މާލޭގެ ރައްޔިތުންނަށް މިވަގުތު ދިމާވެފައިވާ ނުރައްކާތެރިކަމުގެ ތެރޭގައި، ހުރިހާ ދިވެހި ރައްޔިތުންވެސް ސަރުކާރަށް އެއްބާރުލެއްވުން ދެއްވުމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްެ އިލްތިމާސްކުރައްވައިފިއެވެ. ރައީސުލްޖުމްހޫރިއްޔާ މިކަމަށް އިލްތިމާސްކުރެއްވީ، މާލޭ ވޯޓަރ އެންޑް ސެވަރޭޖް ކޮމްޕެނީ ލިމިޓެޑްގައި ހިނގާދިޔަ ހިތާމަވެރި އަލިފާނުގެ ޙާދިސާއާއި ގުޅިގެން މުޅި މާލެއަށް ދިމާވެފައިވާ ފެނުގެ މައްސަލައާ ބެހޭގޮތުން ރާއްޖޭގެ ޚަބަރުފަތުރާ ވަސީލަތްތަކާ ބައްދަލުކުރައްވައި، ވާހަކަފުޅު ދައްވަކަމުންނެވެ.
މިއަދު ހަވީރު ރައީސުލްޖުމްހޫރިއްޔާގެ އޮފީހުގައި ބޭއްވުނު މި މިބައްދަލުކުރެެއްވުމުގައި، މާލެއަށް ދިމާވެފައިވާ ފެނުގެ މައްސަލައަކީ ސިޔާސީ މައްސަލައެއް ނޫންކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި، އެމައްސަލަ ޙައްލުކޮށްދެއްވުމަށް ސަރުކާރުން ކުރައްވާ މަސައްކަތްޕުޅަކީ ދިވެހި ހުރިހާ ރައްޔިތުންނަށް ބޭނުންވެފައިހުރި މަސައްކަތެއްކަން ފާހަގަކުރައްވަމުން، ފެންލިބޭ ފަރާތްތަކުންްް ފެން އިސްރާފު ނުކުރެއްވުމަށާއި، އެކަމުގެ ނާޖާއިޒު ފައިދާ ނުނެންގެވުމަށް، ރައީސުލްޖުމްހޫރިއްޔާ ދިވެހި ރައްޔިތުންނަށް ނަސޭޙަތްތެރިވެވަޑައިގަތެވެ.
ރައީސުލްޖުމްހޫރިއްޔާގެ ވާހަކަފުޅުގައި، މާލެއަށް މިވަރުގެ ބޮޑު ދަތި އުނދަގޫ ކަންތައްތަކެއް ތަޙައްމަލުކުރަން ޖެހިފައިވާ ވަގުތެއްގައި، ބައިނަލްޢަގްވާމީ މުޖްތަމަޢުތަކުން ދިވެހި ސަރުކާރަށް ވަރަށް ބޮޑެތި އެހީތައް ވެދެއްވަމުން ގެންދަވާކަން ފާހަގަކުރައްވެވިއެވެ. މިގޮތުން، އަވަށްޓެރި އިންޑިޔާ، ސްރީލަންކާ އަދި ބަންގްލަދޭޝް ސަރުކާރުން ވެދެއްވަމުން ގެންދަވާ އެހީތެރިކަމުގެ އިތުރުން، ޗައިނާ، އެމެރިކާ އަދި ސަޢޫދީ ސަރުކާރުން ރާއްޖެއަށް ވެދެއްވާފައިވާ އެހީތެރިކަން ފާހަގަކުރައްވައި، އެ ސަރުކާރުތަކަށާއި، އެޤައުމުތަކުގެ އެކުވެރި ރައްޔިތުންނަށް ވަރަށް އިޚްލާސްތެރިކަމާއެކު ޝުކުރު ދެންނެވިއެވެ.
ހަމައެޔާއެކު، ދިވެހި ވިޔަފާރިވެރިންނާއި، ސަރުކާރުގެ ކުންފުނިތަކާއި، އަމިއްލަ ކުންފުނިތަކާއި، އަދި އަމިއްލަ ފަރުދުން ވެދެއްވަމުން ގެންދަވާ ބޮޑެތި އެހީތަކުގެ މައްޗަށް އަލިއަޅުއްވައިލައްވައި، އެފަރާތްތަކަށްވެސް މަރުޙަބާ ދަންނަވައި ޝުކުރު އަދާކުރެއްވިއެވެ. މީގެއިތުރަށް، ދަޢުލަތުގެ މުއައްސަސާތަކުންވެސް ކުރައްވަމުން ގެންދަވާ ހީވާގި މަސައްކަތްތައް ފާހަގަކުރައްވައި، އެފަރާތްތަކަށްވެސް އެމަނިކުފާނު ޝުކުރު ދެންނެވިއެވެ.
ރާއްޖޭގެ ޚަބަރުފަތުރާ ވަސީލަތްތަކާ ބައްދަލުކުރައްވައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ފެނުގެ މައްސަލަ ޢާންމު ޙާލަތަކަށް ގެނައުމަށްޓަކައި ސަރުކާރުގެ ފަރާތުން ކުރެއްވެވި މަސައްކަތުން މާލޭގެ ހުރިހާ ފަރާތްތަކަށް މިހާރު ބޯފެން ލިބެމުންދާކަން އުފަލާއެކު ފާހަގަކުރެއްވިއެވެ. އެހެން ނަމަވެސް ރައްޔިތުންގެ ދިރިއުޅުން އަދި ޢާންމު ޙާލަތަކަށް ނުގެނެވޭ ކަމުގައި ބަޔާންކުރައްވަމުން، އަލިފާނުގެ ހާދިޞާގައި ހަލާކުވި ޕެނަލްބޯޑުތަށް މަރާމާތުކުރެވުމުން ރައްޔިތުންގެ ދިރިއުޅުން ޢާންމު ޙާލަތަށް ރުޖޫޢަވެގެންދާނެކަމުގައި އެމަނިކުފާނު ވިދާޅުވިއެވެ. މިގޮތުން، އެމަސައްކަތަށް ރާއްޖޭން ބޭރުގެ ފަންނީ އެހީތެރިކަން ހޯއްދަވައިގެން، ވަރަށް ބަރު ސްޕީޑެއްގައި އެމަސައްކަތް އެބަ ކުރިއަށްދާކަމުގައި އެމަނިކުފާނު ވިދާޅުވިއެވެ.
