މި މަހުގެ 14 އިން 17އަށް ރާއްޖޭގައި ބޭއްވޭ "ހޭ ފެސްޓިވަލް މޯލްޑިވްސް"ގައި ބައިވެރިވާ ރާއްޖެއާއި ރާއްޖޭން ބޭރުގެ ފަންނާނުންގެ ޝަރަފުގައި ރައީސުލްޖުމްހޫރިއްޔާ މުޙަންމަދު ނަޝީދު، ރޭ ރައީސުލްޖުމްހޫރިއްޔާގެ ރަސްމީގެ، މުލީއާގޭގައި ޚާއްޞަ ޙަފްލާއެއް ބާއްވަވައިފިއެވެ.
ހޭ ފެސްޓިވަލަކީ އިނގިރޭސިވިލާތުގެ ވޭލްސްގައި ކޮންމެ އަހަރަކު ބޭއްވޭ އަދަބީ އަދި ޘަޤާފީ ހަރަކާތުގެ ފެސްޓިވަލެކެވެ. މިއީ ރާއްޖޭގައި ހޭ ފެސްޓިވަލް ބޭއްވޭ ފުރަތަމަ ފަހަރެވެ.
ރޭ މާލޭގައި ފެށުނު ހޭ ފެސްޓިވަލް މޯލްޑިވްސްގައި، 2000 އަހަރުވީ ރާއްޖޭގެ ރަށްފުށުގެ ދިރިއުޅުމުގެ އާދަކާދަ ފާހަގަކުރެވޭނެއެވެ.
ރާއްޖޭގައި ހޭ ފެސްޓިވަލް ބޭއްވުމާ ބެހޭގޮތުން ރައީސުލްޖުމްހޫރިއްޔާ ވިދާޅުވެފައިވަނީ، ހޭ ފެސްޓިވަލަކީ ޘަޤާފީ، ސިޔާސީ އަދި އިޖްތިމާޢީ ކަންކަމާ ބެހޭގޮތުން ވަރަށް ފުޅާ ދާއިރާއެއްގައި މަޝްވަރާއާއި ޚިޔާލު ބަދަލުކުރެވޭ ތަނަކަށްވެފައި، ރާއްޖެއަކީ އަލަށް ޑިމޮކްރަސީއެއްގެ ގޮތުގައި ދުނިޔެއަށް ތަޢާރަފް ވަމުން އަންނަ ޤައުމަކަށްވާތީ، ރާއްޖެއަށް ލިބިފައިވާ ދުނިޔޭގެ އެންމެ ރީތި ގޮނޑުދޮއް ތަކަކީ ހޭ ފެސްޓިވަލް ބޭއްވުމަށް އެންމެ އެކަށީގެންވާ ތަންތަން ކަމަށެވެ.
ރޭ މާލޭގައި ބޭއްވުނު މި ފެސްޓިވަލްގެ ހުޅުވުމުގެ ރަސްމިއްޔާތަށްފަހު، މިފެސްޓިވަލް ކުރިއަށްދާނީ އާރަށުގައެވެ. މި ފެސްޓިވަލްގައި ރާއްޖޭގެ މުހިންމު ލިއުންތެރިންނާއި، އަދީބުންނާއި، މިއުޒިކް ފަންނާނުންގެ އިތުރުން، ރާއްޖެއިން ބޭރުގެ ވަރަށް މަޝްހޫރު ލިއުންތެރިންނާއި، ނޫސްވެރިންނާއި އެކިއެކި ފަންނާނުން ބައިވެރިވެއެވެ.
