ކޮންމެ ކުއްޖަކީވެސް އެކުއްޖަކަށް ލިބިފައިވާ ތަޢްލީމާއި ހުނަރުގެ މައްޗަށް ކަންތައްތައް ނިންމާ، ކުޅަދާނަ ކުއްޖަކަށްވުމަށް ނައިބު ރައީސް ޑޮކްޓަރ މުޙަންމަދު ވަޙީދު ޙަސަން މަނިކު އިލްތިމާސް ކުރައްވައިފިއެވެ. ނައިބު ރައީސް މިކަމަށް އިލްތިމާސް ކުރެއްވީ، ސެންޓަރ ފޮރ ހަޔަރ ސެކަންޑަރީ އެޑިޔުކޭޝަންގެ 2010 ވަނަ އަހަރުގެ އިނާމު ދިނުމުގެ ޖަލްސާގައި، ރޭ ދަރުބާރުގޭގައި ވާހަކަފުޅު ދައްކަވަމުންނެވެ. ނައިބު ރައީސްގެ ވާހަކަފުޅުގައި، ކޮންމެ ކުއްޖަކުވެސް ކަންކަމާ ފިކުރުކޮށް، ބުއްދީގެ ބޭނުން ކުރަން ޖެހޭނެ ކަމަށާއި، ދިރިއުޅުމުގެ އާ މަގުތައް ކޮށުމަށް އަދި އެ މަގުތައް ހޯދުމަށް ހުރަހެއް އޮތްނަމަ، އެހުރަހެއް އޮތީ އަޅުގަނޑުމެންގެ ސިކުނޑީގައި ކަމަށް ވިދާޅުވިއެވެ.
ކޮންމެ ކުއްޖަކީވެސް އެކުއްޖަކު ބޭނުންވާ ގޮތަށް ކުރިމަގު ބައްޓަން ކުރެވޭނެ ކުއްޖަކަށްވާންވާނެ ކަމަށް ވިދާޅުވެ، އަދި ތިމާގެ މުސްތަޤްބަލްވަނީ ތިމާގެ އަތްމަތީގައިކަން، ކޮންމެ ކުއްޖަކުވެސް ޤަބޫލު ކުރުމަށް ނައިބު ރައީސް ނަޞޭޙަތްތެރިވެވަޑައިގެންނެވިއެވެ. މިރޮނގުން ވާހަކަފުޅު ދައްކަވަމުން، ބޭނުންވާ ކަންތައް ކުރެވޭގޮތް ނުވެގެން، މާޔޫސްވެގެން، އެހެން ކަމެއް ނުކުރާގޮތަށް ނިންމުމަކީ، ރަނގަޅު ގޮތެއް ނޫން ކަމަށާއި، މަދްރަސީ ތަޢްލީމުގެ އެންމެބޮޑު މަޤްޞަދަކީ، ދަރިވަރުންނަށް ދިމާވާ މުހިންމު ކަންކަމުގައި ފިކުރުކޮށް، އެކުދިންގެ ލާބައާއި މަންފާއަށް ކަންކަން ކުރުން ކަމުގައިވެސް ވިދާޅުވިއެވެ. އަދި ކުދިންނަކީ މިލްކެއް ނޫން ކަމާއި، ކުދިންނަކީ އަމާނާތެއްކަން ބެލެނިވެރިންނަށް ނައިބު ރައީސް ހަނދާންކޮށްދެއްވިއެވެ. އޭ ލެވެލަށް ކިޔަވައި ނިމުމަކީ ސާނަވީ ތަޢްލީމުގެ އެންމެ އުސް ހަރުފަތަށް ކިޔަވާ ނިމުންކަން ނައިބު ރައީސް ހާމަކުރައްވަމުން، ކުރިއަރާފައިވާ ޤައުމުތަކުގައިވެސް، މި ހަރުފަތް ބަލާފައިވަނީ ވަރަށް މުހިންމު ހަރުފަތެއްގެ ގޮތުގައި ކަމަށް ވިދާޅުވިއެވެ.
ނައިބު ރައީސްގެ ވާހަކަފުޅުގައި، ސީ.އެޗް.އެސް.އީ.ގެ މިވޭތުވެދިޔަ އަހަރުތަކުގައި، އެ މަރްކަޒުވަނީ ވަރަށް ފުރިހަމަ ނަތީޖާތަކެއް ހޯދާފައިކަން ފާހަގަކުރައްވަމުން، އެ މަރްކަޒުން ކިޔެވި ދަރިވަރުން މިއަދު އެކިއެކި މުހިންމު މަގާމުތައް ފުރަމުން ގެންދާކަމަށް ވިދާޅުވިއެވެ. އަދި އެ ސެންޓަރުގެ ދަރިވަރުން މިއަހަރުގެ އޭ ލެވެލް އިމްތިޙާނުން ރަނގަޅު ނަތީޖާތަކެއް ހޯދާފައިވާތީ، އެކަން ނައިބު ރައީސް ޚާއްޞަ ގޮތެއްގައި ފާހަގަކުރެއްވިއެވެ.
މިއަހަރުގެ އެޗް.އެސް.ސީ އިމްތިޙާނުގައި، އެ ސެންޓަރުން ބައިވެރިވި 826 ދަރިވަރުންގެ ތެރެއިން އިސްލާމާއި ދިވެހި، މި ދެމާއްދާއިން 81.5 އިންސައްތަ ކުދިން ފާސްވެފައިވެއެވެ. އޭ ލެވެލް ނަތީޖާއަށް ބަލާއިރު، ޔުނިވަރސިޓީތަކަށް ވަދެވޭ ފެންވަރަށް ފާސްވެފައިވާ ކުދިންގެ އިންސައްތައަކީ 76 އެވެ. މިއީ ވޭތުވެދިޔަ އަހަރަށްވުރެ 2 އިންސައްތަ ކުރިއެރުމެކެވެ. މީގެތެރެއިން 49 އިންސައްތަ ދަރިވަރުންނަކީ ހުރިހާ މާއްދާއަކުންވެސް A އާއި C އާ ދެމެދުގެ ފާސް ހޯދާފައިވާ ދަރިވަރުންނެވެ. އަދި މިދިޔަ އަހަރަކީ އެޑެކްސެލް އިމްތިޙާނުގައި A ސްޓާރ އަލަށް ތަޢާރުފު ކުރި އަހަރު ކަމަށްވެފައި، ސީ.އެޗް.އެސް.އީ.ގެ ގިނަ ދަރިވަރުންތަކެއް، ގިނަ މާއްދާތަކަކުން A ސްޓާރ ހޯދާފައިވެއެވެ.
އެ އިމްތިޙާނުން 1 ވަނަ ދަރަޖައިގައި ފާސްވި 4 ދަރިވަރުންނަކީ، ޢާއިޝަތު ޢަޒްމާ، ޢާމިރު މުޙަންމަދު، ފާޠިމަތު ސަމާހާ އިބްރާހީމް އަދި ޙުސައިން ސާލިމެވެ. މި އިމްތިޙާނުގެ އެކައުންޓިންގއިން 100 މާކްސް ހޯދައިގެން، ފަޚްރުވެރި ވަނައެއް ޙާޞިލުކުރީ މަރިޔަމް ޖުވައިރިޔާއެވެ.
ސީ.އެޗް.އެސް.އީ.އިން ހުރިހާ ގޮތަކުން އެންމެ ރަނގަޅު ދަރިވަރަކަށް ހޮވުނީ، މުޙަންމަދު ޙައްސާން އަޙްމަދެވެ.
މި ވަނަތަކަށް ރޭގެ ޖަލްސާގައި އިނާމާއި ތަށިތައް ދެއްވީ، ނައިބު ރައީސް ޑޮކްޓަރ މުޙަންމަދު ވަޙީދެވެ. މިޖަލްސާގައި ބައެއް ވަނަތަކަށް މިނިސްޓަރ އޮފް އެޑިޔުކޭޝަން ޑޮކްޓަރ މުޞްޠަފާ ލުޠުފީއާއި، ނައިބު ރައީސްގެ އަނބިކަނބަލުން އިލްހާމް ޙުސައިންވެސް އިނާމު ދެއްވިއެވެ.
މިޖަލްސާގައި، ސީ.އެޗް.އެސް.އީ.ގެ ވެބްސައިޓް އިފްތިތާޙުކޮށްދެއްވުންވެސް އޮތެވެ. ވެބްސައިޓް އިފްތިތާޙުކޮށްދެއްވީ، ނައިބު ރައީސް ޑޮކްޓަރ މުޙަންމަދު ވަޙީދު ޙަސަން މަނިކެވެ.
