بســم اللّـه الرّحمـن الرّحيــم
اَلحَمْـدُ لِلّـهِ رَبّ العَـالَمِـين‘ وَالصّـلاة وَالسّلام علـى أشرف الأنبياء والمرسلين، وعلى آلـه وصحبـه أجمعـين.
ހދ. އަތޮޅު ކައުންސިލްގެ ރައީސް އަލްފާޟިލް ޙުސައިން ރަޝީދު، މިނިސްޓަރ އޮފް އެންވަޔަރަންމަންޓް އެންޑް އެނަރޖީ އަލްފާޟިލް ޠާރިޤު އިބްރާހީމް، މިނިސްޓްރީގެ ސްޓޭޓް މިނިސްޓަރ އަލްފާޟިލް ޢަބްދުލްމަތީން، މިއަތޮޅުގެ އިސްވެރިން، ލޮބުވެތި ރައްޔިތުން.
السّــلام عليــكم ورحـمــة اللّـه وبـركاتـه
މިއަދުގެ އެންމެބޮޑު އުފަލަކީ، މިރަށުގެ ލޮބުވެތި ރައްޔިތުން، އަޅުގަނޑުމެންގެ ސަރުކާރުން ފަށްޓާފައިމިވާ މުހިންމު މަޝްރޫޢު ފެށުމުގެ މި އުފާވެރި ރަސްމިއްޔާތަށް، ތިޔަ ހުރިހާ ބޭފުޅުން ވަޑައިގެންދެއްވި ކަމަށްޓަކައި، ތިޔަ ހުރިހާ ބޭފުޅުންނަށް ވަރަށް އިޚްލާޞްތެރިކަމާއެކީގައި ޝުކުރު އަދާކުރަން.
އާދެ! މިރަށުގެ ނުވަތަ ހަނިމާދޫގެ ނަރުދަމާގެ ނިޒާމު މިހާހިސާބަށް މިގެންދެވުނީ، ވަރަށްގިނަ ފަރާތްތަކެއްގެ ބުރަ މަސައްކަތާ އެކީގައި. ޚާއްޞަ ގޮތެއްގައި، އެނގިވަޑައިގަންނަވާނޭ ފަދައިން، ސަރުކާރުގެ ތެރެއިން މަޝްރޫޢުތައް ކުރިއަށް ގެންދިޔުމުގައި، ރާއްޖޭގެ އެކި ހިސާބުތަކުގައި، އެކިކަންކޮޅުތަކުގައި، މިފަދަ ޚިދްމަތްތަކަކަށް ބޭނުންވެފައިވާ މިދަނޑިވަޅުގައި، ކޮންމެ ސަރަޙައްދަކުންވެސް، ކޮންމެ އަތޮޅަކުންވެސް އަދި ކޮންމެ ރަށަކުންވެސް އެންމެ އަވަހަށް، އެރަށަކަށް ނުވަތަ އެރަށެއްގެ މަސައްކަތް ފެށްޓުމަށްޓަކައި މަސައްކަތްތަކެއް ކުރަމުންދާ މި ފުރްޞަތުގައި، އަޅުގަނޑު ދެކޭގޮތުގައި ހަނިމާދޫގައި މިއަދު މި މަސައްކަތް ފެށިގެން މިދަނީ، މިކަމުގައި ވަރަށްގިނަ ފަރާތްތަކެއްގެ ބުރަ މަސައްކަތްވާތީ. ޚާއްޞަ ގޮތެއްގައި، އަޅުގަނޑުމެންގެ މި މިނިސްޓްރީ ހިންގުމާ ޙަވާލުވެހުރި މިނިސްޓަރ އާދެ! މިނިސްޓަރ ޠާރިޤު އިބްރާހީމް މިއަދު މި މަސައްކަތް މިހާ ހިސާބަށް ގެންދެވުމުގައި ވަރަށްބުރަ މަސައްކަތްޕުޅުތަކެއް ކުރައްވާފައިވާކަން ފާހަގަކޮށް، އަޅުގަނޑު، އަޅުގަނޑުމެންގެ އެންވަޔަރަންމަންޓް މިނިސްޓަރަށް ވަރަށް ޚާއްޞަ ޝުކުރެއް، ތިޔަ ރައްޔިތުންގެ ނަންފުޅުގައި އަރުވަން.
ހަމައެޔާއެކީގައި، މުޅި މިއަތޮޅުގެ ތަރައްޤީއަށްޓަކައި އެނގިވަޑައިގަންނަވާނޭ ފަދައިން، ދެންމެވެސް ވާހަކަފުޅު ދައްކަވަމުން ޙުސައިން ރަޝީދު ވަރަށް ސާފުކޮށް ޞަރީޙަކޮށް އަތޮޅުގެ ރައްޔިތުންގެ އިޙްސާސްތަކުގެ ވާހަކަ އަޅުގަނޑުމެންނާ ހަމައަށް އަޑުއިއްވަވައިފި. އަދި މިދިޔަ ދުވަސްތަކުގައި ތަކުރާރުކޮށް އެކި ބައްދަލުވުންތަކުގެ ތެރެއިން އެމަނިކުފާނު ވަނީ އެ އަޑު އަޅުގަނޑުމެންނާ ހަމައަށް ގެނެސްދީފައި. އެހެންވީމާ، މިއަދު މިރަށުގެ މި މަސައްކަތް ފެށިގެން ދިޔުމުގައި، އަޅުގަނޑު ފާހަގަކުރަން، މިއަތޮޅު ކައުންސިލްގެ ބުރަ މަސައްކަތްވާކަމާއި އަދި މިހާހިސާބަށް މިމަސައްކަތް ގެންދިޔުމުގައި، ވަރުބަލިކަމެއްނެތި އަތޮޅު ކައުންސިލުން ކުރައްވާފައިވާ މަސައްކަތް ފާހަގަކޮށް، ޖުމްލަ ގޮތެއްގައި އަތޮޅު ކައުންސިލަށް އަދި ޚާއްޞަކޮށް، އަތޮޅު ކައުންސިލްގެ ރައީސަށް އަޅުގަނޑު ވަރަށް އިޚްލާޞްތެރިކަމާއެކީގައި ޝުކުރު ދަންނަވަން.
މިފަދަ މަސައްކަތެއް ކުރިއަށްދާއިރުގައި، އެންމެ މުހިންމު ކަމެއްގެ ގޮތުގައި އަޅުގަނޑުމެން ފާހަގަކުރަންޖެހެނީ، ޤައުމުގެ ތަރައްޤީއަށާއި، ޤައުމުގެ ހަމަޖެހުމާއި، ޞުލްޙަމަޞްލަސް ކަމަށްޓަކައި ސަރުކާރުން ކުރައްވަމުން ގެންދަވާ މަސައްކަތަކީ، އެނގިވަޑައިގަންނަވާނޭ ފަދައިން މިމަސައްކަތްޕުޅުގައި އެއްވެސް ޝައްކެއްނެތްގޮތުގައި، ޤައުމުގެ ރައީސުލްޖުމްހޫރިއްޔާގެ ޚާއްޞަ ނަޒަރެއް ހިމެނިފައިވާ ކަމެއް. އެހެންކަމުން، މިއަދު ރާއްޖޭގެ އެކިކަންކޮޅުތަކަށް ދިމާވެފައިވާ މައްސަލަތައް ޙައްލުކުރުމުގައި، ޚާއްޞަ އިސްކަމެއް ދެއްވައިގެން، ޤައުމުގެ ރައީސުލްޖުމްހޫރިއްޔާ އަލްފާޟިލް ޢަބްދުﷲ ޔާމީން ޢަބްދުލްޤައްޔޫމް ކުރައްވަމުން ގެންދަވާ މަސައްކަތްޕުޅު ފާހަގަކޮށް، އެމަނިކުފާނަށް ތިޔަ ލޮބުވެތި ރައްޔިތުންގެ ނަންފުޅުގައި އަޅުގަނޑު ޚާއްޞަ ޝުކުރެއް އަދާކުރަން.
މިއަދު މިމަސައްކަތް މިރަށުގައި ފެށިގެން ދިޔުމަކީ، އެއްވެސް ޝައްކެއްނެތްގޮތުގައި، މިރަށުގެ ވަރަށްގިނަ ރައްޔިތުންތަކެއް މިހާހިސާބަށް ކުރަމުން އައި އުންމީދުގައި ޙަޤީޤީ ކުލަ ޖެހިގެންދާ ދުވަހެއް. އަޅުގަނޑަށް ވަރަށް ބޮޑަށް މިއުފާވެރިކަން އެބަ އިޙްސާސްވޭ. މިއަދު ޢަމަލީ މަސައްކަތް ފެށިގެން އިރާދަކުރެއްވިއްޔާ މިއަހަރު ނިމެންވާއިރަށް، މުޅި މަސައްކަތް ނިމި، މިރަށުގެ ރައްޔިތުންނަށް މިހާހިސާބަށް ދިމާވެފައިވާ ވަރަށްބޮޑު ދަތިކަމަކަށް ޙައްލެއް ލިބިގެންދާނެ. ރަށުގެ ވަރަށްގިނަ ރައްޔިތުންތަކަކަށް މިކަމުގެ ސަބަބުން ފަސޭހަތަކެއް ލިބިގެންދާނެ. އަދި ހަނިމާދުއަކީ އިރާދަކުރެއްވިއްޔާ، މުޅި ރާއްޖެއަށް ބެލިކަމުގައިވީނަމަވެސް، ތަރައްޤީގެ ވަރަށް ރީތި މަންޒަރެއް އަޅުގަނޑުމެންނަށް ކުރިމަގުގައި ފެންނަން އޮތް ރަށެއް. އަދި މުޅި މިއަތޮޅަކީ އަޅުގަނޑު ދަންނަވާލަން ބޭނުންވޭ، ދެންމެ އަތޮޅު ކައުންސިލްގެ ރައީސްގެ ވާހަކައަށް ޖަވާބުދާރީވުމަށްޓަކައި ދަންނަވާލަން ބޭނުންވޭ، މުޅި ހދ. އަތޮޅަކީ އިރާދަކުރެއްވިއްޔާމު، ރައީސް ޢަބްދުﷲ ޔާމީން ޢަބްދުލްޤައްޔޫމްގެ ތަޞައްވުރުގައި، ކުރިއަށް މިއޮތް ފަސް އަހަރުދުވަހުގައި ޚާއްޞަ އަހަންމިއްޔަތެއްދީގެން، ތަރައްޤީގެ ޚާއްޞަ މަރްކަޒަކަށް ވެގެން މުޅި މިއަތޮޅު ހިމެނިގެންދާނެ ކަމުގެ ޔަޤީންކަން އަޅުގަނޑު އަރުވަން.
އެގޮތުން، މިއަތޮޅުގެ ހިމެނިގެންދާ މުހިންމު ކަންތައްތަކުގެ ތެރޭގައި، އިރާދަކުރެއްވިއްޔާ، މިއަތޮޅަށް ގެނެވޭ ހައުސިންގ ސްކީމްތަކާއި އަދި އޭގެއިތުރުން މިއަތޮޅުގެ އެކި ހިސާބުތަކުގައި ޤާއިމްވެގެންދާ ތަރައްޤީގެ މަޝްރޫޢުގެ އިތުރުން، އިރާދަކުރެއްވިއްޔާމު، ކުޅުދުއްފުށިވެސް ވެގެންދާނީ މުހިންމު މަރްކަޒެއްގެ ގޮތުގައި. އަދި މިއަތޮޅު ހިމެނިގެންދާނީ، ރައީސް ޢަބްދުﷲ ޔާމީން ޢަބްދުލްޤައްޔޫމްގެ ސަރުކާރުގެ އިޤްތިޞާދީ ގޮތުން ފާހަގަކޮށްލެވޭ މުހިންމު މަޝްރޫޢުތަކެއް އިރާދަކުރެއްވިއްޔާ ފެށިގެން، އޭގެ ރާޙަތު މިއަތޮޅުގެ ރައްޔިތުންނަށް ލިބިގެންދާނެ މުހިންމު ޢުމްރާނީ މަރްކަޒަކަށް ވެގެންދާނެ މިއަތޮޅު.
މިއަދު ސަރުކާރުން ފަށްޓާފައިވާ މި މަޝްރޫޢުތަކުގެ ތެރެއިން ނަރުދަމާގެ ނިޒާމަކީ އިރާދަކުރެއްވިއްޔާ، ޚާއްޞަ ގޮތެއްގައި ރާއްޖޭގެ ރައްޔިތުންނަށް މިއަދު ދިމާވެފައިވާ މައްސަލަތަކަށް ޙައްލު ގެނައުމަށްޓަކައި ޚާއްޞަ އަހަންމިއްޔަތެއްދީގެން ކުރިއަށް ގެންދާނެ މަޝްރޫޢުތަކެއް. މިއަދު މިރަށުން މި މަޝްރޫޢު ފެށިގެންދާއިރުގައި، ރައީސް ޢަބްދުﷲ ޔާމީން ޢަބްދުލްޤައްޔޫމްގެ ވިސްނުންފުޅުގައި އޮތީ، މި ފަސްއަހަރު އިރާދަކުރެއްވިއްޔާ ވެގެންދާނީ، މިއިން ދުވަހަކު ރާއްޖޭގައި ދުވަހަކު ނުދެކޭފަދަ ގޮތެއްގައި ރާއްޖޭގެ ހުރިހާ ސަރަޙައްދުތަކަކަށް، ހުރިހާ އަތޮޅުތަކަކަށް އަމާޒުކޮށްގެން، ޚާއްޞަ ގޮތެއްގައި ނަރުދަމާގެ ގޮތުން ދިމާވެފައިވާ މައްސަލަތަކަށް ޙައްލެއް ހޯދައިދިނުމަށްޓަކައި ޚާއްޞަ މަސައްކަތެއް ކުރެވިގެންދާނެ ފަސް އަހަރަކަށް.
މިގޮތުން އަޅުގަނޑު ފާހަގަކުރަން، މިއަދު މިރަށުގައި މި މަސައްކަތް ފެށިގެންދާއިރުގައި، އިރާދަކުރެއްވިއްޔާ، މި ފަސްއަހަރު ދުވަހުގެ ތެރޭގައި، އަޅުގަނޑުމެންނަށް ރާއްޖޭގެ އެކި ހިސާބުތަކުގައި އެތަކެއް މަޝްރޫޢެއް ކުރިއަށް ގެންދެވޭއިރުގައި، މިއަހަރު އެކަނިވެސް ﷲގެ ރަޙުމަތާއެކީގައި ރާއްޖޭގެ އެކިހިސާބުތަކުގައި މަދުވެގެން މިފަދަ 20 މަޝްރޫޢު އިރާދަކުރެއްވިއްޔާމު، އަޅުގަނޑުމެން ފަށްޓާނެ ވާހަކަވެސް މި ފުރްޞަތުގައި ދަންނަވާލަން ބޭނުންވޭ.
އެހެންކަމަށްވާނަމަ، ކުރިއަށް މިއޮތް ފަސް އަހަރު ނިމިގެންދާއިރުގައި އަޅުގަނޑަށް މި އުންމީދު ކުރެވެނީ، ރާއްޖޭގެ ހުރިހާ ރަށްތަކެއްހެން، ހުރިހާ އަތޮޅުތަކެއްހެން އިރާދަކުރެއްވިއްޔާމު، ބޮޑު ބަޔަކަށް ނަރުދަމާ އަދި ފެނުގެ މައްސަލަ، ހަމައެޔާއެކީގައި މަގު ހެދުމުގެ މައްސަލައަށް ދިމާވެފައިވާ ގިނަ ކަންތައްތަކަށް އަޅުގަނޑުމެންނަށް ޙައްލެއް ލިބިގެންދާނެ ކަމަށް. މިރަށަށް ޚާއްޞަ ގޮތެއްގައި ކަނޑައެޅިފައިވާ މަޝްރޫޢުތަކެއް އެބަހުރި. އެހެން ނަމަވެސް، މިއަދުގެ ހަވީރުގެ އަދި ވަގުތެއްގައި، އެހެން ވަގުތެއްގައި މިރަށުގެ ރައްޔިތުންނާ އަޅުގަނޑު ބައްދަލުކުރުމުގެ ވަގުތު ކަނޑައެޅިފައި އޮތުމާއެކީގައި، އެވާހަކަތައް، އެ ޙަފްލާގައި ދެއްކުމަށްޓަކައި އަޅުގަނޑު ބާއްވާފައި، އަޅުގަނޑުގެ ވާހަކަ ކުރުކޮށްލާނަން.
އަޅުގަނޑު އުންމީދުކުރަނީ، އިރާދަކުރެއްވިއްޔާމު، ރާއްޖޭގެ ތަރައްޤީއަށްޓަކައި މިއަދުގެ ސަރުކާރުން ފަށްޓާފައިމިވާ މަސައްކަތުގައި، މުޅި ރާއްޖޭގެ ހުރިހާ ރައްޔިތުންވެސް، މިއަތޮޅުގެ ރައްޔިތުންވެސް އަދި މިރަށުގެ ރައްޔިތުންގެވެސް އެއްބާރުލުން މިއަދުގެ ސަރުކާރަށް ލިބިގެންދާނެ ކަމަށް. ދެންމެ އަތޮޅު ކައުންސިލްގެ ރައީސް ފާހަގަކުރެއްވި ކަންތައްތަކަށްވެސް ތިޔަބޭފުޅުން ސަމާލުކަން ދެއްވާނެ ކަމަށް.
އާދެ! މިފަދަ ކޮންމެ ކަމެއް ކުރިއަށްދާއިރުގައި، މިފަދަ ކޮންމެ ކަމެއް އަޅުގަނޑުމެން ބަލައިގަންނަންވާނީ، ހެޔޮހިތުން ޝުކުރުވެރިކަމާއެކީގައިކަން އެއީ އަޅުގަނޑުމެންނަށް، އަޅުގަނޑުމެންގެ މާތްވެގެންވާ އިސްލާމްދީނުން އަޅުގަނޑުމެންނަށް ލިބިގެންވާ މަތިވެރި އިރުޝާދު. ކީރިތި ޤުރްއާނުގައި اللّـه سبحـانـه وتعـالى ވަޙީކުރައްވާފައިވަނީ، لَئِن شَكَرْتُمْ لَأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ. ތިޔަބައިމީހުން، މުސްލިމުންނަށް މި އާޔަތުގައި ﷲ ވަޙީކުރައްވާފައިވަނީ، ނިޢުމަތްތަކަށް ޝުކުރުވެރިވާ ކަމުގައިވާނަމަ، اللّـه سبحـانـه وتعـالى އެ ނިޢުމަތްތައް އިތުރަށް އިތުރުކުރައްވާނެއޭ. އަދި ނިޢުމަތްތަކަށް ފުރަގަސްދިނުމަކީ އެއީ ކުފުރުގެ ޢަލާމާތްތަކުގެ ތެރެއިން ޢަލާމާތެއް ކަމަށް. އެހެންވީމާ، އަޅުގަނޑު އުންމީދު ކުރަނީ، މިރަށުގެ ރައްޔިތުން ހެޔޮހިތުން ޝުކުރުވެރިކަމާއެކީގައި މިފަދަ ކޮންމެ ކަމެއްވެސް ބަލައިގަނެ، މި މަސައްކަތްކުރާ ވެރިންނަށާއި އަދި ސަރުކާރަށް ތިޔަބޭފުޅުންގެ އެއްބާރުލުން ދެއްވާނެ ކަމަށް.
اللّـه سبحـانـه وتعـالى އަޅުގަނޑުމެން ކުރާ މިފަދަ ކޮންމެ މަސައްކަތެއްގެ ތެރެއިން އަޅުގަނޑުމެންގެ ރައްޔިތުންނަށް ހެޔޮގޮތްތައް މިންވަރުކުރައްވައި، އަޅުގަނޑުމެންނަކީ ޞުލްޙަވެރި، ރައްކާތެރި، އަމާން އަދި އެކުވެރި މުޖްތަމަޢެއްގައި އުޅޭ ރައްޔިތެއް ކަމުގައި މިންވަރު ކުރައްވާށި! އާމީން.
والســّلام عليــكم ورحـمــة اللّـه وبـركاتـه
_____________________________