އޮސްޓްރޭލިއާ ދުވަހުގެ މުނާސަބަތުގައި، ކޮމަންވެލްތު އޮފް އޮސްޓްރޭލިއާގެ ގަވަރނަރ ޖެނެރަލް، ސަމާންތާ މޮސްޓިން އޭ.ސީ. އަށާއި، ކޮމަންވެލްތު އޮފް އޮސްޓްރޭލިއާގެ ބޮޑުވަޒީރު އެންތަނީ އަލްބަނީޒް އެމް.ޕީ އަށް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތަހުނިޔާ ފޮނުއްވައިފިއެވެ.
ގަވަރނަރ ޖެނެރަލަށް ފޮނުއްވި ތަހުނިޔާގެ ސިޓީފުޅުގައި ރައީސުލްޖުމްހޫރިއްޔާ ވަނީ، ފަތުރުވެރިކަމާއި، ތަޢުލީމާއި، ޤާބިލިއްޔަތު އިތުރުކުރުމުގެ ދާއިރާއިން ދޭދޭ ގުޅުންތައް އިތުރުވަމުންދާކަން ފާހަގަކުރައްވާފައެވެ. އަދި ތަޢުލީމީ ދާއިރާއިން، ޚާއްޞަކޮށް ސްކޮލަރޝިޕްތައް މެދުވެރިކުރައްވައިގެން އޮސްޓްރޭލިއާއިން ދެއްވާ އެހީތެރިކަމުގެ ސަބަބުން، ދިވެހިރާއްޖޭގައި އިންސާނީ ވަސީލަތްތައް ތަރައްޤީކުރުމަށް ބޮޑު އެހީތެރިކަމެއް ލިބިފައިވާކަމަށާއި، ދެ ޤައުމުގެ ގުޅުން ހަރުދަނާކުރެވިފައިވާކަމަށް އެމަނިކުފާނު ވިދާޅުވިއެވެ.
އޮސްޓްރޭލިއާގެ ބޮޑުވަޒީރަށް އެމަނިކުފާނު ފޮނުއްވި ސިޓީފުޅުގައި ވަނީ، ދެ ޤައުމުގެ ރަޙުމަތްތެރި ގުޅުން ބިނާކޮށްފައިވަނީ، އެއް ޤައުމުން އަނެއް ޤައުމަށް ކުރާ އިޙުތިރާމާއި، ދެ ޤައުމުން ހިއްސާކުރާ ޑިމޮކުރަސީގެ ގިޔަމުތަކާއި، ކޮމަންވެލްތުގައި އޮންނަ ގާތްގުޅުމުގެ މަތީގައިކަން ފާހަގަކުރައްވާފައެވެ. އަދި ސަރަޙައްދީ އަމާންކަމާއި ހަމަޖެހުން ޤާއިމުކުރުމުގައި އޮސްޓްރޭލިއާއިން އަދާކުރާ ދައުރުވެސް އެމަނިކުފާނު ފާހަގަކުރެއްވިއެވެ.
ކަނޑުގެ ސަރަހައްދު ބޮޑު ޤައުމުތަކުގެ ހައިސިއްޔަތުން ދިވެހިރާއްޖެ އާއި އޮސްޓްރޭލިއާއިން، މޫސުމަށް އަންނަ ބަދަލުތަކާއި، ދެމެހެއްޓެނިވި ތަރައްޤީއާ ގުޅުންހުރި މަސްލަހަތުތައް ހިއްސާކުރާކަން ރައީސުލްޖުމްހުރިއްޔާ ފާހަގަކުރެއްވިއެވެ. އަދި ކުރިއަށް އޮތް ދުވަސްތަކުގައި ދެ ޤައުމުގެ ގުޅުން އިތުރަށް ހަރުދަނާވެގެންދާނޭކަން ޔަޤީންކުރައްވާކަމުގައި އެމަނިކުފާނު ވިދާޅުވިއެވެ. އެމަނިކުފާނު ވަނީ، ދެ ލީޑަރުންނަށް ވެސް ފުރިހަމަ ސިއްޙަތާއި ދުޅަހެޔޮކަމަށް އެދިވަޑައިގެން، އެ ޤައުމުގެ ރައްޔިތުންނަށް ކުރިއެރުމާއި ފާގަތިކަމަށް އެދިވަޑައިގެންފައެވެ.
އޮސްޓްރޭލިއާ ދުވަހުގެ މުނާސަބަތުގައި ރައީސުލްޖުމްހޫރިއްޔާގެ ރަސްމީ އެކްސް އެކައުންޓުންވެސް ވަނީ ދުވަހުގެ ހެޔޮއެދުންތައް ހިއްސާކުރައްވާފައެވެ. އެގޮތުން މި މެސެޖުގައި، އޮސްޓްރޭލިއާއަކީ ދިވެހިރާއްޖޭގެ ތަރައްޤީގެ މުހިންމު ބައިވެރިއެއްކަން ފާހަގަކުރައްވާ ރައީސުލްޖުމްހޫރިއްޔާ ވަނީ އެޤައުމުގެ ރައްޔިތުން ހެޔޮ ނަސީބާއި ފާގަތިކަމުގައި ތަރައްޤީގެ އައު އުސްމިންތަކަށް ވާސިލުވުމަށް އެދިވަޑައިގަންނަވާ ކަމުގައި ވިދާޅުވެފައެވެ.
އޮސްޓްރޭލިއާ ދުވަސް ފާހަގަކުރަނީ ކޮންމެ އަހަރެއްގެވެސް ޖަނަވަރީ މަހުގެ 26 ވަނަ ދުވަހުގައެވެ.