ޤާނޫނު ނަންބަރު 2008/5 (ފުލުހުންގެ ޤާނޫނު)ގެ 22 ވަނަ މާއްދާގެ (ރ) ގައިވާ ގޮތުގެ މަތިން، ޕޮލިސް އިންޓެގްރިޓީ ކޮމިޝަނުގެ މެންބަރު ކަމަށް ޢައްޔަނު ކުރެއްވުމަށް ރައްޔިތުންގެ މަޖިލީހުން ފާސްކުރައްވާފައިވާ މިދަންނަވާ 3 ބޭފުޅުން، އެ ކޮމިޝަނުގެ މެންބަރުކަމަށް ރައީސުލްޖުމްހޫރިއްޔާ މިއަދު ޢައްޔަނު ކުރައްވައިފިއެވެ.
1. އަލްއުސްތާޛް ޢަލީ ނަދީމު ހ. ގްލޯރިއޯސާ
2. ފާޠިމަތު ސަރީރާ ޢަލީ ޝަރީފު ދަފްތަރު. ނަންބަރު ދރ. 1320
3. މުޙައްމަދު ފަރުހާދު ހަސަންކާރިގެ / ސ.މީދޫ
މިތިން ބޭފުޅުންގެ ތެރެއިން ކޮމިޝަނުގެ ރައީސާގެ ގޮތުގައި ފާޠިމަތު ސަރީރާ ޢަލީ ޝަރީފު، އަދި ނައިބު ރައީސްކަމަށް މުޙައްމަދު ފަރުހާދު ރައީސުލްޖުމްހޫރިއްޔާ ވަނީ ޢައްޔަން ކުރައްވާފައެވެ.
ރަސްމިއްޔާތަށްފަހު، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމާއި، ރައީސުލްޖުމްހޫރިއްޔާގެ ނައިބު ޑޮކްޓަރ މުޙައްމަދު ޖަމީލު އަޙްމަދު މި 3 ބޭފުޅުންނާ ބައްދަކޮށްލެއްވިއެވެ. އަދި، ވަކި ފަރާތަކަށް ނުޖެހި، މިނިވަންކަމާއި، ނަޒާހަތްތެރިކަމާއެކު އެބޭފުޅުންގެ ވަޒީފާގެ މަސްޢޫލިއްޔަތުތައް އަދާކުރެއްވުމަށް ނަސޭހަތްތެރިވެ ވަޑައިގަތެވެ.
މިރަސްމިއްޔާތުގައި ރައީސުލްޖުމްހޫރިއްޔާގެ އޮފީހުގެ ސްޓޭޓް މިނިސްޓަރ އަލްއުސްތާޛު މުޙައްމަދު މުޖުތާޒު ބައިވެރިވެވަޑައިގެންނެވިއެވެ.
