ރާއްޖޭގެ މުސްތަޤްބަލުގެ ތަރައްޤީ ކަށަވަރު ކުރުމަށްޓަކައި، ހަކަތަ އުފެއްދުމަށް ހަކަތައަށް ކުރާ ޚަރަދު ކުޑަކުރެވޭނެ ގޮތްތައް ހޯދައި، ތެލަށް ބަރޯސާވާ މިންވަރުވެސް ކުޑަކުރަންޖެހޭ ކަމުގައި ރައީސުލްޖުމްހޫރިއްޔާ މުޙަންމަދު ނަޝީދު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، އެމެރިކާގެ ބައިނަލްއަޤްވާމީ އެހީ ފޯރުކޮށްދޭ މުއައްސަސާ، ޔޫ.އެސް.އޭ.އައި.ޑީ.އާއި، ސައުތު އޭޝިޔާ ރީޖަނަލް އިނިޝިއޭޓިވް ފޮރ އެނަރޖީ އަދި ރީޖަނަލް ސެންޓަރ ފޯރ ލައިޓިން ގުޅިގެން ބާއްވާ ސައުތު އޭޝިޔާ ލައިޓިން ޓްރާސްފޮރމޭޝަން ފޯރަމް ހުޅުއްވައިދެއްވުމުގެ ރަސްމިއްޔާތުގައި މިއަދު ވާހަކަފުޅު ދައްކަވަމުންނެވެ.

 
ޓްރޭޑަރޒް ހޮޓެލްގައި އޮތް މި ރަސްމިއްޔާތުގައި، ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ހަކަތައަށް ކުރާ ޚަރަދު ކުޑަކޮށް، ތެލަށް ބަރޯސާވާ މިންވަރުވެސް ކުޑަކުރުމަކީ، ރާއްޖެއަށް އޭގެ މައްޗަށް އެއްވެސް ބާރެއް ނުފޯރުވޭ، ދުނިޔޭގެ ތެލުގެ ބާޒާރުގައި ތެލުގެ އަގަށް އަންނަ ކުއްލި ބަދަލުތަކުގެ ސަބަބުން، ރާއްޖޭގެ އިޤްތިޞާދަށް ކުރިމަތިވާ ލޮޅުންތައް ކުޑަކުރެވޭނެ ކަމެއްކަން ފާހަގަކުރެއްވިއެވެ. އަދި ތެލުގެ އަގު މައްޗަށްދާ ކޮންމެ ފަހަރަކީ، ރާއްޖެއަށް އެކަމުގެ އަސަރު ވަރަށް ބޮޑަށް ކުރާ ފަހަރެއް ކަމަށާއި، އެކަމުގެ ސަބަބުން، ރާއްޖޭގެ އިޤްތިޞާދީ ތަރައްޤީއަށްވެސް ހުރަސް އެޅޭ ކަމުގައި ވިދާޅުވިއެވެ. ހަކަތައަށް ކުރާ ޚަރަދު ކުޑަކުރުމުގެ މާނައަކީ، ދިރިއުޅުމުގެ ފަސޭހަތަކާއި، އަރާމު ދިރިއުޅުން ދޫކޮށްލުންނޫން ކަމަށާއި، ތެލަށް ބަރޯސާވާ މިންވަރު ކުޑަކުރުމާއެކުވެސް، ރާއްޖެއަށް ތަރައްޤީ ޙާޞިލުކުރުން ކަމުގައި ރައީސުލްޖުމްހޫރިއްޔާ ވިދާޅުވިއެވެ.
 
ރައީސުލްޖުމްހޫރިއްޔާގެ ވާހަކަފުޅުގައި، އެލް.އީ.ޑީ. ބޮކިފަދަ މަދުން ކަރަންޓް ބޭނުންކުރާ ވަސީލަތްތައް ތަޢާރަފުކޮށް، މިފަދަ ވަސީލަތްތައް ބޭނުންކުރުން އިތުރުކުރުމަކީ، ކާރބަން މަދުކޮށް، ތަރައްޤީވުމަށް ރާއްޖެއިން ކަނޑައަޅާފައިވާ ލަނޑުދަނޑިތައް ޙާޞިލު ކުރުމަށް އެޅޭ މުހިންމު ފިޔަވަޅަކަށްވާނެ ކަމެއްކަން ބަޔާންކުރެއްވިއެވެ.
 

މިފޯރަމް އިފްތިތާޙް ކުރެއްވުމުގެ ރަސްމިއްޔާތުގައި، މިނިސްޓަރ އޮފް ހައުސިން އެންޑް އެންވަޔަރަންމަންޓް މުޙަންމަދު އަސްލަމް ދެއްކެވި ވާހަކަފުޅުގައި، އެމަނިކުފާނުގެ މިނިސްޓްރީގައި ކަރަންޓްގެ ޚަރަދު ކުޑަކުރުމަށް ސަމާލުކަން ދެއްވައިގެން ކުރެއްވި މަސައްކަތްޕުޅުގެ ސަބަބުން، އެ މިނިސްޓްރީގެ ކަރަންޓް ބިލުން މަހަކު 30,000 ރުފިޔާ ކުޑަކުރެއްވިފައިވާ ކަމުގައި ވިދާޅުވިއެވެ. އެމަނިކުފާނުގެ ވާހަކަފުޅުގައި، ކަރަންޓަށް ކުރެވޭ ޚަރަދު މިވަރަށް ކުޑަކުރެއްވިފައި މިވަނީ، ވަރަށް ކުދިކުދި، އަދި އާދައިގެ އާދަކާދަތަކެއް، މަސައްކަތުގެ މާޙައުލުގައި އަށަގަންނުވައިގެން ކަމުގައި ވިދާޅުވިއެވެ. މިގޮތުން، ކޮންމެ ދުވަހަކު މަސައްކަތް ނިމުމުން، ކޮމްޕިއުޓަރތައް ނިއްވާލުމާއި، އެއަރކޮންޑިޝަނަރގެ ފިނިކަން 24 ޑިގްރީ ސެލްސިއަސްގައި ބެހެއްޓެވުންފަދަ ކަންކަމަށް އިސްކަންދެއްވާފައިވާ ކަމުގައި އެމަނިކުފާނު ވިދާޅުވިއެވެ.