ބޯހިޔާވަހިކަން ފޯރުކޮށްދިނުމުގެ ޕްރޮގްރާމުގެ ދަށުން ހުޅުމާލޭގައި ޢިމާރާތްކުރެވޭ 704 ހައުސިންގ ޔުނިޓުގެ ބިންގާ، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް މިއަދު އަޅުއްވައިދެއްވައިފިއެވެ. މި ރަސްމިއްޔާތުގައި، ރައީސުލްޖުމްހޫރިއްޔާގެ އަނބިކަނބަލުން އަލްފާޟިލާ ފާޠިމަތު އިބްރާހީމް ބައިވެރިވެވަޑައިގެންނެވިއެވެ.
އެކަމަށްޓަކައި މިއަދު ހަވީރު ހުޅުމާލޭގައި ބޭއްވެވި ރަސްމިއްޔާތުގައި ރައީސުލްޖުމްހޫރިއްޔާ ވާހަކަފުޅު ދައްކަވަމުން، ހުޅުމާލެއަކީ ދިވެހި ޒުވާނުންގެ އުންމީދުތަކާ ގުޅިފައިވާ ރަށެއްކަމުގައި ބަޔާންކުރައްވަމުން، މިމަޝްރޫޢުގެ ސަބަބުން ދިވެހި ޒުވާނުންނަށް އެންމެ ދަތިވެފައި އޮތް ގެދޮރުވެރިކަން، ނުވަތަ ބޯހިޔާވަހިކަން ނެތުމުގެ މައްސަލައަށް ޙައްލެއް ލިބިގެން ދާނެކަމުގައި ވިދާޅުވިއެވެ.
"އަޅުގަނޑުމެންގެ މިކުރާ މަސައްކަތަކީ މިއަދު ދިވެހިރާއްޖޭގެ މުޖުތަމަޢުއަށް ދިމާވެފައި ހުރި އެންމެ ބޮޑެތި މައްސަލަތަކަށް، ކޮންމެވެސް ކަހަލަ ދާއިމީ ހައްލެއް ގެނެއުމަށްޓަކައި ކުރެވޭ މަސައްކަތްތަކެއް. އެހެންވީމާ، މިއަދު ބިންގާއެޅިގެންދާ 1،500 ފްލެޓަކީވެސް އިރާދަކުރެއްވިއްޔާ އޭގެ ސަބަބުން ޒުވާނުންގެ މޫނުތަކަށް ހިނިތުންވުމެއް ގެނެސްދޭނެ މަޝްރޫޢަކަށް ވެގެންދާނެ" ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ހުޅުމާލެއާ ދޭތެރޭގައި މި ސަރުކާރުން ކުރައްވާ ތަޞައްވުރުގެ މައްޗަށް ބައްލަވާލައްވަމުން، ހުޅުމާލޭގައި ޒުވާނުންގެ ސިޓީއެއް ހެއްދެވުމަކީ، މި ސަރުކާރުގެ އަމާޒު ކަމުގައި ވިދާޅުވިއެވެ. އަދި ހުޅުލެއާއި މާލެއާއި ދެމެދު އަޅާ ބްރިޖަކީ އެއްވެސް ގޮތަކަށް އިޤްތިޞާދީ ފައިދާތަކެއް ނުވަތަ މަންފާތަކެއް ހޯއްދެވުމަށް ސަރުކާރުން ހިންގާ މަޝްރޫޢެއް ނޫންކަމުގައި އެމަނިކުފާނު ވިދާޅުވިއެވެ. އަދި އެމަޝްރޫޢާ މެދު ސަރުކާރުން ދެކެވަޑައިގަންވަނީ، ދިވެހި ރައްޔިތުންގެ އަސާސީ ޚިދުމަތަކަށް ބޭނުންވާ ވަޞީލަތެއް ޤާއިމްކުރުމުގެ ގޮތުގައިކަން އެމަނިކުފާނު ވިދާޅުވިއެވެ. މީގެއިތުރަށް، ޗައިނާގެ ރައީސް ޝީ ޖިންޕިންގ ވަނީ، ވަރަށް ޝައުޤުވެރިކަމާއެކު، ވަރަށް އީޖާބީގޮތެއްގައި ބްރިޖުގެ މަޝްރޫޢު ބަލައިގެންފައިކަން ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ހުޅުމާލެ ހިއްކުމުގެ ވިސްނުންފުޅަކީ، ރައީސް މައުމޫންގެ ވިސްނުންފުޅެއް ކަމަށާއި، ހުޅުމާލެ އޭރުއޮތީ ވަރަށް އުންމީދީ ޚިޔާލެއްގެ ގޮތުގައި ކަން ފާހަގަކުރެއްވިއެވެ. އަދި މިފުރުޞަތުގައި ރައީސް މައުމޫނުގެ 30 އަހަރުގެ ޒަޢާމަތުގައި ދިވެހިރާއްޖޭގެ ރައްޔިތުންގެ ތަރައްޤީއަށް، ޙާއްޞަކޮށް އިޖްތިމާޢީ ދާއިރާގައި ހުރި ބޮޑެތި މައްސަލަތަކަށް ޙައްލެއް ހޯއްދަވައިދެއްވުމަށްޓަކައި ކޮށްދެއްވާފައިވާ މަސައްކަތްތައް ފާހަގަކުރައްވައި، ދިވެހިސަރުކާރައި ރައްޔިތުންގެ ނަމުގައި އެމަނިކުފާނަށް ޝުކުރުއަދާކުރެއްވިއެވެ.
މީގެއިތުރަށް، ބޯހިޔާވަހިކަން ފޯރުކޮށްދިނުމުގެ ޕްރޮގްރާމުގެ ދަށުން ހުޅުމާލޭގައި ޢިމާރާތްކުރެވޭ ހައުސިންގ ޔުނިޓުގެ މަޝްރޫޢު ހިންގާ، ޗައިނާ މެޝިނަރީ އިންޖިނިއަރިންގ ކޯޕަރޭޝަން (ސީ.އެމް.އީ.ސީ) އަށާއި، ޗައިނާގެ ސަރުކާރަށް ރައީސުލްޖުމްހޫރިއްޔާގެ ވާހަކަފުޅުގައި ޝުކުރުއަދާކުރެއްވިއެވެ.
