ވިނަވި ޤުރްއާން ކްލާހާއި، އަސާސް ޤްރުއާން ކްލާސް އަދި އިޔާރު ޤުރްއާން ކްލާހުން އިސްނަގައިގެން ރަމަޟާން މަހުގެ މުނާސަބަތުގައި، މާލޭގެ ސްކޫލްތަކަށާއި ޤުރްއާން ކްލާސްތަކަށް ހުޅުވާލައިގެން ބޭއްވި ޤުރްއާން މުބާރާތުގެ ނަތީޖާ ފާޅުކޮށް އިނާމު ދިނުމަށް ރޭ ބޭއްވި ޖަލްސާ، ނައިބު ރައީސް ޑޮކްޓަރ މުޙަންމަދު ވަޙީދު ޝަރަފްވެރި ކޮށްދެއްވައިފިއެވެ.
ރޭ އިސްލާމީ މަރުކަޒުގައި ބޭއްވެވި މި ޖަލްސާގައި، ނައިބު ރައީސް ދެއްކެވި ވާހަކަފުޅުގައި، އަމިއްލަ ޤުރްއާން ކްލާސްތަކަކުން އިސްނަގައިގެން މިފަދަ ފުޅާ ދާއިރާއެއްގައި ޤުރްއާން މުބާރާތެއް ބާއްވަވައިދެއްވި ކަމަށްޓަކައި ވަރަށް އުފާފުޅުކުރައްވާ ކަމުގައި ވިދާޅުވެ، މި މުބާރާތް އިންތިޒާމް ކުރެއްވި ފަރާތްތަކަށް ޝުކުރު އަދާކުރެއްވިއެވެ.
އެމަނިކުފާނުގެ ވާހަކަފުޅުގައި ގިނަގިނައިން ޤްރުއާން ކިޔެވުމަކީ، ނަފްސު ތާހިރުކޮށް ރޫޙާނީ ގޮތުން ވަރުގަދަ ކުރުމަށް މުހިންމު ކަމެއް ކަމަށާއި، ކުޑައިރުއްސުރެ ކުދިން ނަފްސާނީ އަދި ރޫޙާނީ ގޮތުން ވަރުގަދަ ކުރުމަށްޓަކައި ގިނަގިނައިން ޤްރުއާން ކިޔެވުމަށް އެކުދިންނަށް ބާރުއެޅުމަކީ މުހިންމު ކަމެއް ކަމުގައި ވިދާޅުވިއެވެ.
ރޭގެ ޖަލްސާގައި އެކި އުމުރުފުރާތަކުން އެއް ވަނައަށް އައި ދަރިވަރުންނަށާއި، އެކި ގޮފި ތަކުން އެއްވަނައަށް އައި ސްކޫލްތަކަށާއި ޤުރުއާން ކްލާސްތަކަށް ނައިބު ރައީސް އިނާމު ހަވާލުކޮށްދެއްވިއެވެ.
