ދިވެހިރާއްޖޭގެ މަސްވެރިކަމުގެ ސިނާޢަތަކީ ދެމެހެއްޓެނިވި އަދި ތިމާވެއްޓާއި ރަޙުމަތްތެރި ސިނާޢަތެއްގެ ގޮތުގައި ތަރައްޤީވެގެން ދިއުމަކީ ސަރުކާރާއި، އަދި މަސްވެރިކަމުގެ ދާއިރާ ކުރިއެރުވުމަށް ސަރުކާރާއެކުގައި މަސައްކަތްކުރައްވާ ހުރިހާ ފަރާތްތަކުގެ އުންމީދުކަމުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، މިއަހަރުގެ މަސްވެރިންގެ ދުވަހުގެ މުނާސަބަތުގައި، މިރޭ ފާދިއްޕޮޅު ނައިފަރު މަދްރަސަތުލް އިފްތިތާޙުގައި ބޭއްވެވި ޙާއްޞަ ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާގެ ވާހަކަފުޅުގައި، ރާއްޖެއިން ކުރާ ދޮށީގެ މަސްވެރިކަމަކީ އެހެން ގިނަ ޤައުމުތަކުން ކުރާ މަސްވެރިކަމާ ޙިލާފަށް، ތިމާވެއްޓާ ރަށްޓެހި، އަދި އެކްސްޕޯޓު ކުރެވޭ މަހަކީ އޭގެ ޒާތުގައި ޕްރީމިއަމް ކޮލިޓީގެ މަސްކަމުގައި ފާހަގަކުރެއްވިއެވެ. އެހެން ނަމަވެސް، ދިވެހި މަސްވެރިން ބާނާ މަހުގެ ޢަދަދު ކުޑަކަމާއެކު، ދުނިޔޭގެ ބާޒާރުގައި މަހުގެ އަގު ކަނޑައެޅުމުގައި ދިވެހިރާއްޖޭގެ އެއްވެސް ރޯލެއް ނޯންނަކަމުގައި އެމަނިކުފާނު ވިދާޅުވިއެވެ.
މިމޭރުމުން އެމަނިކުފާނުގެ ވާހަކަފުޅު ކުރިއަށްގެންދަވަމުން، މަސްވެރިކަމަކީ ބައިނަލްޢަޤްވާމީ ދާއިރާގައި ރާއްޖެއަށް އެންމެ ގިނަ ގޮށްޖެހުންތަކެއް ދިމާވާ އެއް ދާޢިރާކަމުގައި ފާހަގަކުރެއްވިއެވެ. އަދި، ޤައުމަށް އައި ތަރައްޤީއާއި ގުޅިގެން ޔޫރަޕުން ދިވެހިރާއްޖެއަށް ލިބެމުން އައި ޙާއްސަ ޢިނާޔަތްތަކުން މިހާރު ރާއްޖެ މަޙުރޫމްވެފައިކަން ފާހަގަކުރައްވަމުން، ބައިނަލްޢަޤްވާމީ ބާޒާރުގައި ރާއްޖެ ވާދަކުރަންޖެހިފައިވަނީ، ރާއްޖެއަށް ވުރެން މާބޮޑެތި ޢަދަދުތަކުގެ މަސް އެކްސްޕޯޓު ކުރާ ފަރާތްތަކާކަން އެމަނިކުފާނު ހާމަކުރެއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، މަސްވެރިކަމުގައި ރާއްޖެއަށް ދިމާވާ ގޮންޖެހުންތަކުން އަރައިގަތުމަށްޓަކައި، މަސްވެރިކަމުގެ ސިނާޢަތުގެ ފަންނީ މަޢުލޫމާތު ހޯދުމުގައި، ދުނިޔޭގެ ކުރިއަރާފައިވާ އެހެން ޤައުމުތަކާ އެއް ހަމައެއްގައި ފައިތިލަ ހަމަކުރަންޖެހޭކަމުގައި ވިދާޅުވިއެވެ. މީގެއިތުރަށް މިކަމުގައި، އެންމެ ވަރުގަދަ ފަންނީ އެހީތެރިކަން ހޯދުމުގެ މުހިންމުކަމުގެ މައްޗަށްވެސް އެމަނިކުފާނު ބައްލަވައިލެއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ރާއްޖޭގެ ޢާބާދީގެ 35 ޕަސެންޓަކީ ޒުވާނުންކަމުގައި ވީއިރު، އެ ހުރިހާ ޒުވާނުންނަށް ސަރުކާރުގެ ފަރާތުން ވަޒީފާގެ ފުރުސަތު ތަނަވަސް ކޮށްދޭން ޖެހިފައިވާކަމުގައި ބަޔާންކުރެއްވިއެވެ. އަދި މަސްވެރިކަމުގެ ސިނާޢަތަކީ މިކަން ކަށްވަރުކޮށްދިނުމުގައި ޙިއްޞާވާނެ އެއް ޝިނާޢަތްކަމުގައި އެމަނިކުފާނު ފާހަގަކުރެއްވިއެވެ.
މަސްވެރިކަމުގެ ސިނާޢަތަށް ޒުވާނުން ނެރުމަށް ސަރުކާރުން ކުރައްވަމުން ގެންދަވާ މަސައްކަތްޕުޅުތަކުގެ މައްޗަށް އަލިއަޅުއްވައިލައްވަމުން، މިއަދު ފެލިވަރުގައި އިފްތިތާޙުކޮށް ދެއްވި މަސްވެރިންގެ މެރީނާ އިންވެސް 240 ވަޒީފާ އުފެދިގެންދާނެކަން ރައީސުލްޖުމްހޫރިއްޔާ ފާހަގަކުރެއްވިއެވެ. މިފަދަ މެރީނާއެއްގެ ބޭނުމަކީ، އާއިލާތަކާ ވަކިން ގިނަދުވަހު ކަނޑުމަތީގައި އުޅޭ ޒުވާނުންނަށް، ކޮންމެވެސް ވަރެއްގެ އަރާމާއި، މުނިފޫލިފިލުވުމާއި، އަދި ޒުވާނުންނަށް ބޭނުންވާ ހަރަކާތްތަކުގައި ޝާމިލުވެ އުޅުމުގެ ފުރުސަތު ތަނަވަސް ކޮށްދެއްވުންކަމުގައި ރައީސުލްޖުމްހޫރިއްޔާ ވިދާޅުވިއެވެ.
މިރޭގެ މިރަސްމިއްޔާތުގައި، މަސްވެރިންގެ ދުވަހުގެ މުނާސަބަތުގައި ދެއްވާ ޙާއްސަ އިނާމުތައް ރައީސުލްޖުމްހޫރިއްޔާ ޙަވާލުކޮށްދެއްވިއެވެ. އަދި 'މަސްވެރިންގެ ހަވީރު' ގެ ނަމުގައި، މިނިސްޓަރ އޮފް ފިޝަރީޒް އެންޑް އެގްރިކަލްޗަރ، ޑޮކްޓަރ މުޙަންމަދު ޝައިނީ ދެއްވި ރޭގަނޑުގެ ފަރިއްކޮޅެއްގައި ރައީސުލްޖުމްހޫރިއްޔާގެ ދެކަނބަލުން ބައިވެރިވެޑައިގަތެވެ.
