ދިވެހި ދައުލަތުން އަމާޒު ހިފަން ބޭނުންވާ މިޞްރާބަށް ދިޔުމުގައި، ތަޢުލީމީ ދަރިންގެ އެހީތެރިކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އެދިވަޑައިގެންފިއެވެ. ރައީސުލްޖުމްހޫރިއްޔާ މިކަމަށް އެދިވަޑައިގަތީ، 2013 ވަނަ އަހަރުގެ ސާނަވީ އިމްތިޙާނު ފުރިހަމަކުރި އުއްތަމަ އަރުތަވެރިންނަށް އިނާމު ދެއްވުމަށްޓަކައި މިރޭ ދަރުބާރުގޭގައި ބޭއްވެވި ޖަލްސާގައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާގެ ވާހަކަފުޅުގައި، ކުދިންގެ ޙަޤީޤީ މޮޅުކަން ފެނިގެންދިޔުން ބިނާވަނީ އެ ކުއްޖަކު ކިޔެވި އެއްޗެއް، އެ ކުއްޖަކަށް ދިމާވާ ޙާލަތެއްގައި ބޭނުންކުރަން އެނގޭ މިންވަރެއްގެ މައްޗަށް ކަމުގައި ވިދާޅުވިއެވެ. ރާއްޖެއަށް ބޭނުންވާ ފަންނުތަކުގެ ތަފާތުކަމާއި ގިނަކަން ފާހަގަކުރައްވަމުން، ދިވެހިރާއްޖެއަކީ، ޒުވާނުންގެ އާބާދީއެއް އޮތް، ޒުވާނުންގެ ދިވެހިރާއްޖެއެއް ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި ދިވެހިރާއްޖެ ކުރިއަށް ގެންދަވަން ބޭނުންފުޅުވަނީ ތަފާތު ޚިޔާލުތަކާއެކު، މިހާރު އޮތް މަރުޙަލާއިން އެއަށްވުރެ މައްޗަށް ޖައްސާލެވޭނެ މަރުޙަލާއަކަށް އަމާޒުކޮށްގެން ކަމަށާއި، މި އަމާޒަށް ވާޞިލުވެވޭނީ، ހީވާގި ހުނަރުވެރި ޤާބިލު ޒުވާން ކުދިންތަކެއް ނުކުމެގެން ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. މި ރޮނގުން ވާހަކަފުޅު ދައްކަވަމުން، އިރާދަކުރެއްވިއްޔާ މާތްﷲގެ ރަޙްމަތްފުޅާއެކު، މިއަހަރުގެ ތެރޭގައި، ރާއްޖޭގައި އިސްލާމިކް ޔުނިވަރސިޓީއެއް ޤާއިމުވެގެންދާނެކަމުގެ ޔަޤީންކަން ރައީސުލްޖުމްހޫރިއްޔާ ދެއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ތަޢުލީމީ ޒުވާނުންގެ ޚިދުމަތް ޤައުމަށް މުހިންމުވުމުގެ ސަބަބުތަކުގެ މައްޗަށްވެސް ބައްލަވާލެއްވިއެވެ. "މި ދިވެހިރާއްޖެއަކީ، ތިޔަ ހުރިހާ ކުދިންގެ ދިވެހިރާއްޖެ. ދިވެހިރާއްޖެއަށް ހަމަޖެހުން އަތުވެއްޖެނަމަ، ހަމަޖެހުމުގެ ހުރިހާ ޙިއްޞާއެއްގެ ބައިވެރިންނަކީ، ތިޔަކުދިން. މި ތަން ހަލާކުވާކަމަށްވާނަމަ، ހަލާކުވުމުގެ ޙިއްޞާދާރުންގެ ގޮތުގައި ތިބީވެސް ދިވެހި ޒުވާނުން." ރައީސުލްޖުމްހޫރިއްޔާ ވިދާޅުވިއެވެ. މި މޭރުމުން ވާހަކަފުޅު ދައްކަވަމުން، ކިޔަވައިގެން ތިބި ކުދިންނާ، އެހެން ކުދިންނާ ދެމެދު ހުރި ތަފާތަކީ، ކިޔެވި އެއްޗެއްގެ ބޭނުން އީޖާބީ ގޮތެއްގައި ހިފައިގެން، އީޖާބީ ދިވެހިރާއްޖެއެއް ބިނާކުރުމަށް ކުރާ މަސައްކަތް ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި އެއީ، ބުއްދީގެ ބޭނުންކޮށްގެން، އެ ކިޔެވި އެއްޗެއްގެ ބޭނުން ހިފައިގެން، އީޖާބީ ގޮތެއްގައި ކުދިންގެ ޙަޔާތުގެ ރާސްތާ ކަޑައްތުކޮށް، އެ ރާސްތާގައި ހިނގަން ކުރާ މަސައްކަތުގެ ނަތީޖާ ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
ސާނަވީ ތަޢުލީމް ނިމުމަކީ، ތަޢުލީމީ ޙަޔާތުގެ ނިމުން ނޫން ކަމާއި، އެއީ ފެށުންކަން ރައީސުލްޖުމްހޫރިއްޔާގެ ވާހަކަފުޅުގައި ކުދިންނަށް ހަނދާންކޮށްދެއްވިއެވެ. އަދި ސާނަވީ ތަޢުލީމު ނިންމާ ގިނަ ކުދިންނަކީ، އިރާދަކުރެއްވިއްޔާ މަތީ ތަޢުލީމަށް ދިޔުމުގެ ފުރުޞަތު ތަނަވަސްވެގެންދާނެ ކުދިންކަމަށް ވިދާޅުވެ، ތަޢުލީމީ ޙަޔާތް ބާއްޖަވެރިކުރުމަށް، އެކުދިންނަށް ރައީސުލްޖުމްހޫރިއްޔާ އިލްތިމާސް ކުރެއްވިއެވެ. ރައީސުލްޖުމްހޫރިއްޔާ އަދިވެސް ވިދާޅުވިއެވެ. "ޙަޔާތުގެ ދަތުރަކީ، އުފާވެރި ދަތުރެއް. ޙަޔާތުގެ ދަތުރަކީ، އުންމީދުތަކެއްގެ މައްޗަށް ބިނާކުރާ ދަތުރެއް. ޙަޔާތުގެ ދަތުރަކީ، ހުވަފެންތަކެއްގެ މައްޗަށް ބިނާކުރާ ދަތުރެއް. ބާއްޖަވެރި ޙަޔާތެއް ބިނާވާނީ ހުވަފެންތަކެއް ދެކޭ މީހަކަށް."
ރައީސުލްޖުމްހޫރިއްޔާގެ ވާހަކަފުޅުގައި، މަދަރުސާތަކުގެ ދަރިވަރުންނަށް ބޭނުންވާ އެތައް ކަންތައްތަކެއް، ރާއްޖޭގެ ހުރިހާ ސަރުކާރަކުންވެސް ކޮށްދެއްވާފައިވާކަން ފާހަގަކުރެއްވިއެވެ. އަދި މިއަދު ދުނިޔޭގެ ޗާޓުން ރާއްޖެ ފެނިގެން މިދަނީ، އެ ބޭފުޅުން ކޮށްދެއްވާފައިވާ މަސައްކަތްޕުޅުތަކުގެ ސަބަބުން ކަމުގައި ވިދާޅުވެ، ރާއްޖޭގެ އިންސާނީ ވަސީލަތްތައް ތަރައްޤީ ކުރެއްވުމަށް ކުރައްވާފައިވާ މަސައްކަތްޕުޅުތަކަށްޓަކައި، އެބޭފުޅުންނަށް ރައީސުލްޖުމްހޫރިއްޔާ ޝުކުރުއަދާކުރެއްވިއެވެ.
މިރޭގެ ޖަލްސާގައި ސާނަވީ ތަޢުލީމުގެ އިމްތިޙާނުތަކުން ވަކިވަކި މާއްދާތަކުން މުޅި ދުނިޔެއިން 1 ވަނަ ޙާޞިލުކުރި 4 ދަރިވަރުންނަށް ރައީސުލްޖުމްހޫރިއްޔާ ދެއްވި މެޑެލާއި، އިނާމާއި، ހަނދާނީ ލިޔުން ދެއްވީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމެވެ. ވަކިވަކި މާއްދާތަކުން، މެތަމެޓިކްސްއާއި، ޓްރެވަލް އެންޑް ޓޫރިޒަމުން ތިން ދަރިވަރަކު އަދި އިންގްލިޝް އޭޒް އަ ސެކަންޑް ލޭންގްއޭޖުން އެއް ދަރިވަރަކު 1 ވަނަ ޙާޞިލުކޮށްފައިވެއެވެ. މެތަމެޓިކްސްއާއި، އިންގްލިޝް އޭޒް އަ ސެކަންޑް ލޭންގްއޭޖުން މުޅި ދުނިޔެއިން 1 ވަނަ ޙާޞިލުކުރީ، އަމީނިއްޔާ ސްކޫލްގެ ދަރިވަރު އައްޑޫސިޓީ މަރަދޫފޭދޫ ފެހިފަރުދާގޭ އާމިނަތު އިޒްފާ ޢާމިރެވެ. ޓްރެވަލް އެންޑް ޓޫރިޒަމުން މުޅި ދުނިޔެއިން 1 ވަނަ ޙާޞިލުކުރީވެސް އަމީނިއްޔާ ސްކޫލްގެ ދެ ދަރިވަރުން ކަމަށްވާ މާލެއަތޮޅު ގުރައިދޫ މިރުސްމާގޭ ޝައިފާ ޢަބްދުއްޝަކޫރާއި، މާފަންނު ރެސްޓް ޕޮއިންޓް ޒީކް އަޝްރަފް ޢަލީއެވެ. މެތަމެޓިކްސް އިން މުޅި ދުނިޔެއިން 1 ވަނަ ހޯދި އަނެއް ދަރިވަރަކީ، މިލަދުންމަޑުލު އުތުރުބުރީ މާއުނގޫދޫ ސްކޫލްގެ ދަރިވަރު މާއުނގޫދޫ ގަދަގޭ އަޙްމަދު ރިޝްވާނެވެ.
މިދިޔަ އަހަރު ސާނަވީ ތަޢުލީމުގެ އިމްތިޙާނުން ރާއްޖެއިން 1 ވަނަ ޙާޞިލުކުރި 40 ދަރިވަރުންނަށް، މިރޭގެ ޖަލްސާގައި އިނާމު ދެއްވީވެސް ރައީސުލްޖުމްހޫރިއްޔާއެވެ. ސާނަވީ ތަޢުލީމުގެ އިމްތިޙާނުތަކުން ވަކިވަކި މާއްދާތަކުން މުޅި ދުނިޔެއިން އެންމެމޮޅު ނަތީޖާ ޙާޞިލުކުރި 19 ދަރިވަރުންނަށް އިނާމު ދެއްވީ، ރައީސުލްޖުމްހޫރިއްޔާގެ ނައިބު ޑޮކްޓަރ މުޙަންމަދު ޖަމީލް އަޙްމަދެވެ. އެންމެ ރަނގަޅު 10 ނަތީޖާ ޙާޞިލުކުރި ދަރިވަރުންގެ ތެރެއިން 2 ވަނައިން 10 ވަނައަށް އައި ދަރިވަރުންނަށް، އިނާމާއި ހަނދާނީ ލިޔުން ދެއްވީ، ބައެއް ވަޒީރުންނާއި، ޚާއްޞަ މެހްމާނުންނެވެ. ރާއްޖެއިން އެންމެމޮޅު ނަތީޖާ ހޯދި 17 ދަރިވަރުންނަށް އިނާމު ޙަވާލުކޮށްދެއްވީ، މިނިސްޓަރ އޮފް އެޑިޔުކޭޝަން ޑޮކްޓަރ ޢާއިޝަތު ޝިހާމެވެ. ސްކޫލް އެޗީވްމަންޓް އެވޯޑް ޙާޞިލުކުރި 35 ސްކޫލަށް އިނާމު ދެއްވީ، ދިވެހިރާއްޖޭގެ ޤައުމީ ޔުނިވަރސިޓީގެ ޗާންސެލަރ ޑޮކްޓަރ މުޙަންމަދު ޒާހިރު ޙުސައިނެވެ. މި އިމްތިޙާނުން ކުރިއެރުން ހޯދި 64 ސްކޫލަށް އިނާމު ދެއްވީ، މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ ކާނަލް (ރިޓަޔަރޑް) މުޙަންމަދު ނާޒިމެވެ. ކެމްބްރިޖް ހައި އެޗީވަރސްގެ ގޮތުގައި ހޮވުނު 8 ދަރިވަރުންނަށް އިނާމު ދެއްވީ، ކޭމްބްރިޖް ރީޖަނަލް މެނޭޖަރ ފޮރ ސައުތު އޭޝިޔާ ވިލިއަމް ބިކަރޑެކެވެ.
މި ޖަލްސާގައި މިނިސްޓަރ އޮފް އެޑިޔުކޭޝަން ޑޮކްޓަރ ޢާއިޝަތު ޝިހާމް ވާހަކަފުޅު ދެއްކެވިއެވެ. އަދި ނަތީޖާއާ ބެހޭގޮތުން ތައްޔާރު ކުރެވިފައިވާ ވީޑިއޯ ޕްރެޒެންޓޭޝަނެއް ހުށަހެޅިއެވެ.
