ހިޓާޗީ ކުންފުނީގެ ފަރާތުން 'މާލޭ ވޯޓަރ ކްރައިސިސް މެނޭޖްމަންޓް ފަންޑް' އަށް އެއް މިލިއަން ދިވެހި ރުފިޔާ ހަދިޔާކުރައްވަން ނިންމަވާފައިވާ ކަމުގައި އެކުންފުނީގެ އެގްޒެކެޓިވް ވައިސް ޕްރެޒިޑެންޓް އެންޑް އެގްޒެކެޓިވް އޮފިސަރ ޖުންޒޯ ނަކަޖީމާ ވިދާޅުވެއްޖެއެވެ.
ހިޓާޗީ ކުންފުނީގެ ފަރާތުން މިކަން އިޢުލާނުކުރެއްވީ، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމާއެކު މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި ބައްދަލުކުރެއްވުމުގައެވެ.
މިބައްދަލުކުރެއްވުމުގައ، މިމަހުގެ 4 ވަނަ ދުވަހު މާލޭ ވޯޓަރ އެންޑް ސުވަރޭޖް ކޮމްޕެނީގައި ހިނގާދިޔަ އާލިފާނުގެ ހާދިސާއާއި ގުޅިގެން، ހަލާކުވި ޕެނަލް ބޯޑުތައް މަރާމާތުކޮށް، ފެނުގެ މައްސަލައަށް ޙައްލެއް ހޯދުމަށް ކުރައްވަމުން އަންނަ މަސައްކަތްތަކުގެ މައްޗަށް ދެބޭފުޅުންގެ ވާހަކަފުޅުގައި ބައްލަވައިލެއްވިއެވެ.
މިބައްދަލުކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ފެނުގެ މައްސަލައަށް ދާއިމީ ހައްލެއް ހޯއްދަވައިދެއްވުމަށާއި، ކުއްލި ޙާލަތެއްގައި ޢަމަލުކުރާނެގޮތުގެ ޕްލޭނެއް އެކުލަވާލެއްވުމަކީ ސަރުކާރުން ވަރަށް ބޮޑު އަހަންމިއްޔަތުކަމެއް ދެއްވަވާ ކަމެއް ކަމުގައި ވިދާޅުވިއެވެ. އަދި، މިފަންޑަށް ހިޓާޗީ ކުންފުނީގެ ފަރާތުން ވެދެއްވި ދީލަތި އެހީފުޅަށްޓަކައި ދިވެހި ސަރުކާރާއި، ރައްޔިތުންގެ ނަމުގައި، ޝުކުރު ދެންނެވިއެވެ. މީގެއިތުރަށް، ދިވެހި ސަރުކާރަށް ދިމާވާ މިފަދަ ބޮޑެތި ހާދިސާތަކުގައި ޖަޕާން ސަރުކާރުން ރާއްޖެއަށް އަބަދުވެސް ދެއްވަމުން ގެންދަވާ އެހީތެރިކަމާއި އެއްބާރުލެއްވުން ފާހަގަކުރައްވައި، ޖަޕާން ސަރުކާރަށާއި ރައްޔިތުންނަށްވެސް އެމަނިކުފާނު ޝުކުރު އަދާކުރެއްވިއެވެ.
މިބައްދަލުކުރެއްވުމުގައި، މިނިސްޓަރ އޮފް ފޮރިން އެފެއާޒް އަލްފާޟިލާ ދުންޔާ މައުމޫނާއި، މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ ކާނަލް ރިޓަޔަރޑް މުޙަންމަދު ނާޒިމް ބައިވެރިވެވަޑައިގެންނެވިއެވެ. ހިޓާޗީގެ އެގްޒެކެޓިވް ވައިސް ޕްރެޒިޑެންޓުގެ އަރިހުގައި ބައިވެރިވެވަޑައިގަތީ، ޖަޕާން ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު މިސްޓަރ ނޮބުހިޓޯ ހޯބޯއެވެ.
