅުގަނޑަށް ލިބޭ ވަރަށް ބޮޑު އުފަލެއް. އެއީ، ދެންމެ ރާއްޖޭގެ ކްރިކެޓް ކޮންޓްރޯލް ބޯޑުގެ ވައިސް ޗެއަރމަން އަލްފާޟިލް އަޙްމަދު ޙަސަންދީދީ އަޅުގަނޑުމެންނަށް ކިޔައިދެއްވައިފި، މި ޓީމު ތައްޔާރު ކުރެވެމުންއައި ގޮތާއި، މި މަޝްރޫޢު ފެށިގެން މިހާތަނަށް ހިނގަމުން އައިސްފައިވާ ގޮތް.
އާދެ، ޝައްކެއްނެތް، ރާއްޖޭގެ ޒުވާނުންނާއި ކުޅިވަރާބެހޭ މިނިސްޓްރީއާއި އަދި ކްރިކެޓް ކޮންޓްރޯލް ބޯޑް އޮފް މޯލްޑިވްސްއާ ގުޅިގެން މި ހިންގަވާ ޕްރޮގްރާމަކީ، ވަރަށް ފައިދާހުރި ޕްރޮގްރާމެއް. މުޅި ރާއްޖޭގައި ކްރިކެޓް ތަރައްޤީކުރެއްވުމަށް ރާއްވަވައި، އެ ހިންގަވާ ޕްރޮގްރާމަކީ، އަޅުގަނޑު ހިތުން އޭގެ ފައިދާ މުޅި ރާއްޖެއަށް ކުރާނެ ޕްރޮގްރާމެއް. އެ ބޭފުޅުން އެކުރެއްވި ދިރާސާތަކުން އެނގުނުގޮތުގައި، މާލެ ނަގާފައި، ދެން އެންމެ ފަސޭހައިން ކްރިކެޓް އާލާކޮށް، ތަރައްޤީކުރެވެން އޮތީ އައްޑުއަތޮޅުގައި. އައްޑުއަތޮޅުގައި ވަސީލަތްތައް ހަމަޖެހިފައި އޮތްގޮތާއި، އާބާދީއާއި، އަދި ދެންމެ އެ ވިދާޅުވިހެން، ކްރިކެޓް ކުޅޭ ބައެއް ޤައުމުތަކުގައި ތަޢުލީމު ޙާޞިލްކުރެއްވި ބޭފުޅުން ވަޑައިގެން އައްޑުއަތޮޅުގައި ތިއްބެވުމާއި، މިކަންކަން މިހެން އޮތުމާއެކީގައި އައްޑުއަތޮޅުގައި ކްރިކެޓް ތަރައްޤީކުރުމަކީ، އެހެން އަތޮޅުތަކަށްވުރެ ފަސޭހައިން ކުރެވިދާނެ ކަމެއްކަމަށް އެ ބޭފުޅުންނަށް ފެނިވަޑައިގެންފައި އެވަނީ.
އެހެންވީމާ، އެގޮތުން މި ޔޫތު ޑިވެލޮޕްމަންޓް ޕްރޮގްރާމް އައްޑުއަތޮޅުގައި ހިންގައި، އެ ޕްރޮގްރާމްތަކުން ތައްޔާރުކުރެވުނު ޓީމެއްގެ ކުޅުންތެރިން މިއަދު އަޅުގަނޑުމެންގެ ކުރިމަތީގައި މިތާ މި ތިއްބެވީ. އެހެންވީމާ، ތިޔަ ހުރިހާ ކުޅުންތެރިންނަށް ވަރަށް ބޮޑަށް މަރްޙަބާ ކިޔަން. ތިޔަކުދިން މާލޭގައި ތި ހޭދަކުރި ދުވަސްކޮޅަކީ، ވަރަށް އުފާވެރި އަދި ތިޔަކުދިންނަށް ވަރަށް ފައިދާހުރި ދުވަސްތަކެއް ކަމުގައި ވާނޭ ކަމަށް އަޅުގަނޑު ދެކެން. ހަމަ އެހެންމެ، ތިޔަ ކުދިންނަށް އެކަށީގެންވާ ތަޖުރިބާތަކެއް ލިބިދިން ދުވަސްތަކަކަށް ވާނެ ކަމަށްވެސް އަޅުގަނޑު ދެކެން.
މި ދަތުރުގައި ތިޔަކުދިން 5 މެޗް ކުޅެފީމު. އޭގެތެރެއިން 4 މެޗުން މޮޅުވި. އެއީ، ވަރަށް ރަނގަޅު ކަމެއް. ހުރިހާ ކުދިންވެސް ވަރަށް އުފާކުރާނެ. އެންމެ މެޗަކުން ބަލިވުމަކީ މާބޮޑު ކަމެއްނޫން. އެހެންނަމަވެސް، އެއިން ދައްކަނީ ތިޔަކުދިންގެ ހުރި ޢަޒުމް. ތިޔަކުދިން ސާބިތުކަމާއެކީގައި ތިޔަ ކުޅިވަރުގައި ކުރިއަށްދާން ތިޔަ ކުދިންގެ ހިތުގައި އޮތް މިންވަރު. އެކަމަށްޓަކައި ހުރިހާ ކުދިންނަށް ވަރަށް ބޮޑަށް ތަހުނިޔާ ކިޔައި މަރްޙަބާ ކިޔަން.
އާދެ، ކްރިކެޓަކީ ކުޅިވަރެއް. ކުޅިވަރަކީ ހުރިހާ ގޮތަކުން ބަލާއިރުވެސް އިންސާނުންނަށް ވަރަށް ފައިދާކުރާ ކަމެއް. އިންސާނުންގެ ޞިއްޙަތު ސަލާމަތުން ބެހެއްޓުމަށްވެސް، ކުޅިވަރުކުޅުމަކީ ވަރަށް މުހިންމު ކަމަކަށް އޮންނަނީ ވެފައި. ހަމައެހެންމެ، އިންސާނުންގެ މެދުގައި ބައެއްކަހަލަ ރީތި އާދަތައް އަށަގެންނެވުމަށްޓަކައި، ކުޅިވަރަކީ ވަރަށް މުހިންމު އެއްޗެއް. އާދެ، އަޅުގަނޑުމެން ޖަމާޢަތެއްގައި ދިރިއުޅޭއިރު، އަޅުގަނޑުމެން ކަމޭހިތަންވީ އުޞޫލުތަކަކާއި ގަވާއިދުތަކެއް ހުރޭ. އެހެންވީމާ، އެ އަޅުގަނޑުމެން ގަބޫލުކުރާ އުޞޫލުތަކަށާއި، ގަވާއިދުތަކަށް ބޯލެނބުމުގައި ކުޅިވަރު އަޅުގަނޑުމެންނަށް އެކަން ވަރަށް ރަނގަޅަށް ދަސްކޮށްދޭ. ކުޅިވަރުގައި ކާމިޔާބުކުރެވޭނީ، އެ ކުޅިވަރުގެ އުޞޫލުތަކާ އެއްގޮތަށް އެކަންކޮށްގެން. ކުޅިވަރުގެ ގަވާއިދާ އެއްގޮތަށް ކަންތައްކޮށްގެން. އެހެންވީމާ، ޑިސިޕްލިން އެއީ ޝައްކެއްނެތްގޮތުގައި، އިންސާނުންގެ ޙަޔާތުގައި ވަރަށް މުހިންމު ކަމެއް. ކުޅިވަރު ކުޅޭ ބަޔަކަށް އެކަން ކުޅިވަރުގެ މައިދާނުން ނުވަތަ ދަނޑުން ދަސްވާނެ.
ހަމައެހެންމެ، އެކަކު އަނެކަކާ ގުޅިގެން، އެކަކު އަނެކަކާ އެއްބާރުލައިގެން މަސައްކަތްކުރުމަކީވެސް އިންސާނުން ކުރާ ކޮންމެ ކަމެއް ކާމިޔާބުވުމުގައި ކޮންމެހެން ބޭނުންވާ ކަމެއް. ކުޅިވަރުގައި މި ފިލާވަޅުވެސް އަޅުގަނޑުމެންނަށް ދަސްވެގެންދޭ. އެއީ، ކުޅިވަރު ކުޅެނީ ހަމައެކަނި ވަކިމީހަކު އަމިއްލައަކަށް ނޫން. އެއީ، ކިތަންމެ ހުނަރުވެރި ކުޅުންތެރިޔަކަށްވިޔަސް، އޭނާއަކީ ޓީމުގެ މެމްބަރެއް. އެހެންވީމާ، މުޅި ޓީމުގެ އެންމެން ގުޅިގެން، އެކަކު އަނެކަކާ އެހީތެރިވެގެން، އެއްބާރުލައިގެން ޓީމަށް ކާމިޔާބު ކުރެވޭތަން އަންނަނީ. އެހެންވީމާ، އެއީ އަޅުގަނޑުމެންނަށް ދަސްވާ ފިލާވަޅެއް. ޓީމް ވާރކް ނުވަތަ އެންމެން ގުޅިގެން މަސައްކަތްކުރުން، އެއީ ޖަމާޢަތުގެ ކޮންމެ ކަމެއް ކުރާއިރުވެސް އަޅުގަނޑުމެންނަށް ހަމަ ވަރަށް ބޮޑަށް މުހިންމު ކަމެއް ކަމަށް ފެނިގެންދާ ކަމެއް. އެންމެން ގުޅިގެން މަސައްކަތް ކުރުން. ހަމައެހެންމެ، ކުޅިވަރަކީ ޝަރަފްވެރިކަމާ އެކީގައި ވާދަކުރުން ދަސްކޮށްދޭ ކަމެއް. އިންސާނުން ދުނިޔޭގައި ދިރިއުޅޭއިރު ބައެއް ކަންކަމުގައި، އެކަކު އަނެކަކާ، އެއްބަޔަކު އަނެއްބަޔަކާ ވާދަކުރަންއެބަޖެހޭ. އެހެންނަމަވެސް، ވާދަކުރަންޖެހޭނީ ވަކި ހަމަތަކެއްގެ މަތިން. ވަކި އުޞޫލުތަކަކާ އެއްގޮތްވާގޮތުގެ މަތިން. އަމާނާތްތެރިކަމާ އެކީގައި. ޝަރަފްވެރިކަމާ އެކީގައި. ކުޅިވަރަކީ މި ދެންނެވި އުޞޫލުން ވާދަކުރަން ދަސްކޮށްދޭ ކަމެއް. އެއް ކުޅުންތެރިޔަކު އަނެއް ކުޅުންތެރިޔަކާ ވާދަކުރަންވާނީ، އަދި އެއްޓީމެއް އަނެއްޓީމަކާ ވާދަކުރަންވާނީ، ޝަރަފްވެރިކަމާއެކީގައި، ގަވާއިދާ އެއްގޮތަށް. އެއްވެސްކަހަލަ މަކަރުހެދުމެއް، އޮޅުވާލުމެއް، އެކަހަލަ ކަމެއް އޭގެތެރޭގައި ހިމެނިގެންނުވާނެ. މިކަންކަމަކީ ކުޅިވަރު، އަޅުގަނޑުމެންނަށް ދަސްކޮށްދޭ ކަންތައްތައް. އެހެންވީމާ، މިކަންކަން ތިޔަ ހުރިހާ ކުދިންނަށް ތިކުޅިވަރުގެ މައިދާނުގައި ޙަރަކާތްތެރިވާއިރު ދަސްވަމުންދާނެކަމާމެދަކު ޝައްކެއްނެތް.
ކުޅިވަރުގެ ތެރެއިން، ކްރިކެޓަކީ ވަރަށް ގިނަ ބަޔަކު ލޯބިކުރާ ކުޅިވަރެއް. ވަރަށް ޚާއްޞަ ކުޅިވަރެއް. ދުނިޔޭގެ ވަރަށް ގިނަ ޤައުމުތަކުގައިވެސް ކުޅެމުންދާ ކުޅިވަރެއް. އަދި ރާއްޖޭގައި ވަރަށް ކުރިއްސުރެ ކުޅެމުން އަންނަ ކުޅިވަރެއް. ރާއްޖެއަށް ކްރިކެޓް ތަޢާރުފްވިތާ ސަތޭކައަހަރަށްވުރެ ގިނަދުވަސް ވެއްޖެ. އެހެންނަމަވެސް، އަޅުގަނޑުމެންގެ ރާއްޖޭގައި އަދި އަޅުގަނޑުމެން އެދޭ މިންވަރާ ގާތަށްވެސް ކުޅިވަރު، އަދި ޚާއްޞަކޮށް، ކްރިކެޓް ތަރައްޤީއެއް ނުކުރެވޭ. ތަފާތު ގިނަ ސަބަބުތަކެއް ހުރެގެން. ކްރިކެޓަކީ އެއްގޮތަކުން ބަލަންޏާ ވަރަށް އަގުބޮޑު ކުޅިވަރެއް. ކްރިކެޓް ކުޅޭއިރު ވަރަށް ގިނަ ވައްތަރުގެ ސާމާނު ހޯދަންޖެހޭ. އަގުބޮޑު ސާމާނު. އަނެއްކާ ވަރަށް ގިނަ ދަނޑު ހުންނަންޖެހޭ. އެނޫންވެސް ވަސީލަތްތައްވެސް ހުންނަންޖެހޭ. ރާއްޖެއަށް، އޮންނަގޮތުންނާއެކީގައި، އަޅުގަނޑުމެންނަށް ކްރިކެޓް ތަރައްޤީކުރުން މި އޮންނަނީ ދަތިކަމަކަށްވެފައި. ހަމައެހެންމެ، ކްރިކެޓަކީ މެޗެއް ކުޅޭއިރު ވަރަށް ގިނަ ވަގުތު ހޭދަވާ ކަމެއް. އާދައިގެ، ތިޔަކުޅޭ މެޗެއްގައި، މިސާލަކަށް، 30 އޯވަރު ކުޅުނަސް ނުވަތަ ބައެއް މެޗްތަކުގައި، އެއްދުވަހުގެ މެޗްތައް، ދުނިޔޭގެ އެހެން ތަންތާނގައި ކުޅޭއިރު، މި 50 އޯވަރު ކުޅުނަސް ދުވާލު ހަތަރުދަމު އެކަމުގައި އެދަނީ. އަދި ޙަޤީޤަތުގައި އެއަށްވުރެ މާދިގުކޮށްވެސް ކްރިކެޓް ކުޅޭ. ދެ ދުވަހުގެ މެޗް، ތިން ދުވަހުގެ މެޗް، އެހެންގޮސް ފަސްދުވަހުގެ ޓެސްޓް މެޗްތައްވެސް އެބަކުޅޭ.
އެހެންވީމާ، ކްރިކެޓަކީ އެކަމަށް މީހާގެ ވަގުތުން ވަރަށް ބޮޑު ބައެއް ހޭދަކޮށްގެންނޫނީ ކުޅެވޭ ކުޅިވަރެއްނޫން. މި ކަންތައްތައް މިހެން ހުރުމާއެކީގައި، ކްރިކެޓް އާލާކުރުމާއި ތަރައްޤީކުރުން، ބައެއް ތަންތާނގައި މި އޮންނަނީ ދަތިކަމަކަށްވެފައި. އެކަން އެހެންއޮތްނަމަވެސް، ރާއްޖޭގައިވެސް ކްރިކެޓަށް ލޯބިކުރާ، ވަރަށްގިނަ ބަޔަކު ތިބުމާއި އަދި ވަރަށްގިނަ ޒުވާންކުދިން ކްރިކެޓް ދަސްކުރަން ބޭނުންވުމާއެކީގައި، ސަރުކާރުން މި ޕްރޮގްރާމް މި ހިންގަނީ. އިރާދަކުރެއްވިޔާ، ކުރިއަށް އޮތް ތާނގައި، ހަމަ އެއްދުވަހުން އަނެއް ދުވަހަށް ޕްރޮގްރާމް ތަރައްޤީވަމުންދާނެ. އޭގެ ސަބަބުން ވަރަށް ގިނަ ބަޔަކަށް އޭގެ ފައިދާވެސް ކުރާނެ. އަދި ކްރިކެޓުގެ މައިދާނުގައި ރާއްޖެއަށް ކޮންމެވެސްވަރެއްގެ ކާމިޔާބީތަކެއްވެސް މުސްތަޤްބަލްގައި ޙާޞިލްކުރެވިދާނެ ކަމުގެ އުންމީދު އަޅުގަނޑުމެންގެ ހިތުގައި އެބައޮތް.
އަޅުގަޑުމެން އެހެން ކުޅިވަރުތަކުގައިވެސް ހަމަ މިސަރަޙައްދުގެ ޤައުމުތަކާ ވާދަކުރެވޭ ފެންވަރަށް އަޅުގަނޑުމެންގެ އެކި ކުޅިވަރުތައް ތަރައްޤީވަމުން އެބަދޭ. ޚާއްޞަކޮށް ފުޓްބޯޅަ. މިހާރު މިވަނީ، މި ސަރަޙައްދުގެ އެހެން ޤައުމުތަކާ ވާދަކުރެވޭ ފެންވަރަށް އަޅުގަނޑުމެންގެ ފުޓްބޯޅަ ގެންދެވިފައި. އެހެންނަމަވެސް، އެއާ ޚިލާފަށް ކްރިކެޓް އެހިސާބަކަށް އަދި އަޅުގަނޑުމެންނަކަށް ނުގެންދެވޭ. ކްރިކެޓަކީ މި ސަރަޙައްދުގެ، ބައެއް ޤައުމުތަކުގައި ވަރަށްމަތީ ފެންވަރަކަށް ކުޅެމުންދާ ކުޅިވަރެއް. ޚާއްޞަކޮށް، އިންޑިޔާ، ޕާކިސްތާން، ޝްރީލަންކާ. މި ސަރަޙައްދުގެ ތިން ޤައުމު. ދުނިޔޭގެ އެންމެމޮޅު ތިން ޤައުމު ކަމަށްވެސް ވެދާނެ. ނުވަތަ އެންމެމޮޅު ޤައުމުތަކުގެ ތެރޭގައި ހިމެނޭ ތިން ޤައުމު އެއީ. އެއީ ،އެތަންތާނގެ ވަސީލަތްތައްވެސް ގިނަވެފައި، އަނެއްކާ މި ކުޅިވަރު ކުޅެމުން އަންނަތާ އެހާގިނަ ދުވަސްވެފައި، ހުރިހާ ކަމެއްވެސް އެތަންތާނގައި ހަމަޖެހިފައި އޮތްގޮތުން އެކުން އެކަން އެހެންވެފައި އޮތީ.
އާދެ، އަޅުގަނޑުމެންގެ މަޤްޞަދަކީ، ކޮންމެހެން އެ ޤައުމުތަކާ ވާދަކޮށް، އެ ޤައުމުތައް ބަލިކުރުމެއްނޫން. އަޅުގަނޑުމެންގެ ތެރޭގައި ކްރިކެޓް އާލާކޮށް، ދިރުވައި، ގިނަބަޔަކަށް ދަސްކޮށްދީ، އެ ކުޅިވަރުވެސް ތަރައްޤީކުރުން. އެކަން އެހެން ކުރާކުރުމުގައި، ކޮންމެވެސް ދުވަހަކުން އަޅުގަނޑުމެންނަށް އެހެން ޤައުމުތަކާ ވާދަކުރެވޭވަރުވެސް ވާނެކަންނޭނގެ. އެހެންވީމާ، އެގޮތަށް މަސައްކަތްކުރުމަކީ، އަޅުގަނޑު ހިތުން ހަމަ ވަރަށް ބޭނުންތެރި ކަމެއް. ދެން މިކަމުގައި މިނިސްޓްރީ އޮފް ޔޫތު އެންޑް ސްޕޯޓްސްއާއި، އަދި ކްރިކެޓް ކޮންޓްރޯލް ބޯޓުން އެ ކުރައްވާ މަސައްކަތްތަކަށްޓަކައި އެ ދެފަރާތަށް އަޅުގަނޑު އިޚްލާޞްތެރިކަމާއެކު ޝުކުރު ދަންނަވަން. އަދި ޚާއްޞަކޮށް، ބޯޑުގެ ވައިސް ޗެއަރމަން އަލްފާޟިލް އަޙްމަދު ޙަސަންދީދީ، ހަމަ މި އޮފީހުގައި އުޅުއްވިޔަސް އެއީ، ހަމަ ކްރިކެޓަށްގޮސް ހުސްވެފައި ހުންނެވި ބޭފުޅެކޭ ދެންނެވިޔަކަސް ދޮގަކަށްނުވާނެ. ކުޅުއްވައިވެސް އުޅުއްވި. މިހާރުވެސް ކުޅުއްވާނެކަންނޭނގެ. އަޙްމަދު ޙަސަންދީދީ ވަރަށް ބޮޑަށް މިކަމާ އެބަ އުޅުއްވާ. އެހެންވީމާ، އޭނާއަށް ވަރަށް ބޮޑަށް އަޅުގަނޑު ޝުކުރު ދަންނަވަން.
އަދި ތިޔަ ކުދިންނަކީ، ދެން ވަރަށް ނަޞީބުވެރިވެސް ކުދިބައެކޭ ބުނަން އެބަޖެހޭ. އެއީ، ތިޔަކުދިންގެ ކޯޗަކަށް މި ހުންނެވި، ފާއިޒް ޞަމަދަކީ، ދެން ރާއްޖޭގެ ކްރިކެޓްގައި ވަރަށް މަޝްހޫރު ބޭކަލެއް. ވަރަށް ކުރިއްސުރެ ވަރަށްމޮޅަށް ހުރިހާ ކަމެއްވެސް، ބެޓިންގ، ބޯލިންގ، ފީލްޑިންގ، ހުރިހާ ކަމެއްގައި ވަރަށް މޮޅު މީހެއް. ވަރަށް ގިނަ ކާމިޔާބީތައް ޙާޞިލްކުރައްވާފައިވާ ބޭކަލެއް. އެހެންވީމާ، އޭނާގެ ބެލުމުގެ ދަށުން، ތިޔަ ކުދިންނަށް ކްރިކެޓްގެ ހުނަރުތައް ދަސްވާކަން، އެއީ ޝައްކެއްނެތް، ތިޔަ ކުދިންނަށް ލިބިފައި އޮތް، ވަރަށް ރަނގަޅު ފުރުޞަތަކަށް ވާނެ.
އެހެންވީމާ، އަޅުގަނޑުގެ ދަޢުވަތަކަށް ތިޔަ ކުދިން މާލެ އައިކަމަށްޓަކައި، ހުރިހާ ކުދިންނަށް ވަރަށް ބޮޑަށް މަރްޙަބާ ކިޔަން. އަދި މި ފުރުޞަތު މިއީ ވަރަށް އުފާވެރި ފުރުޞަތެއް ކަމުގައިވެސް، އަދިވެސް އެއްފަހަރު އަޅުގަނޑު ތިޔަ ކުދިންނަށް ބަޔާންކޮށްދެން. އިރާދަކުރެއްވިއްޔާ ތިޔަ ކުދިންނަކީ، މި ދަތުރުގެ ސަބަބުން ތިޔަ ކުދިންގެ ކްރިކެޓްގެ ހުނަރުތަކަށް އިތުރު ކުރިއެރުންތަކެއް ލިބިގެންދާނެ ކުދިބައެއް. ހަމަ އެހެންމެ، މި ދަތުރުގެ ސަބަބުން ރަށްޓެހިވާ އެހެން ކުދިންތަކެއްވެސް ތިބޭނެކަންނޭނގެ. އެހެންވީމާ، ކްރިކެޓްގެ އެންމެ މުހިންމު އެއް މަޤްޞަދަކީ އެކުވެރިކަމާއި، އެއްބާރުލުމާއި، ރަޙްމަތްތެރިކަން ބަދަހިކުރުން ކަމަށްވާއިރު، އެ ފުރުޞަތުވެސް ތިޔަ ކުދިންނަށް މި ދަތުރުގައިވެސް ލިބިފައިވާނެ ކަމަށް އަޅުގަނޑު ޔަޤީންކުރަން.
އާދެ، ދެން މި ދަތުރު ނިމިގެން، ވަރަށް ހިތްހަމަޖެހޭ ދަތުރަކަށްވެގެން، އުފަލާއެކީގައި އެނބުރި ތިޔަ ކުދިންގެ އަތޮޅަށްގޮސް، ތިޔަ ކުދިންގެ މައިންބަފައިންނާއި، ޢާއިލާތަކާ ބައްދަލުކުރުމުގެ އުފާ ލިބޭނެކަމަށް އަޅުގަނޑު އުންމީދު ކުރަން. އަދި މި ދަތުރުގެ ސަބަބުން ކުރިއަށް އޮތް ތާނގައިވެސް ކްރިކެޓް ތަރައްޤީކޮށް، ކުރިއަށް ގެންދިއުމަށް ތިޔަ ކުދިންގެ ހިތްތަކުގައި އިތުރު ޝައުޤުވެރިކަމަކާއި، އިތުރު ޢަޒުމެއް އުފެދިގެންދާނެ ކަމަށް އަޅުގަނޑު ހީކުރަން. އާދެ، ހުރިހާ ކުދިންނަށް ވަރަށް ބާއްޖަވެރި ދަތުރަކަށް، އަދި ސަލާމަތް ދަތުރަކަށް، އެނބުރި އަތޮޅަށް ދިޔުމުގައި އެދެން.
والسّلام عليكم ورحمـة اللّـه وبركاته.