ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، ޗައިނާ މެޝިނަރީ އިންޖިނިއަރިންގ ކޯޕަރޭޝަން (ސީ.އެމް.އީ.ސީ) ގެ ރައީސް، މިސްޓަރ ޒެންގް ޗުންއާ ބައްދަލުކުރައްވައިފިއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ހެނދުނު އޮތް މިބައްދަލުކުރެއްވުމުގައި، ދިވެހިރާއްޖޭގައި އިންވެސްޓްކުރުމަށް ހުރި ފުރުޞަތުތަކާ ބެހޭގޮތުން ދެބޭފުޅުން މަޝްވަރާކުރެއްވިއެވެ. މިގޮތުން، ވިޔަފާރިއާއި، ޢުމްރާނީ ތަރައްޤީއާއި، ޓުއަރިޒަމްގެ އިތުރުން، ހަކަތަ އުފެއްދުމުގެ ދާއިރާގައި ރާއްޖޭގައި ހުރި ފުރުޞަތުތަކާބެހޭ މަޢުލޫމާތު ރައީސުލްޖުމްހޫރިއްޔާ މިސްޓަރ ޒެންގްއަށް ދެއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، މާލެއަށް ކުރިމަތިވެފައިވާ ފެނުގެ މައްސަލާގައި ޗައިނާއިން ރާއްޖެއަށް ވެދެއްވަމުން ގެންދަވާ އެހީތެރިކަމަށްޓަކައި ދިވެހި ސަރުކާރާއި ރައްޔިތުންނާއި އަދި ރައީސުލްޖުމްހޫރިއްޔާގެ ނަންފުޅުގައި، ޗައިނާގެ ސަރުކާރަށާއި ރައްޔިތުންނަށް ވަރަށް އިޚްލާޞްތެރިކަމާއެކު ޝުކުރު އަދާކުރެއްވިއެވެ. އަދި، ޗައިނާއިން ރާއްޖެއަށް ފޮނުއްވި ފެނުގެ ފުރަތަމަ ޝިޕްމަންޓަކީ، ސީ.އެމް.އީ.ސީގެ ފަރާތުން ރާއްޖެއަށް ހަދިޔާކުރެއްވި ފެންކަމުގައި ފާހަގަކުރައްވަމުން، އެކަމަށްޓަކައި އެކުންފުންޏަށް ޝުކުރު ދެންނެވިއެވެ.
މީގެއިތުރަށް، ސަރުކާރުގެ ބޯހިޔާވަހިކަން ފޯރުކޮށްދިނުމުގެ ޕްރޮގްރާމުގެ ދަށުން، ސީ.އެމް.އީ.ސީގެ ފަރާތުން ހުޅުމާލޭގައި ޢިމާރާތްކުރެވޭ 1500 ހައުސިންގ ޔުނިޓުގެ ބިންގާ އެޅުމުގެ ރަސްމިއްޔާތު މިއަދު ބޭއްވުމަށް ހަމަޖެހިފައިވާކަން ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރައްވަމުން، އެކުންފުނީގެ ފަރާތުން ރާއްޖޭގެ ތަރައްޤީއަށްޓަކައި ވެދެއްވަމުން އަންނަ އެހީތެރިކަމަށްޓަކައި ޝުކުރުއަދާކުރެއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ރައްޔިތުންނަށް ގެދޮރުވެރިކަން ހޯއްދަވައިދެއްވުމާއި، ދިވެހި ޒުވާނުންނަށް ވަޒީފާގެ ފުރުޞަތުތައް އިތުރު ކޮށްދެއްވުމަކީ މިސަރުކާރުން ވަރަށް ބޮޑު އިސްކަމެއް ދެއްވާ ކަމެއްކަމުގައި ފާހަގަކުރެއްވިއެވެ. މިގޮތުން، ހުޅުމާލެއާ ދޭތެރޭގައި މި ސަރުކާރުން ކުރައްވާ ތަޞައްވުރުގެ މައްޗަށް ބައްލަވާލައްވަމުން، ހުޅުމާލޭގައި ޒުވާނުންގެ ސިޓީއެއް ހެއްދެވުމަކީ، މި ސަރުކާރުގެ އަމާޒެއްކަމުގައި ވިދާޅުވިއެވެ. އަދި މި ޔޫތު ސިޓީ ހެދޭއިރު ޒުވާނުންނަށް ގެދޮރުވެރިކަމުގެ އިތުރުން، ވަޒީފާގެ ފުރުޞަތުތަކާއި، މުނިފޫހިފިލުވޭނޭ ވަޞީލަތްތަށްވެސް ޤާއިމްވެގެންދާނެ ކަމުގައި ވިދާޅުވިއެވެ.
ސީ.އެމް.އީ.ސީ ގެ ރައީސްގެ ވާހަކަފުޅުގައި، ހައުސިންގ ޔުނިޓްތަކުގެ މަޝްރޫޢު ކުރިއަށް ގެންދިއުމަށްޓަކައި ދިވެހި ސަރުކާރުގެ ފަރާތުން ދެއްވަމުން ގެންދަވާ އެހީތެރިކަމަށްޓަކައި ޝުކުރުއަދާކުރެއްވިއެވެ.
