ރާއްޖޭގެ ޓުއަރިޒަމް އިންޑަސްޓްރީގައި ކުދި އަދި މެދުފަންތީގެ ވިޔަފާރިތައް އިންވެސްޓް ކުރުމުގެ ފުރްޞަތު ތަނަވަސްކޮށްދެއްވުމުގެ މަޤްޞަދުގައި ސަރުކާރުން ހިންގަވާ ގެސްޓްހައުސްތަކަށް ޚާއްޞަ ރަށްރަށް ތަރައްޤީ ކުރެއްވުމުގެ މަޝްރޫޢު، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އިފްތިތާޙުކޮށްދެއްވައިފިއެވެ.
މިކަމަށްޓަކައި ނަސަންދުރަ ޕެލަސް ހޮޓެލްގައި ރޭ ބޭއްވެވި ރަސްމިއްޔާތުގައި، ރައީސުލްޖުމްހޫރިއްޔާ ދެއްކެވި ވާހަކަފުޅުގައި، މި މަޝްރޫޢުގެ ތަނަވަސްކަމާއި ފަސޭހަކަން ލިބިގެންދާނީ، އެންމެ ފަރުދަކަށް ނޫން ކަމަށާއި، ސަރުކާރުގެ އަމާޒަކީ ގިނަ ބަޔަކަށް ވަޒީފާގެ ފުރްޞަތުތައް ތަނަވަސްކޮށްދެއްވުން ކަމުގައި ވިދާޅުވިއެވެ. މިރޮނގުން ވާހަކަފުޅު ދައްކަވަމުން، މިތަޢާރުފް ކުރެވުނު މަޝްރޫޢުގެ ސަބަބުން ޒުވާން ވިޔަފާރިވެރިންނަށް ފުރްޞަތުތައް ތަނަވަސްވެގެންދާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، މާތްﷲގެ ރަޙްމަތްފުޅާއެކު، މި އިފްތިތާޙު ކުރެވުނު މަޝްރޫޢު، އޭގެ ޒާތުގައި ކާމިޔާބު މަޝްރޫޢަކަށް ވެގެންދާނެކަން ހާމަކުރެއްވިއެވެ. އަދި ހައްދުންމަތީގައި މަޝްރޫޢު ފެށި ކަމުގައިވިޔަސް، މި މަޝްރޫޢު ރާއްޖޭގެ އަތޮޅުތަކުގެ އެކިހިސާބުތަކަށް ފެތުރިގެންދާނެ ކަމަށާއި، މި މަޝްރޫޢު ފެތުރިގެންދާއިރު، ވިޔަފާރީގެ ތެރެއަށް ނުކުންނަ ޒުވާނުންނަށާއި، ވިޔަފާރީގެ ދާއިރާއަށް ޝައުޤުވެރިކަން ބަހައްޓަވާ އަންހެން ބޭފުޅުންނަށް އިސްކަން ދެއްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ސިޔާސީގޮތުން ހަމަޖެހުން ޤާއިމުކުރެވިގެންދާނަމަ، މި ހަމަޖެހުމުގެ ތެރޭގައި އިރާދަކުރެއްވިއްޔާ، ރާއްޖޭގެ އިޤްތިޞާދީ ދުވެލި ހަލުވިކަމާއެކު ކުރިއަށްދާނެ ކަމުގައިވެސް ވިދާޅުވިއެވެ. އަދި އިތުރު އެހެން ބޮޑެތި މަޝްރޫޢުތަކަށްވެސް ފުރްޞަތު ހުޅުވިގެންދާނެ ކަމުގައި އެމަނިކުފާނު ވިދާޅުވިއެވެ.
މި މަޝްރޫޢުގެ ދަށުން ގެސްޓްހައުސްތަކަށް ޚާއްޞަ ކުރައްވައިގެން، ތަރައްޤީ ކުރެއްވުމަށް ހަމަޖެހިފައިވާ ފުރަތަމަ ރަށަކީ ހައްދުންމަތީގެ ފަޅުރަށެއް ކަމުގައިވާ ތުނބުރިއެވެ.
