މިނިވަންދުވަހުގެ މުނާސަބަތުގައި، މިއަދު ހެނދުނު ޖުމްހޫރީ މައިދާނުގައި ބޭއްވެވި ދިދަ ނެގުމުގެ ރަސްމިއްޔާތުގައި، ރައީސުލްޖުމްހޫރިއްޔާ މުޙަންމަދު ނަޝީދާއި، އެމަނިކުފާނުގެ އަނބިކަނބަލުން ލައިލާ ޢަލީ ބައިވެރިވެވަޑައިގެންފިއެވެ. މިރަސްމިއްޔާތު އޮތީ، މިއަދު ހެނދުނު 6 ޖެހިއިރުއެވެ.
މި ރަސްމިއްޔާތަށް ރައީސުލްޖުމްހޫރިއްޔާގެ ދެކަނބަލުން ވަޑައިގެންނެވިއިރު، އެދެކަނބަލުންގެ އިސްތިޤްބާލުގައި، މިނިސްޓަރ އޮފް ހޯމްއެފެއާޒް ޙަސަން ޢަފީފް ހުންނެވިއެވެ. އަދި އެވަގުތު ބޭންޑުން އެރައިވަލް ކޯލެއް އެރުވުނެވެ.
މިރަސްމިއްޔާތުގައި ޚާއްޞަ ދުޢާއެއް ކުރެއްވުމުން އޮތެވެ. މިރަސްމިއްޔާތު ނިމުނީ ޤައުމީ ސަލާމުންނެވެ.
